ދިވެހިރާއްޖޭގެ ކުޅިވަރު އެސޯސިއޭޝަންތަކުން މާލީ ލިޔެކިޔުންތައް އެކަށީގެންވާ ގޮތެއްގައި ނުބަލަހައްޓާތީ، ކުރިއަށްއޮތް ތަނުގައި ގަވާއިދުތަކުގެ ތެރެއިން އެކަން ލާޒިމުކުރުމުގެ މަސައްކަތް ކުރަމުންދާ ކަމަށް އެންޓި-ކޮރަޕްޝަން ކޮމިޝަން (އޭސީސީ) އިން ހާމަކޮށްފިއެވެ.
މިކަން ހާމަކުރެއްވީ ޕީއެސްއެމް ނިއުސްގެ ”ރާއްޖެ މިއަދު“ ޕްރޮގްރާމުގައި ވާހަކަދައްކަވަމުން، އޭސީސީގެ ޑިރެކްޓަރ ޖެނެރަލް އޮފް ޕްރިވެންޝަން ފާތިމަތު އިބްނާއެވެ. އޭނާ ވިދާޅުވީ، ރާއްޖޭގައި ކުޅިވަރު އިންތިޒާމުކޮށް ބެލެހެއްޓުމުގައި ކޮރަޕްޝަނަށް ހުރި ހިރާސްތައް ދެނެގަތުމަށްޓަކައި އެ ކޮމިޝަނުން ހާއްސަ ދިރާސާއެއް ކޮށްފައިވާ ކަމަށެވެ. މި ދިރާސާގައި ކުޅިވަރު ހަރަކާތްތައް އިންތިޒާމުކޮށް ކުރިއަށްގެންދާ ގޮތްތަކާއި، އެސޯސިއޭޝަންތަކުގެ މަސައްކަތްތައް ހިނގަމުންދާ ގޮތް ވަރަށް ފުޅާ ދާއިރާއެއްގައި ބަލާފައިވާ ކަމަށެވެ.
އިބްނާ ފާހަގަކުރެއްވި ގޮތުގައި، މި ދިރާސާގެ މަސައްކަތްތައް ކުރިއަށްދިޔަ މުއްދަތުގެ ތެރޭގައި ކުޅިވަރުގެ ގާނޫނަށް ވަނީ ބޮޑެތި އިސްލާހުތަކެއް ގެނެވިފައެވެ. އަދި ގާނޫނުގައި ހުރި ފުށުއަރާ ބާރުތަކާއި މަސްއޫލިއްޔަތުތައް ދެނެގަނެވި، އެ ކަންކަން ހައްލުކުރުމަށްޓަކައި ދިރާސާގެ އަލީގައި ކުޅިވަރާ ބެހޭ ވުޒާރާއާ އެކު މަޝްވަރާތައް ކުރެވިފައިވާ ކަމަށް ވިދާޅުވިއެވެ. މީގެ އިތުރުން ގަވާއިދުތަކަށް ގެންނަންޖެހޭ އިސްލާހުތަކުގެ ތެރޭގައި އޭސީސީގެ ހުށަހެޅުންތައް ހިމެނުމަށް އެ ވުޒާރާއިން ނިންމާފައިވާ ކަމަށްވެސް އޭނާ ހާމަކުރެއްވިއެވެ.
މި ދިރާސާއިން އެންމެ ބޮޑަށް ފާހަގަކުރެވުނު އެއް ކަމަކީ، ދައުލަތުގެ އިދާރާތަކުން މާލިއްޔަތު ގަވާއިދާއި އަރުޝީފު ގާނޫނުގެ ދަށުން މާލީ ލިޔެކިޔުންތައް ބަލަހައްޓަމުން އަންނަ އުސޫލުތައް ކުޅިވަރު އެސޯސިއޭޝަންތަކަށް ލާޒިމުނުވާތީ، އެ ފަރާތްތަކުން އެކަށީގެންވާ ގޮތެއްގައި މާލީ ބަޔާންތަކާއި ލިޔެކިޔުންތައް ނުބަލަހައްޓާ މައްސަލައެވެ.
އެހެންކަމުން، މި މައްސަލަ ހައްލުކޮށް ހާމަކަން ބޮޑު ގޮތެއްގައި ކަންކަން ކުރިއަށްގެންދިއުމަށްޓަކައި، ކުޅިވަރާ ބެހޭ ވުޒާރާގެ ގަވާއިދުތަކުގެ ތެރެއިން އެސޯސިއޭޝަންތަކުން މާލީ ލިޔެކިޔުންތައް ބެލެހެއްޓުން ލާޒިމުވާނެ އުސޫލެއް ކަނޑައެޅުމުގެ މަސައްކަތް މިހާރު ދަނީ ކުރެވެމުންނެވެ.
