ހުޅުމާލެ ދެވަނަ ފިޔަވަހީގައި ތަރައްގީކޮށްފައިވާ އަމާން އުދަރެސް އަދި އަމާން ދޯދި ޓަވަރުތަކުގައި ދިރިއުޅޭ ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުން ފަހި ދިރިއުޅުން ކޯޕަރޭޝަން (އެފްޑީސީ) އިން ހާއްސަ ސޭފްޓީ ސާވޭއެއް ފަށައިފިއެވެ.
އެފްޑީސީން މިފަދަ ސާވޭއެއް ފަށާފައި މިވަނީ، އަމާން ދޯދި ޓަވަރަކުން 16 އަހަރުގެ ކުއްޖަކު ވެއްޓި އަނިޔާވެ، އަދި ސްޓެލްކޯ ފުލެޓެއްގެ 12 ވަނަ ފަންގިފިލާއިން ދެ އަހަރުގެ ކުޑަ ކުއްޖަކު ވެއްޓި ނިޔާވުމާ ގުޅިގެން އުސް އިމާރާތްތަކުގެ ރައްކާތެރިކަމާ މެދު އާންމުންގެ ކަންބޮޑުވުން އިތުރުވެފައިވާ ދަނޑިވަޅެއްގައެވެ. މިކަމާ ގުޅިގެން އެފްޑީސީން ބުނެފައިވަނީ، މި ސާވޭގެ މައިގަނޑު ބޭނުމަކީ ޓަވަރުތަކުގައި ދިރިއުޅޭ ކުޑަކުދިންނާއި ހާއްސަ އެހީއަށް ބޭނުންވާ ފަރާތްތައް ހިމެނޭ އެޕާޓްމަންޓްތައް ދެނެގަނެ، އެ ފަރާތްތަކަށް ބޭނުންވާ ރައްކާތެރިކަމުގެ ހާއްސަ ފިޔަވަޅުތައް ކަށަވަރުކޮށްދިނުން ކަމަށެވެ.
މި ސާވޭ ފެށުމުގެ މަސައްކަތުގެ ތެރެއިން އެފްޑީސީގެ މެނޭޖިންގ ޑިރެކްޓަރު ހަމްދާން ޝަކީލް ވަނީ އަމާން އުދަރެސް އަދި އަމާން ދޯދި ޓަވަރުތަކަށް ޒިޔާރަތްކުރައްވައި، އެތަނުގައި ދިރިއުޅޭ އާއިލާތަކާ ބައްދަލުކުރައްވައި، އެ ފަރާތްތަކުގެ ކަންބޮޑުވުންތައް އަޑުއައްސަވައިފައެވެ. އެފްޑީސީން އަބަދުވެސް އެންމެ ބޮޑު އިސްކަމެއް ދޭނީ ރައްޔިތުންގެ ސަލާމަތާ ރައްކާތެރިކަން ކަށަވަރުކުރުމަށްކަން ފާހަގަކުރައްވަމުން ހަމްދާން ވިދާޅުވީ، ރައްޔިތުންގެ ސަލާމަތާއި ރައްކާތެރިކަން އިތުރަށް ހަރުދަނާކުރުމަށްޓަކައި އެފްޑީސީއާއި އެމްއެންޑީއެފް ގުޅިގެން ހޭލުންތެރިކުރުވުމުގެ ހާއްސަ ސެޝަންތަކެއް ކުރިއަށްގެންދިއުމަށް ހަމަޖެހިފައިވާ ކަމަށެވެ.
މި ސެޝަންތައް ބޭއްވުމުގެ މައިގަނޑު މަގުސަދަކީ، އަލިފާނުގެ ހާދިސާތައް ދިމާވުމަށް މެދުވެރިވާ ސަބަބުތައް ދެނެގަނެ، އެފަދަ ހާދިސާތަކުން ރައްކާތެރިވުމަށް އަޅަންޖެހޭ ފިޔަވަޅުތަކަށް އާންމުން ހޭލުންތެރިކުރުވުމެވެ. އަދި ކުއްލި ނުރައްކަލުގެ ހާލަތެއްގައި އަމަލުކުރާނެ ގޮތުގެ މުހިންމު އިރުޝާދުތައް ވެސް މި ސެޝަންތަކުގެ ތެރެއިން ފޯރުކޮށްދޭނެ ކަމަށް އެފްޑީސީން ވަނީ މައުލޫމާތުދީފައެވެ.
އެފްޑީސީން އިތުރަށް ބުނެފައިވަނީ އަމާން އުދަރެސް އަދި އަމާން ދޯދި ޓަވަރުތަކަކީ އެތަނުގައި ދިރިއުޅޭ ހުރިހާ ފަރާތްތަކަށް ވެސް އުފާވެރި އަދި ރައްކާތެރި މާހައުލަކަށް ހެދުމަށް ކުރަންޖެހޭ ހުރިހާ މަސައްކަތެއް ކުރަމުންގެންދާނެ ކަމަށެވެ.
