އެމެރިކާއިން ބޭނުން ކޮންމެ ވަގުތެއްގައި އީރާނަށް ހަމަލާދެވިދާނެ ކަމަށް ބުނެ، އެމެރިކާގެ ރައީސް ޑޮނަލްޑް ޓްރަމްޕް އީރާނަށް އަނެއްކާވެސް ވަރުގަދަ އިންޒާރެއް ދީފިއެވެ. ޓްރަމްޕް މި އިންޒާރު ދީފައި މިވަނީ އެމެރިކާއިން ދިން ނުރައްކާތެރި ވައިގެ ހަމަލާތަކެއްގައި އީރާނުން މަރުވި މީހުންގެ އަދަދު 18 އަށް އަރައި، 108 އަށް ވުރެ ގިނަ މީހުން ޒަޚަމްވެފައިވާ ދަނޑިވަޅެއްގައެވެ. މި ހަމަލާތަކުގެ ތެރޭގައި ކައިވެނި ހަފުލާއަކަށް ދިން ހަމަލާއެއްވެސް ހިމެނޭތީ، އީރާނުން ވަނީ މިއީ ”ހަނގުރާމައިގެ ޖަރީމާއެއް“ ކަމަށް ސިފަކޮށްފައެވެ.
ބުދަ ދުވަހު ޓްރަމްޕް މި އިންޒާރު ދެއްވީ ވޭތުވެދިޔަ ޖުލައި މަހަށްފަހު ދެ ޤައުމުގެ ދެމެދުގައި ބަދަލުކުރެވުނު އެންމެ ވަރުގަދަ ހަމަލާތަކާ ގުޅިގެންނެވެ. އެމެރިކާގެ އަސްކަރިއްޔާއިން ވަނީ ހޮރްމޫޒް ކަނޑުއޮޅި ކައިރީގައިވާ އީރާނުގެ ދެކުނު އައްސޭރިފަށުގެ ސިޓީތަކަށާއި އެކި ސަރަޙައްދުތަކަށް ޙަމަލާތައް އަމާޒުކޮށްފައެވެ. މީގެ ތެރޭގައި ކުހެސްތަކް ސިޓީގައި ބޭއްވި ކައިވެނި ޙަފުލާއަކަށް ދިން ހަމަލާވެސް ހިމެނެއެވެ. މީގެ ރައްދުގައި އީރާނުން ވަނީ ބަޙްރައިން، ޢިރާޤު އަދި އުރުދުންގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާދީފައެވެ.
ވައިޓް ހައުސްގައި ނޫސްވެރިންނާ ވާހަކަދައްކަވަމުން ރައީސް ޓްރަމްޕް ބުނީ، ރޭގަނޑުގެ ވަގުތުގައި އެމެރިކާއިން އީރާނަށް ވަރަށް ވަރުގަދަ ހަމަލާތަކެއް ދީފައިވާ ކަމަށެވެ. އަދި މި ހަމަލާތަކުގައި ހޮރްމޫޒް ކަނޑުއޮޅި ސަރަޙައްދުގައި އެމީހުން ޤާއިމުކުރަން އުޅުނު ހުރިހާ އައު އަސްކަރީ ވަސީލަތްތަކެއް ސުންނާފަތިކޮށްލާފައިވާ ކަމަށްވެސް ހާމަކުރިއެވެ.
”އެއީ ރޭގައި ދިން ވަރަށް ވަރުގަދަ ހަމަލާއެއް. އަދި އަޅުގަނޑުމެން މިތިބީ އިތުރު ހަމަލާއެއް ދޭންވެސް ތައްޔާރަށް، އަދި އަޅުގަނޑުމެން ބޭނުން ކޮންމެ ވަގުތެއްގައިވެސް އެކަން ކުރެވިދާނެ،“ ޓްރަމްޕް
އީރާނުގެ އޮފިޝަލުން ހާމަކުރި ގޮތުގައި އެމެރިކާގެ މި ހަމަލާތަކުގައި މިހާތަނަށް 18 މީހުން ވަނީ ޝަހީދުވެފައެވެ. އީރާނުގެ ހެލްތު މިނިސްޓަރު މުޙައްމަދު ރިޟާ ޒަފަރްޣަންދީ ވިދާޅުވީ، މަރުވި މީހުންގެ ތެރޭގައި ދެ ކުޑަކުދިން ހިމެނޭ ކަމަށެވެ. އޭގެ ތެރޭގައި ސިރީކް ކައުންޓީގެ ކުހެސްތަކްގައި އޮތް ކައިވެނި ހަފުލާއަށް ދިން ހަމަލާގައި މަރުވި 4 އަހަރުގެ ކުއްޖަކު ހިމެނެއެވެ. މި ހަފުލާއަށް ދިން ހަމަލާގައި ޖުމްލަ 4 މީހުން މަރުވިއެވެ.
حقیقت جنگ غیرقانونی آمریکا علیه ایران دیشب در #سیریک به نمایش درآمد؛ جایی که یک مراسم عروسی، در چارچوب تلاش مذبوحانه آمریکا برای پنهانکردن شکست خود، بمباران شد؛ واقعیت، جنایتهایی است که آمریکا مرتکب میشود نه ویدئوهای تولیدشده با هوش مصنوعی که به دروغ مقامهای آمریکایی را… pic.twitter.com/tKDPTHdV5u
— Esmaeil Baqaei (@IRIMFA_SPOX) September 2, 2026
އީރާނުގެ ޚާރިޖީ ވުޒާރާގެ ތަރުޖަމާނު އިސްމާޢީލް ބަޣާއީ ވަނީ ކުހެސްތަކަށް ދިން ހަމަލާއަކީ ”ހަނގުރާމައިގެ ޖަރީމާއެއް“ ކަމަށް ވިދާޅުވެ، ޢާންމުންނަށް ޙަމަލާ ނުދޭ ކަމަށް ބުނެ އެމެރިކާއިން ދައްކާ ވާހަކަތަކަށް ވަރަށް ބޮޑަށް ރައްދު ދެއްވާފައެވެ. ސޯޝަލް މީޑިއާ ޕްލެޓްފޯމް ’އެކްސް‘ ގައި އޭނާ ލިޔުއްވާފައިވަނީ، ހަޤީޤަތަކީ އެމެރިކާގެ ޕްރޮޕެގަންޑާއަށްވެސް ދޮގު ނުހެދޭނެ ފަދަ ބިރުވެރި ހަޤީޤަތެއް ކަމަށާއި، ސިރީކްގައި ޙަމަލާ އަމާޒުވި ޢާންމުންނާއި ޝިކާރައަކަށް ވީ މީހުންނަކީ ޙަޤީޤަތެއް ކަމަށެވެ.
