ޕީޕަލްސް ނޭޝަނަލް ކޮންގްރެސް (ޕީއެންސީ) ގެ މަތީ މަޖިލީހުގެ އެކި މަގާމުތަކަށް ކުރިމަތިލުމުގެ ފުރުސަތު ހުޅުވާލައިފިއެވެ.
މިކަމާ ގުޅިގެން ޕީއެންސީން ބުނެފައިވަނީ، އެ ޕާޓީގެ މަތީ މަޖިލީހުގެ މަގާމުތަކަށް ކުރިމަތިލާން ފޯމު ހުށަހެޅޭނެ އެންމެފަހު ތާރީހަކީ 8 ސެޕްޓެމްބަރު ވާ އަންގަރާ ދުވަހުގެ ނިޔަލަށް ކަމަށެވެ. ޕާޓީގެ މަގާމުތަކަށް ކުރިމަތިލުމަށް ފޯމު ހުށަހަޅަންޖެހެނީ އޮންލައިންކޮށް ކަމަށް ޕީއެންސީން މައުލޫމާތުދެއެވެ.
ޕީއެންސީގެ މަތީ މަޖިލީހުގައި އިންތިހާބު ކުރަން ހަމަޖެހިފައިވާ މަގާމުތަކުގެ ތެރޭގައި:
- ޕާޓީގެ ނައިބު ރައީސްކަމުގެ 6 މަގާމު
- މެންބަރުންގެ މަޖިލީހަށް އާންމު 18 މެންބަރުން
- މެންބަރުންގެ މަޖިލީހަށް ޒުވާނުންނަށް ހާއްސަ ގޮނޑިތައް
- މެންބަރުންގެ މަޖިލީހަށް އަންހެނުންނަށް ހާއްސަ 10 ގޮނޑި
- އަންހެނުންގެ ހަރަކާތުގެ ރައީސާ، ނައިބު ރައީސާ، ސެކްރެޓަރީ އަދި ހަޒާންދާރު
- ޒުވާނުންގެ ހަރަކާތުގެ ރައީސް، ނައިބު ރައީސް، ސެކްރެޓަރީ އަދި ހަޒާންދާރު
މި މަގާމުތަކަށް ކުރިމަތިލުމުގެ ހުރިހާ މަރުހަލާއެއް ކުރިއަށްދާނީ ޕާޓީގެ ވެބްސައިޓުގައި ގާއިމުކުރެވޭ ހާއްސަ ޑިޖިޓަލް ޕޯޓަލެއް މެދުވެރިކޮށެވެ. އަދި ފޯމު ހުށަހަޅާއިރު އައިޑީކާޑުގެ މައުލޫމާތާއި، ފޮޓޯގެ އިތުރުން ވޭތުވެދިޔަ އެއް މަސްދުވަހުގެ ތެރޭގައި ސާފުކޮށްފައިވާ ޕޮލިސް ރިކޯޑާއި ކޯޓުތަކުގެ ކުށުގެ ރިކޯޑު ހުށަހަޅަންޖެހޭނެއެވެ.
ޕީއެންސީގެ އަސާސީ ގަވާއިދުގައި ކަނޑައަޅާފައިވާ ގޮތަށް، ޕާޓީގެ މަތީ މަޖިލިސް ބާއްވަން ނިންމާފައި ވަނީ މި ހިނގާ ސެޕްޓެމްބަރު މަހުގެ 15 ވަނަ ދުވަހުން ފެށިގެން 18 ވަނަ ދުވަހާއި ހަމައަށެވެ. ޕީއެންސީއަށް ނިސްބަތްވާ މެންބަރުން އަންނަނީ އެ ޕާޓީގެ މަތީ މަޖިލީހަށް ބޮޑެތި ތައްޔާރީތަކެއް ވަމުންނެވެ. އެގޮތުން ޕާޓީއަށް މެންބަރުން އިތުރުކުރުމާއި، ޕާޓީގައި އަންހެނުންނާއި ޒުވާނުންގެ ދައުރު މިހާރަށްވުރެ ބޮޑަށް އިތުރުކުރުމަށް ވެސް ގިނަ މަސައްކަތްތަކެއް ކުރަމުން އަންނަކަން ފާހަގަކޮށްލަންޖެހެއެވެ.
ޕީއެންސީއަކީ މިވަގުތު ރާއްޖޭގައި އޮތް އެންމެ މެންބަރުން ގިނަ ޕާޓީއެވެ. އެގޮތުން އިލެކްޝަން ކޮމިޝަން (އީސީ) ގެ ހިސާބުތައް ދައްކާގޮތުން މިދިޔަ ޖޫން މަހުގެ ނިޔަލަށް އެ ޕާޓީގައި 67،000 އަށްވުރެ ގިނަ މެންބަރުން ރަޖިސްޓްރީ ވެފައިވެއެވެ. ނަމަވެސް މިހާރު ޕީއެންސީގެ މެންބަރުންގެ އަދަދު 71،000 އަށް އަރާފައިވާ ކަމަށް އެ ޕާޓީން ވަނީ ބުނެފައެވެ.
