މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ހުއްދަ ނެތި ބޭރު ފައިސާ ގަނެވިއްކުމުގެ ވިޔަފާރިކުރާ ކަމުގެ ތުހުމުތުގައި ނައިޑް އިންވެސްޓްމަންޓްގެ އޮފީހަށް ފުލުހުން ވަދެ ބަލައިފާސްކުރަން ފަށައިފިއެވެ.
މި މައްސަލައާ ގުޅިގެން މީޑިއާތަކަށް ހިއްސާކުރި މެސެޖެއްގައި ފުލުހުން ބުނެފައިވަނީ، އެމްއެމްއޭއިން ދޫކުރާ މަނީ އެކްސްޗޭންޖް ވިޔަފާރި ހިންގުމުގެ ލައިސަންސް ނެތި ބޭރު ފައިސާ ވިއްކުމުގެ ވިޔަފާރި ފުޅާ ދާއިރާއެއްގައި ގާނޫނާ ހިލާފަށް ހިންގާކަމަށް ތުހުމަތުކުރެވޭ މައްސަލައަކާ ގުޅިގެން ނައިޑް އިންވެސްޓްމެންޓް ޕްރައިވެޓް ލިމިޓެޑުން ބޭރު ފައިސާގެ ވިޔަފާރި ހިންގުމަށް ބޭނުންކުރާ ބޭންކު އެކައުންޓްތައް ފްރީޒްކޮށްފައިވާ ކަމަށެވެ.
ހަމައެހެންމެ، ތަހުގީގަށް ބޭނުންވާ އިތުރު ހެއްކާއި ގަރީނާ ހޯދުމަށްޓަކައި މ. ދަނބުގޯޅީގައި ހުންނަ އެ ކުންފުނީގެ އޮފީސް ބަލައިފާސްކުރުމުގެ އޮޕަރޭޝަނެއް ކުރިއަށްދާ ކަމަށް ވެސް ފުލުހުން ވަނީ ބުނެފައެވެ.
ނައިޑް އިންވެސްޓްމެންޓުގެ އޮފީސް ފުލުހުން ރެއިޑްކޮށްފައިވާއިރު ފާހަގަކޮށްލަންޖެހޭ ކަމަކީ، ގަވައިދާ ހިލާފަށް ބޭރު ފައިސާ ގަނެވިއްކުމުގެ ވިޔަފާރިކުރާ ފަރާތްތަކާ މެދު ހަރުކަށި ފިޔަވަޅުއެޅުމުގެ މަސައްކަތް ސަރުކާރުން މިހާރު ފަށާފައިވާ ކަމެވެ. އެގޮތުން ގަވާއިދާ ހިލާފުވުމުގެ ސަބަބުން މަނީ އެކްސްޗޭންޖް ކުރާ ތަންތަނަށް ދޫކޮށްފައިވާ ލައިސަންސް ބާތިލުކުރުމުގެ މަސައްކަތް ވެސް އެމްއެމްއޭއިން މިހާރު އަންނަނީ ކުރަމުންނެވެ.
މީގެ އިތުރުން ގަވާއިދާ ހިލާފަށް އެކައުންޓްތަކުގައި ގިނަ އަދަދެއްގެ ޑޮލަރު ދައުރުކުރި ބިދޭސީންތަކެއް ވެސް އިމިގްރޭޝަނުގެ ބެލުމުގެ ދަށަށް އިއްޔެ ގެންގޮސްފައިވާކަން ފާހަގަކޮށްލަންޖެހެއެވެ.
