ގަލޮޅު ފުޓްސަލް ދަނޑު ތަރައްގީކުރުމުގެ މަޝްރޫއު، ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އާ ހަވާލުކޮށްފިއެވެ.
ގަލޮޅު ފުޓްސަލް ދަނޑު ތަރައްގީކުރުމުގެ މަސައްކަތް އާރްޑީސީއާ ހަވާލުކޮށްފައިވަނީ، މިކަމަށްޓަކައި ސްޕޯޓްސް މިނިސްޓްރީގައި ބޭއްވި ރަސްމިއްޔާތެއްގައެވެ. މިކަމާ ގުޅޭ އެއްބަސްވުމުގައި ސްޕޯޓްސް މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޢަބްދުﷲ ރާފިޢުއެވެ. އާރްޑީސީގެ ފަރާތުން އެއްބަސްވުމުގައި ސޮއިކުރެއްވީ، އެ ކުންފުނީގެ މެނޭޖިންގ ޑިރެކްޓަރު އިބްރާހިމް ނަޒީމްއެވެ.
ސަރުކާރުން މި މަޝްރޫއު އާރްޑީސީއާ ހަވާލުކޮށްފައިވަނީ 1،521،283.60 ރުފިޔާއަށް، މަސައްކަތް ފަށާތާ 120 ދުވަހުގެ ތެރޭގައި އެއްކޮށް ނިންމާ ގޮތަށެވެ.
މި ފުޓްސަލް ދަނޑު ތަރައްގީކުރުމަށް ހަމަޖެހިފައިވަނީ، ގާކޮށި ފްލެޓާ އިންވެގެން އޮންނަ ހުސްބިމުގައެވެ.
