ހުޅުމާލޭގެ މަގުތަކަކީ އަމާން އަދި ރައްކާތެރި ތަނަކަށް ހެދުމަށްޓަކައި އަޅަންޖެހޭ ފިޔަވަޅުތަކާ ގުޅޭގޮތުން ހުޅުމާލެ ޕޮލިހާއި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާ ދެމެދު މުހިންމު މަޝްވަރާ ބައްދަލުވުމެއް ބާއްވައިފިއެވެ.
މިދިޔަ އާދީއްތަ ދުވަހު ބޭއްވި މި ބައްދަލުވުމަކީ، ފަހަކަށް އައިސް ހުޅުމާލޭގައި މަގުމަތީގެ އެކްސިޑެންޓުތައް ގިނަވެ، ނުރައްކާތެރި ހާދިސާތައް އިތުރުވަމުން އަންނާތީ، އެފަދަ އެކްސިޑެންޓުތައް މަދުކުރުމަށް އަވަސް ފިޔަވަޅުތަކެއް އެޅުމުގެ މަގުސަދުގައި ބޭއްވުނު ބައްދަލުވުމެކެވެ.
މި ބައްދަލުވުމުގައި، އާންމުކޮށް ގިނައިން އެކްސިޑެންޓުތައް ހިނގާ ކަމަށް ފާހަގަކުރެވިފައިވާ ސަރަހައްދުތަކާއި، ބާރު ދުވެލީގައި އުޅަނދުފަހަރު ދުއްވާ ސަރަހައްދުތަކުގެ މައުލޫމާތު ދެ ފަރާތުގެ ދެމެދުގައި ވަނީ ހިއްސާކޮށްފައެވެ. އަދި އެ ސަރަހައްދުތަކުގައި ހިނގާ ނުރައްކާތެރި ހާދިސާތައް މަދުކުރުމަށްޓަކައި ވަގުތުން އެޅިދާނެ ފިޔަވަޅުތަކަކީ ކޮބައިތޯ ބަލައި، ފުޅާ ދާއިރާއެއްގައި ވަނީ މަޝްވަރާކޮށްފައެވެ.
މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި މައިގަނޑު ތިން ދާއިރާއަކުން، އެއީ އިންޖިނިއަރިންގ، އެންފޯސްމަންޓް އަދި އެޑިއުކޭޝަންގެ ދާއިރާއިން ގުޅިގެން މަސައްކަތް ކުރުމަށް މި ބައްދަލުވުމުގައި ވަނީ ޚިޔާލު ބަދަލުކޮށްފައެވެ. އެގޮތުން، ހުޅުމާލޭގެ ބޮޑެތި މަގުތަކުގައި ފުލުހުން ހަރަކާތްތެރިވާ މިންވަރު އިތުރުކުރުމަށާއި، ގަވާއިދާ ޚިލާފަށް ބާރަށް އުޅަނދު ދުއްވާ ފަރާތްތަކާމެދު ގާނޫނީ ފިޔަވަޅު އެޅުން އަވަސްކުރުމަށް ވަނީ ނިންމާފައެވެ. މީގެއިތުރުން، ސްކޫލްތައް ހިމެނޭ ސަރަހައްދުތަކުގައި ޓްރެފިކް ބެލެހެއްޓުން މިހާރަށްވުރެ ހަރުދަނާކުރުމަށްވެސް ވަނީ މަޝްވަރާކުރެވިފައެވެ.
އަދި ހަމައެހެންމެ، ހުޅުމާލޭގެ ރައުންޑްއެބައުޓް (ބުރު) ތަކާއި ކަފިހިހުރަސްތައް ހިމެނޭ ސަރަހައްދުތަކުގައި ޓްރެފިކް މެނޭޖްކުރުން ހަރުދަނާ ކުރުމަށްޓަކައި މަގުތަކަށް ގެންނަންޖެހޭ އިންޖިނިއަރިންގ ބަދަލުތަކާ ގުޅޭގޮތުންވެސް ފުޅާ ދާއިރާއެއްގައި ވާހަކަދެކެވުނެވެ. މީގެ ތެރޭގައި ކަފިހިހުރަސްތަކުގައި ޕެޑެސްޓްރިއަން ލައިޓް ހަރުކުރުމާއި، މަގުތަކުގެ ކަންމަތިތަކާއި ކަފިހިހުރަސް އަދި ދުވާރުމަތީގައި ގަވާއިދާ ޚިލާފަށް ޕާކުކުރުން ހުއްޓުވުމަށް ހަރުދަނާ ފިޔަވަޅުތަކެއް އެޅުން ހިމެނެއެވެ.
މީގެއިތުރުން، އުޅަނދު ދުއްވާ ފަރާތްތަކާއި ހިނގާފައި އުޅޭ މީހުންވެސް މަގުމަތީގެ ރައްކާތެރިކަމަށް ސަމާލުކަންދޭ މިންވަރު އިތުރުކުރުމަށްޓަކައި، ދެ މުއައްސަސާ ގުޅިގެން އާންމުން ހޭލުންތެރިކުރުވުމުގެ ޚާއްސަ ޕްރޮގްރާމްތަކެއް ކުރިއަށް ގެންދިއުމަށް މި ބައްދަލުވުމުގައި ވަނީ އެއްބަސްވެފައެވެ.
މި ބައްދަލުވުމުގެ މައިގަނޑު މަގުސަދަކީ ހުޅުމާލެއަކީ އެންމެހައި ރައްޔިތުންނަށް އަމާން، އަދި ހިނގާބިނގާވެ އުޅުމަށާއި ދުއްވުމަށް ރައްކާތެރި ތަނަކަށް ހެދުމަށްޓަކައި ދެ މުއައްސަސާ ގުޅިގެން ކުރެވިދާނެ އެންމެހައި ކަންކަން ދެނެގަނެ، އެކަންކަން އަމަލީ ގޮތުން ތަންފީޒުކުރުމެވެ.
