މިދިޔަ އަހަރުގެ ޖުލައި މަހާ އަޅާބަލާއިރު މިއަހަރުގެ ޖުލައި މަހު މުދަލު ޒަކާތުގެ ގޮތުގައި ލިބުނު ފައިސާގެ އަދަދު 44.2 އިންސައްތަ އިތުރުވެ، ޖުމްލަ 17.37 މިލިއަން ރުފިޔާ ޒަކާތު ފަންޑަށް ލިބިއްޖެއެވެ.
ޒަކާތު ފަންޑުގެ ހިސާބުތައް ދައްކާ ގޮތުން 2026 ވަނަ އަހަރުގެ ޖުލައި މަހު މުދަލު ޒަކާތުގެ ގޮތުގައި 17,366,787.29 (ސަތާރަ މިލިއަން ތިންލައްކަ ފަސްދޮޅަސް ހަހާސް ހަތްސަތޭކަ އައްޑިހަ ހަތް ރުފިޔާ އޮނަތިރީސް ލާރި) ވަނީ ބަލައިގެންފައެވެ. މިއީ 2025 ވަނަ އަހަރުގެ ޖުލައި މަހު ލިބުނު 12,040,524.09 (ބާރަ މިލިއަން ސާޅީސް ހާސް ފަސްސަތޭކަ ސައުވީސް ރުފިޔާ ނުވަ ލާރި) އާ އަޅާބަލާއިރު ގާތްގަނޑަކަށް 5.33 މިލިއަން ރުފިޔާގެ އިތުރުވުމެކެވެ.
މުދަލު ޒަކާތުގެ ގޮތުގައި ލިބުނު އާމްދަނީ އިތުރުވެފައިވާއިރު، މިދިޔަ ޖުލައި މަހުގެ ތެރޭގައި ޒަކާތު ފަންޑުން އެކި އެހީތަކަށް ޖުމްލަ 2.80 މިލިއަން ރުފިޔާ ވަނީ ދޫކޮށްފައެވެ.
މީގެ ތެރެއިން އެންމެ ބޮޑު ބައެއް ހޭދަކޮށްފައިވަނީ ފަގީރުންނާއި މިސްކީނުންގެ ބަޔަށެވެ. އެގޮތުން އެ ބަޔަށް 1.75 މިލިއަން ރުފިޔާ ދޫކޮށްފައިވެއެވެ. އޭގެ ތެރޭގައި ހިމެނެނީ:
ބޭސްފަރުވާގެ އެހީ: 1.48 މިލިއަން ރުފިޔާ
ޒަރޫރީ އެހީ: 115,250 ރުފިޔާ
ބޯހިޔާވަހިކަމުގެ އަސާސީ ބޭނުންތަކަށް: 155,950 ރުފިޔާ
ދިވެހިރާއްޖޭގައި ޒަކާތުގެ ނިޒާމު ހަރުދަނާކޮށް، ޒަކާތް ނެގުމާއި ބެހުމުގެ ކަންކަން ހަރުދަނާ އުސޫލުތަކެއްގެ ދަށުން ކުރިއަށް ގެންދިއުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ. އޭގެ ނަތީޖާއެއްގެ ގޮތުން ޒަކާތް ދައްކާ ފަރާތްތަކުގެ އަދަދު އިތުރުވެ، ހައްގުވެރިންނަށް ފޯރުކޮށްދެވޭ އެހީތެރިކަންވެސް ދަނީ ފުޅާވަމުންނެވެ.
