މަސްވެރި އުޅަނދުފަހަރަށް ދޫކުރާ ތެލުގެ ސަބްސިޑީ ދިނުމުގެ ނިޒާމު މިހާރަށްވުރެ ބޮޑަށް ހަރުދަނާކުރުމުގެ ގޮތުން، ކުރިއަށް އޮތް ތަނުގައި އެ ސަބްސިޑީއަށް އެދުމާއި ދޫކުރުމުގެ އެންމެހައި މުއާމަލާތްތައް ”ފަހި ހަކަތަ“ ޕޯޓަލް މެދުވެރިކޮށް ހަމަޖައްސަން ފިޝަރީޒް މިނިސްޓްރީން ނިންމައިފިއެވެ.
މިކަމާ ގުޅިގެން ފިޝަރީޒް މިނިސްޓްރީން ބުނެފައިވަނީ، ޑިއުޓީ އުނިކޮށްފައިވާ ތެޔޮ މަސްވެރި އުޅަނދުފަހަރަށް ފޯރުކޮށްދިނުމަށް މިހާރު ވެސް ބޭނުންކުރަމުންދާ ”ފަހި ހަކަތަ“ ޕޯޓަލް، ތެލުގެ ސަބްސިޑީ ހޯދުމަށް ލާޒިމްކުރަން ނިންމާފައިވާ ކަމަށެވެ. މި ބަދަލު ގެނައުމުގެ މައިގަނޑު މަގުސަދަކީ މަސްވެރިންނަށް ސަބްސިޑީ ފޯރުކޮށްދިނުމުގައި ދެފުށް ފެންނަ، ހަރުދަނާ އަދި އިންސާފުވެރި އުސޫލެއް ގާއިމުކުރުން ކަމަށް އެ މިނިސްޓްރީން ވަނީ ބުނެފައެވެ.
މަސްވެރި އުޅަނދުފަހަރަށް ތެލުގެ ސަބްސިޑީ ދޫކުރުމުގެ ނިޒާމަށް ބަދަލު ގެނެއުން. pic.twitter.com/QabXdHU9RJ
— Min of Fisheries, Agriculture and Ocean Resources (@MFAORmv) September 1, 2026
އެހެންކަމުން، ކަނޑުމަހުގެ މަސްވެރިކަމުގައި ހަރަކާތްތެރިވާ އުޅަނދުފަހަރުތަކުގެ ތެރެއިން މިހާތަނަށް އެ ޕޯޓަލްގައި ރަޖިސްޓްރީވެފައި ނުވާ އުޅަނދުތައް، މި ހިނގާ މަހުގެ ސެޕްޓެމްބަރު މަހުގެ 15 ވަނަ ދުވަހުގެ ކުރިން ”ފަހި ހަކަތަ“ ޕޯޓަލްގައި ރަޖިސްޓްރީވުމަށް ފިޝަރީޒް މިނިސްޓްރީން ވަނީ އިލްތިމާސްކޮށްފައެވެ.
ޒަމާނީ ޓެކްނޮލޮޖީގެ އެހީގައި މަސްވެރިންނަށް ފަސޭހަކަމާއި އަވަސްކަމާއެކު ހިދުމަތްތައް ފޯރުކޮށްދިނުމަކީ މި ސަރުކާރުގެ އެންމެ ބޮޑު އަމާޒެކެވެ. މި ބަދަލާއެކު ސަބްސިޑީ ދިނުމުގެ ކަންކަން އިތުރަށް ހަރުދަނާވެ، ހުރިހާ މަސްވެރި އުޅަނދުފަހަރަށް އެއްވެސް ދަތިކަމެއް ނެތި މި ފުރުސަތު ފަހިވެގެންދާނެ ކަމަށް ފިޝަރީޒް މިނިސްޓްރީން ފާހަގަކުރެއެވެ.
