ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) ގެ ދަށުން ރާއްޖޭގެ ހަތަރު ރަށެއްގައި ހިންގުމަށް ހަމަޖެހިފައިވާ ތަރައްޤީގެ މުހިންމު މަޝްރޫޢުތަކަށް ބޭނުންވާ ސާމާނާއި ވެހިކަލްތައް އެ ރަށްރަށަށް ފޮނުވުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ފަށައިފިއެވެ.
މި މަސައްކަތުގެ ދަށުން އާރްޑީސީން ތަކެއްޗާއި ވެހިކަލްތައް ފޮނުވަމުންދަނީ ލ. ގަން، ލ. ހިތަދޫ، ގއ. ދާންދޫ އަދި ގއ. ގެމަނަފުށްޓަށެވެ. މިއީ އެ ރަށްރަށުގެ ޢުމްރާނީ ތަރައްޤީއަށްޓަކައި ސަރުކާރުން ރާވާފައިވާ މަޝްރޫޢުތަކުގެ ޢަމަލީ މަސައްކަތް ވީ އެންމެ އަވަހަކަށް ފެށުމަށްޓަކައި ކުރެވެމުންދާ މަސައްކަތެކެވެ.
ސަރުކާރުން އަތޮޅުތަކުގެ ތަރައްޤީއަށް ޚާއްޞަ އިސްކަމެއް ދެއްވައިގެން ކުރިއަށްގެންދަވާ މި މަޝްރޫޢުތައް އަވަހަށް ނިންމުމަށްޓަކައި، އާރްޑީސީން މިހާރު ދަނީ މަސައްކަތަށް ބޭނުންވާ ބޮޑެތި މެޝިނަރީތަކާއި، ވެހިކަލް އަދި ޢިމާރާތްކުރުމުގެ ސާމާނު އެ ރަށްރަށަށް ގެންދިއުމަށްޓަކައި ބަރުކުރަމުންނެވެ.
އާރްޑީސީން މަޢުލޫމާތު ދޭ ގޮތުގައި މި ތަކެތި ރަށްރަށަށް ފޯރުމާއެކު މަޝްރޫޢުތަކުގެ ޢަމަލީ މަސައްކަތްތައް ހަލުވިކަމާއެކު ފެށިގެންދާނެއެވެ. އަދި މި މަޝްރޫޢުތައް ނިމުމުން އެ ރަށްރަށުގެ ރައްޔިތުންނަށް ދިމާވެފައިވާ ދަތިތަކަށް ބޮޑު ލުޔެއް ލިބި، ރަށްރަށުގެ އިޤްތިޞާދީ އަދި އިޖުތިމާޢީ ޙާލަތަށް ބޮޑު ކުރިއެރުމެއް އަންނާނެއެވެ.
