އަންހެނުން އިޤްތިޞާދީގޮތުން ބާރުވެރިކުރުވުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން، ށ. އަތޮޅުގެ އަންހެން ވިޔަފާރިވެރިންނަށް ޚާއްޞަކޮށްގެން ބާއްވާ މަޝްވަރާ ބައްދަލުވުމެއްގައި ބައިވެރިވުމުގެ ފުރުޞަތު ހުޅުވާލައިފިއެވެ.
މި ބައްދަލުވުމަކީ ޞިއްޙަތާއި، ޢާއިލާއާއި އިޖުތިމާއީ އެހީއާ ބެހޭ ވުޒާރާގެ އިސްނެގުމުގެ މަތިން ކުރިއަށްގެންދާ ”އަންހެނުން އިޤްތިޞާދީގޮތުން ބާރުވެރިކުރުވުމުގެ ޕްރޮގްރާމް“ ގެ ދަށުން އިންތިޒާމުކުރާ ބައްދަލުވުމެކެވެ.
މި ޕްރޮގްރާމްގެ މައިގަނޑު ބޭނުމަކީ އާމްދަނީ ހޯދުމުގެ މަސައްކަތްތަކުގައި ޙަރަކާތްތެރިވާ އަންހެނުންނަށް ކުރިމަތިވެފައިވާ ގޮންޖެހުންތަކާއި ލިބެންހުރި ފުރުޞަތުތައް ދެނެގަތުމެވެ. މީގެ އިތުރުން އަލަށް ވިޔަފާރިއެއް ފެށުމުގައާއި މިހާރު ކުރަމުންދާ ވިޔަފާރިތައް އިތުރަށް ފުޅާކުރުމުގައި އަންހެނުންނަށް ދިމާވާ ދަތިތައް ދެނެގަތުމަކީވެސް މި ބައްދަލުވުމުގެ މުހިންމު އެއް މަޤްޞަދެވެ.
އެ ވުޒާރާއިން މަޢުލޫމާތު ދެއްވާ ގޮތުގައި، މި ބައްދަލުވުމުގައި ށ. އަތޮޅުގެ އަންހެން ވިޔަފާރިވެރިންގެ ތަޖުރިބާތަކާއި، އެކަނބަލުންނަށް ބޭނުންވާ ތަމްރީނުތަކާ ގުޅޭގޮތުން ފުޅާ ދާއިރާއެއްގައި މަޝްވަރާކުރެވޭނެއެވެ. އަދި މި މަޝްވަރާތަކުން ލިބޭ މަޢުލޫމާތުގެ އަލީގައި، ކުރިމަގުގައި އެކަނބަލުންނަށް ބޭނުންވާ ތަމްރީނު ފުރުޞަތުތައް ފަހިކޮށްދިނުމާއި، މާލީ އެހީތެރިކަން ނުވަތަ ފައިސާ ހޯދޭނެ މަގުތައް ފަހިކުރުމާއި، މުޖުތަމަޢު ބިނާކުރުމުގެ އެކި ޕްރޮގްރާމްތައް ބައްޓަންކުރުމަށް ވަނީ ހަމަޖެހިފައެވެ.
މި ބައްދަލުވުމުގައި ބައިވެރިވުމަށް ޝައުޤުވެރިވާ ށ. އަތޮޅުގެ އަންހެން ވިޔަފާރިވެރިން، އެ ވުޒާރާއިން ޢާންމުކޮށްފައިވާ ލިންކް މެދުވެރިކޮށް ގޫގަލް ފޯމު ފުރިހަމަކުރުމަށް ވަނީ އެދިފައެވެ
Register for our Focus Group Discussions for Women Entrepreneurs in Shaviyani Atoll. Share your experiences and help identify challenges, training needs, and opportunities to strengthen women’s economic empowerment.
Registration Link: https://t.co/SriD3Tm5SO pic.twitter.com/N2Jjm30XD7
— Social and Family Development (@SFdevelopmentMV) September 3, 2026
ސަރުކާރުން އަންހެނުންގެ އިޤްތިޞާދީ ޙަރަކާތްތެރިކަން އިތުރުކުރުމަށް ޚާއްޞަ އިސްކަމެއް ދެއްވައިގެން ސިޔާސަތުތައް އެކުލަވާލަމުން އަންނައިރު، މިފަދަ މަޝްވަރާ ބައްދަލުވުންތަކުގެ ސަބަބުން ރަށްރަށުގައި ތިބި އަންހެން ވިޔަފާރިވެރިންނަށް ކުރިމަތިވާ ދަތިތަކަށް ޢަމަލީ ޙައްލުތަކެއް ލިބިގެންދާނެ ކަމަށް އެ ވުޒާރާއިން ދެކެއެވެ.
