ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ކުރިއަށް އޮތް ކޮންގްރެސްގައި އެ ޕާޓީގެ މަތީ މަޖިލީހާއި އެކި ގުނަވަންތަކަށް މެންބަރުން އިންތިޚާބު ކުރުމަށްޓަކައި ކުރިމަތިލުމުގެ ފުރުސަތު އަންނަ ސެޕްޓެމްބަރު މަހުގެ 1 ވަނަ ދުވަހު ހުޅުވާލަން ނިންމައިފިއެވެ.
މިކަން ހާމަކުރެއްވީ މިރޭ ބޭއްވި ނޫސްވެރިންގެ ބައްދަލުވުމެއްގައި ޕީއެންސީގެ ތަރުޖަމާނު މުހައްމަދު ފިރުޒުލްއެވެ . ފިރުޒުލް ވިދާޅުވީ، ޕާޓީގެ އަސާސީ ޤަވާއިދުގެ ދަށުން ބާއްވާ މި ކޮންގްރެސްގައި ގިނަ އަދަދެއްގެ މުހިންމު މަގާމުތަކަކަށް މީހުން އިންތިޚާބު ކުރެވިގެންދާނެ ކަމަށެވެ. އެގޮތުން މަގާމުތަކަށް ކުރިމަތިލުމުގެ މުއްދަތަކީ ސެޕްޓެމްބަރު 1 އިން ފެށިގެން އެ މަހުގެ 8 ވަނަ ދުވަހުގެ ނިޔަލަށް ކަމަށް އޭނާ ވިދާޅުވިއެވެ.
މި ކޮންގްރެސްގައި އިންތިޚާބު ކުރަން ހަމަޖެހިފައިވާ މައިގަނޑު މަގާމުތަކުގެ ތެރޭގައި:
- ޕާޓީގެ ނައިބު ރައީސްކަމުގެ 6 މަގާމު
- މެންބަރުންގެ މަޖިލީހަށް އާންމު 18 މެންބަރުން
- މެންބަރުންގެ މަޖިލީހަށް ޒުވާނުންނަށް ޚާއްސަ ގޮނޑިތައް
- މެންބަރުންގެ މަޖިލީހަށް އަންހެނުންނަށް ޚާއްސަ 10 ގޮނޑި
- އަންހެނުންގެ ހަރަކާތުގެ ރައީސާ، ނައިބު ރައީސާ، ސެކްރެޓަރީ އަދި ޚަޒާންދާރު
- ޒުވާނުންގެ ހަރަކާތުގެ ރައީސް، ނައިބު ރައީސް، ސެކްރެޓަރީ އަދި ޚަޒާންދާރު
ފިރުޒުލް އިތުރަށް ވިދާޅުވީ، މަގާމުތަކަށް ކުރިމަތިލުމުގެ ހުރިހާ މަރުހަލާއެއް ކުރިއަށްދާނީ ޕާޓީގެ ވެބްސައިޓުގައި ޤާއިމުކުރެވޭ ޚާއްސަ ޑިޖިޓަލް ޕޯޓަލެއް މެދުވެރިކޮށް ކަމަށެވެ. އަދި ފޯމު ހުށަހަޅާއިރު އައިޑީކާޑުގެ މައުލޫމާތާއި، ފޮޓޯގެ އިތުރުން ވޭތުވެދިޔަ އެއްމަސް ދުވަހުގެ ތެރޭގައި ސާފުކޮށްފައިވާ ޕޮލިސް ރިކޯޑާއި ކޯޓުތަކުގެ ކުށުގެ ރިކޯޑު ހުށަހަޅަންޖެހޭނެ ކަމަށް ފާހަގަކުރެއްވިއެވެ. އެހެންކަމުން މިއަދުން ފެށިގެން އެ ލިޔެކިޔުންތައް ތައްޔާރުކުރުމުގެ މަސައްކަތް ކުރިއަށް ގެންދެވޭނެ ކަމަށް ވިދާޅުވިއެވެ.
މީގެއިތުރުން، ކޮންގްރެސްގައި ބައިވެރިވެވަޑައިގަންނަވާ ޕާޓީގެ އެކި ގުނަވަންތަކުގެ މަންދޫބުންނަށް މިހާރު ދައުވަތު ފޮނުވިފައިވާ ކަމަށާއި، އެ ބޭފުޅުންގެ ދަތުރުފަތުރާއި އިދާރީ އިންތިޒާމުތަކަށް ބޭނުންވާ މައުލޫމާތު އެއްކުރުމަށްޓަކައި ރެޖިސްޓްރޭޝަން ޕޯޓަލް ވަރަށް އަވަހަށް ހުޅުވާލާނެ ކަމަށް ވެސް ވިދާޅުވިއެވެ.
މުޅި ރާއްޖޭގައި ތިބި ޕީއެންސީގެ މެންބަރުން މި ކޮންގްރެސްއަށް ވަރަށް ބޮޑު ތައްޔާރީތަކެއް ވަމުން އަންނަކަން ފާހަގަކުރައްވަމުން ފިރުޒުލް ވިދާޅުވީ، ކޮންގްރެސްއާ ގުޅިގެން މެންބަރުންނަށް ބޭނުންވާ މައުލޫމާތުތައް ފަސޭހައިން ފޯރުކޮށްދިނުމަށާއި އެހީތެރިކަން ދިނުމަށް ސެޕްޓެމްބަރު މަހުގެ އެއްވަނަ ދުވަހުން ފެށިގެން ހާއްސަ ކޯލް ސެންޓަރެއްގެ ޚިދުމަތް ދޭން ފަށާނެ ކަމަށެވެ. އަދި މި އިންތިޚާބާ ގުޅޭ އިތުރު ތަފުސީލުތައް ހިމެނޭ އިއުލާނު މިރޭގެ ވަގުތެއްގައި ޕާޓީގެ ވެބްސައިޓުގައި ޝާއިއުކުރެވިގެންދާނެ ކަމަށް ވެސް އޭނާ ވިދާޅުވިއެވެ.
