މޯލްޑިވްސް ޕެންޝަން އެޑްމިނިސްޓްރޭޝަން އޮފީހުގެ ބޯޑު މެންބަރެއްގެ މަގާމަށް، މޯލްޑިވްސް އިންލެންޑް ރެވެނިއު އޮތޯރިޓީ (މީރާ) ގެ އިސް މަގާމުތަކެއް ފުރުއްވާފައިވާ އަޙުމަދު ޢަލީ އައްޔަންކޮށްފިއެވެ.
އެކައުންޓިންގ އަދި ގާނޫނީ ދާއިރާއިން މަތީ ތައުލީމު ހާސިލުކުރައްވާފައިވާ އަޙުމަދު ޢަލީއަކީ، ސަރުކާރުން އަލަށް އުފެއްދެވި މޯލްޑިވްސް ޑިވެލޮޕްމެންޓް ބޭންކު (އެމްޑީބީ) ގެ ބޯޑު މެންބަރުކަން ވެސް މީގެ ކުރިން ކުރައްވާފައިވާ، ތަޖުރިބާކާރު ބޭފުޅެކެވެ.
ދިވެހިރާއްޖޭގެ ޕެންޝަނާ ބެހޭ ގާނޫނު ބަޔާންކުރާ ގޮތުގައި ޕެންޝަން އޮފީހުގެ ބޯޑު އެކުލެވިގެންވަނީ ޖުމްލަ 8 މެންބަރުންގެ މައްޗަށެވެ. އެއީ ޗެއާޕާސަނަކާއި، ސީއެމްޑީއޭ އާއި ފިނޭންސް މިނިސްޓްރީގެ އިތުރުން ސޯޝަލް ސެކިއުރިޓީގެ ދާއިރާއިން އެންސްޕާ ތަމްސީލުކުރައްވާ މެންބަރަކާއި، ޕްރައިވެޓް ސެކްޓަރު ތަމްސީލުކުރައްވާ 4 މެންބަރުންނެވެ.
އަޙުމަދު ޢަލީ އެ ބޯޑަށް އައްޔަންކުރެއްވިއިރު، މިހާރު ޕެންޝަން ބޯޑުގައި ޗެއާޕާސަނާއެކު 7 މެންބަރުން ދަނީ މަސައްކަތް ކުރައްވަމުންނެވެ. އޭގެ ތެރޭގައި ހިމެނެނީ ޕަބްލިކް ސެކްޓަރު ތަމްސީލުކުރައްވާ 2 މެންބަރުންނާއި ޕްރައިވެޓް ސެކްޓަރުގެ 4 މެންބަރުންނެވެ.
ޕެންޝަން އޮފީހުގެ ހިންގުމަށް މުހިންމު ބަދަލުތަކެއް އަންނަމުންދާއިރު، އެ އޮފީހުގެ ޗީފް އެގްޒެކެޓިވް އޮފިސަރު (ސީއީއޯ) ގެ މަގާމަށް ޖުޑީޝަލް ސާވިސް ކޮމިޝަން (ޖޭއެސްސީ) ގެ ނައިބު ރައީސްކަން މީގެކުރިން ކުރެއްވި ޔަޒްމީދު މުޙައްމަދު ވެސް ވަނީ މިދިޔަ ހަފުތާގެ ތެރޭގައި އައްޔަންކުރައްވައިފައެވެ.
