ކަސްޓަމަރުންގެ ޒާތީ މައުލޫމާތު ހޯދުމަށް ހޯމް މިނިސްޓްރީން ބޭންކް އޮފް މޯލްޑިވްސް (ބީއެމްއެލް) އަށް އެންގި ކަމަށް ބުނެ މީސް މީޑިއާގައި ދައުރުކުރަމުންދަނީ ސައްހަ ނޫން ފޭކު ސިޓީއެއް ކަމަށް ހޯމް ބީއެމްއެލް އިން ހާމަކޮށްފިއެވެ.
މި މައްސަލައާ ގުޅިގެން ބޭންކް އޮފް މޯލްޑިވްސްގެ ސްޕޯކްސްޕާސަން މުޙައްމަދު ސަޢީދު ވިދާޅުވީ، ކަސްޓަމަރުންގެ މައުލޫމާތު ހޯދުމަށް އެދި ހޯމް މިނިސްޓްރީން އެ ބޭންކަށް ސިޓީއެއް ފޮނުވާފައިވާ ކަމަށް ބުނެ މީސް މީޑިއާގައި ދައުރުވަމުންދަނީ ސައްހަ ނޫން ސިޓީއެއް ކަމަށެވެ. އަދި ކަސްޓަމަރުންގެ ޒާތީ އަދި ބޭންކިންގ އެއްވެސް މައުލޫމާތެއް ބޭންކުން ހާމަކުރާނީ ބޭންކިންގ ގާނޫނާ އެއްގޮތްވާ ގޮތުގެ މަތިން ކޯޓު އަމުރެއްގެ ދަށުންނާއި، ގާނޫނީ ގޮތުން ތަހުގީގު ކުރުމުގެ ބާރު ލިބިފައިވާ އިދާރާތަކުން ލިޔުމުން އެދި ހުށަހެޅުމުން އެކަނި ކަމަށްވެސް ސަޢީދު ފާހަގަކުރެއްވިއެވެ.
ކަސްޓަމަރުންގެ ބޭންކިންގ މައުލޫމާތު ބޭންކުން ހަމައެކަނި ފޯރުކޮށްދޭނީ ބޭންކިންގ ޤާނޫނާ އެއްގޮތްވާ ގޮތުގެ މަތިން ކޯޓު އަމުރެއްގެ ދަށުންނާއި އަދި ތަހުގީގީ އިދާރާތަކުން ލިޔުމަކުން އެދި ބޭންކަށް ހުށަހެޅުމުންނެވެ.
ކަސްޓަމަރުންގެ މައުލޫމާތު ހޯދުމަށް އެދި މިނިސްޓްރީ އޮފް ހޯމްލޭންޑް…
— Mohamed Saeed (@BMLSpokesperson) August 31, 2026
މިކަމާ ގުޅިގެން ހޯމް މިނިސްޓަރު ޢަލީ އިޙުސާން ވިދާޅުވީ، މީސް މީޑިއާގައި ދައުރުވަމުންދަނީ އެ މިނިސްޓްރީގެ ރަސްމީ ސިޓީއެއް ކަމަށް ދައްކަން ހަދާފައިވާ ފޭކު ލިޔުމެއް ކަމަށެވެ. އަދި ހޯމް މިނިސްޓްރީއަކީ ޖިނާއީ ތަހުގީގު ހިންގާ އިދާރާއަކަށް ނުވާތީ، އެފަދަ އެއްވެސް މައުލޫމާތެއް ހޯދުމަށް އެއްވެސް ބޭންކަކަށް އަދި މާލީ އިދާރާއަކަށް ސިޓީ ފޮނުވާފައި ނުވާނެ ކަމަށް މިނިސްޓަރު ވިދާޅުވިއެވެ.
މީގެއިތުރުން، ދައުލަތުގެ މުއައްސަސާތަކުގެ ނަމުގައި މިފަދަ ދޮގު މައުލޫމާތު ނުފެތުރުމަށް އެންމެހައި ފަރާތްތަކަށް މިނިސްޓަރު ވަނީ އިލްތިމާސްކުރައްވައިފައެވެ.
މިނިސްޓްރީގެ ރަސްމީ ސިޓީއެއްކަމަށް ދެއްކުމަށް ހަދާފައިވާ މި ފޭކް ސިޓީ މީސްމީޑިއާގައި ދަނީ ދައުރު ކުރަމުން. ހޯމް މިނިސްޓްރީ އަކީ ތަހުގީގު ހިންގާ އިދާރާއެއްކަމަށް ނުވާތީ މިފަދަ އެއްވެސް ލިޔެކިއުމެއް ބޭންކަށްވެސް އަދި އެފަދަ އެހެން އިދާރާއަކަށްވެސް ފޮނުވާފައި ނުވާނެ. ދައުލަތުގެ… pic.twitter.com/3Ssol6tNER
— Minister of Homeland Security, Labour & Technology (@min_mohst) August 31, 2026
ދައުރުވަމުންދާ ސިޓީގައިވާ ގޮތުން، ބައެއް މަސައްކަތްތެރިން ރަސްމީ ރޭޓަށްވުރެ ބޮޑު އަގުގައި ކަޅު ބާޒާރުގައި ޑޮލަރު މާރުކުރަމުންދާކަން ވަނީ ފާހަގަކުރެވިފައެވެ. އެހެންކަމުން، އެކައުންޓަށް 500 ޑޮލަރަށް ވުރެ އިތުރަށް ޖަމާކޮށްފައިވާ ފަރާތްތަކުގެ ވޭތުވެދިޔަ ހަ މަސް ދުވަހުގެ އެކައުންޓް ސްޓޭޓްމަންޓް ހިއްސާކޮށްދިނުމަށް އެ ސިޓީގައި ވަނީ އެދިފައެވެ.
ބޭންކުތަކުގައި ރައްކާކުރެވިފައިވާ ކަސްޓަމަރުންގެ މައުލޫމާތުގެ ސިއްރު ހިފެހެއްޓުމަކީ ގާނޫނީ ގޮތުން ބޭންކުތަކުގެ މައްޗަށް ލާޒިމުކުރާ ކަމަކަށްވާއިރު، މިފަދަ ދޮގު ލިޔެކިޔުންތައް އުފައްދައިގެން ރައްޔިތުންގެ މެދުގައި ނުތަނަވަސްކަން އުފެއްދުމަށް މަސައްކަތް ކުރުމަކީ ބަލައިގަނެވޭނެ ކަމެއް ނޫން ކަމަށް ގިނަ ބަޔަކު އަންނަނީ ބުނަމުންނެވެ.
