ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) މެދުވެރިކޮށް ފޯރުކޮށްދެމުން އަންނަ އިޖުތިމާއީ ރައްކާތެރިކަމުގެ އެހީތައް ލިބެމުންދާ ފަރާތްތަކުން، އެ އެހީތައް މެދުނުކެނޑި ކުރިއަށް ގެންދިއުމަށްޓަކައި އަލުން ރަޖިސްޓަރީވުމަށް އެ އެޖެންސީން އަންގައިފިއެވެ.
އެންސްޕާއިން ކުރި އިއުލާނެއްގައި ހާމަކޮށްފައިވާ ގޮތުގައި، އަލުން ފޯމު ހުށަހަޅަން ޖެހެނީ 2024 ވަނަ އަހަރުގެ ނޮވެންބަރު މަހުގެ ނިޔަލަށް އެހީގެ ދަފުތަރުގައި ހިމެނި، މިހާރުވެސް އެހީ ލިބެމުންދާ ފަރާތްތަކުގެ ތެރެއިން ކުރިއަށް އޮތް ތަނުގައިވެސް އެހީ ބޭނުންވާ ފަރާތްތަކެވެ. އަދި އެ ފަރާތްތަކުން އަންނަ ނޮވެންބަރު މަހުގެ 30 ވަނަ ދުވަހުގެ ނިޔަލަށް ’ވަން ގަވް‘ ޕޯޓަލް މެދުވެރިކޮށް ފޯމު ހުށަހަޅަން ޖެހޭނެ ކަމަށް އެ އެޖެންސީން ބުނެފައިވެއެވެ.
މިގޮތަށް އަލުން ރަޖިސްޓަރީވާން ޖެހޭ އެހީގެ ޕްރޮގްރާމްތަކަކީ:
- ފަގީރު ހާލަތުގައި ދިރިއުޅޭ، އެކަނި ދަރިން ބަލަހައްޓާ މައިން ނުވަތަ ބަފައިންނަށް ދޭ މާލީ އެހީ.
- ފަގީރު ހާލަތުގައި ދިރިއުޅޭ، މައިންބަފައިންގެ އެހީތެރިކަމެއް ނެތި އެހެން މީހުން ބަލަހައްޓާ ކުދިންނަށާއި އެ ކުދިން ބަލަހައްޓާ ފަރާތްތަކަށް ދޭ މާލީ އެހީ.
- ފަގީރު ހާލަތުގައި ދިރިއުޅޭ އާއިލާތަކަށް ކާބޯތަކެތި ގަތުމަށް ދޭ މާލީ އެހީ.
އެންސްޕާއިން ފާހަގަކުރި ގޮތުގައި، އިޖުތިމާއީ ރައްކާތެރިކަމުގެ ގާނޫނުގެ ދަށުން އެކުލަވާލާފައިވާ އާންމު ގަވާއިދުގެ 8 ވަނަ މާއްދާގެ (ރ) ގައި ބަޔާންކޮށްފައިވާ ގޮތުން، އެހީ ލިބޭ ފަރާތްތަކަށް އެހީ ދޫކުރެވެނީ މީލާދީ ދެ އަހަރު ދުވަހުގެ މުއްދަތަށް މަހުން މަހަށެވެ. އެހެންކަމުން، ގަވާއިދުގައިވާ މުއްދަތު ހަމަވުމުން އެހީގެ ޝަރުތުތައް އަދިވެސް ފުރިހަމަވޭތޯ ކަށަވަރުކުރުމަކީ ގާނޫނީ ގޮތުން ލާޒިމުކަމެކެވެ.
މީގެއިތުރުން، ކަނޑައަޅާފައިވާ މުއްދަތުގެ ކުރިން ފޯމު ހުށަނާޅާ ފަރާތްތަކަށް ދެމުންދާ އެހީ މެދުކެނޑޭނެ ކަމަށާއި، އެފަދަ ފަރާތްތަކަށް އަލުން އެހީ ލިބޭނީ އާ ފޯމެއް ހުށަހަޅައި، އެހީ ދިނުމުގައި ބަލާ މިންގަނޑުތަކަށް އަލުން ބެލުމަށްފަހު ޝަރުތު ހަމަވާނަމަ ކަމަށްވެސް އެންސްޕާއިން ވަނީ ބުނެފައެވެ.
މިކަމާ ގުޅޭ އިތުރު މައުލޫމާތު ސާފުކުރުމަށް ހުކުރު ދުވަސް ފިޔަވައި ކޮންމެ ދުވަހެއްގެ ހެނދުނު 08:00 އިން ފެށިގެން ރޭގަނޑު 22:00 އަށް އެންސްޕާގެ ހޮޓްލައިން 1402 އަށް ގުޅުމަށް އެ އެޖެންސީން ވަނީ އެދިފައެވެ.
