މިއަހަރުގެ އޯގަސްޓް މަހުގެ 20 ވަނަ ދުވަހުގެ ނިޔަލަށް ދައުލަތަށް އާމްދަނީ އާއި ހިލޭ އެހީގެ ގޮތުގައި 27.61 ބިލިއަން ރުފިޔާ ލިބިއްޖެއެވެ.
މިނިސްޓްރީ އޮފް ފައިނޭންސް އެންޑް ޕަބްލިކް އެންޓަޕްރައިޒަސް އިން އާންމުކޮށްފައިވާ ވީކްލީ ފިސްކަލް ޑިވަލޮޕްމަންޓްސް ރިޕޯޓުގައިވާ ގޮތުން، މިއީ 2025 ވަނަ އަހަރުގެ މި މުއްދަތުގައި ލިބުނު 25.00 ބިލިއަން ރުފިޔާއާ އަޅާބަލާއިރު 10.4 އިންސައްތައިގެ ކުރިއެރުމެކެވެ. އާމްދަނީ މި މިންވަރަށް އިތުރުވުމުގެ މައިގަނޑު ސަބަބަކީ ފަތުރުވެރިކަމުގެ ދާއިރާއިން ނަގާ ޓެކުހާއި އެހެނިހެން ޓެކްސްތަކުން ލިބުނު އާމްދަނީ އިތުރުވުމެވެ.
ޓެކްސް އާމްދަނީގެ ބޮޑު ކުރިއެރުމެއް
ދައުލަތުގެ އާމްދަނީގެ ބޮޑުބައެއް ހިއްސާކުރާ ފަތުރުވެރިކަމުގެ ދާއިރާގެ މުދަލާއި ހިދުމަތުގެ ޓެކްސް (ޓީ.ޖީ.އެސް.ޓީ) ގެ ގޮތުގައި 7.39 ބިލިއަން ރުފިޔާ ލިބިފައިވެއެވެ. މިއީ ވޭތުވެދިޔަ އަހަރުގެ މި މުއްދަތުގައި ލިބުނު 6.88 ބިލިއަން ރުފިޔާއާ އަޅާބަލާއިރު 7.4 އިންސައްތަ (512.1 މިލިއަން ރުފިޔާ) ގެ އިތުރުވުމެކެވެ. މީގެއިތުރުން ޖުމްލަ ޓެކްސް އާމްދަނީ 12.1 އިންސައްތައިގެ ކުރިއެރުމަކާއެކު 21.48 ބިލިއަން ރުފިޔާއަށް ވަނީ އަރާފައެވެ.
ވިޔަފާރިއާއި މުދަލުން ނަގާ ޓެކުހުގެ އާމްދަނީ ވަނީ 20.5 އިންސައްތަ އިތުރުވެ، 5.55 ބިލިއަން ރުފިޔާއަށް އަރާފައެވެ. މީގެ ތެރޭގައި ހިމެނެނީ:
- ކޯޕަރޭޓް އިންކަމް ޓެކްސް: 2.86 ބިލިއަން ރުފިޔާ (7.1 އިންސައްތަ އިތުރު)
- ނޮން-ރެޒިޑެންޓް ވިތުހޯލްޑިންގް ޓެކްސް: 924.5 މިލިއަން ރުފިޔާ (10.2 އިންސައްތަ އިތުރު)
- ވިޔަފާރިއާއި މުދަލުގެ އެހެނިހެން ޓެކްސް: 1.39 ބިލިއަން ރުފިޔާ (87.9 އިންސައްތަ އިތުރު)
އެހެނިހެން މައިގަނޑު އާމްދަނީތަކަށް ބަލާއިރު، އިމްޕޯޓް ޑިއުޓީގެ ގޮތުގައި 2.19 ބިލިއަން ރުފިޔާ، އާންމު ޖީ.އެސް.ޓީގެ ގޮތުގައި 3.53 ބިލިއަން ރުފިޔާ އަދި ގްރީން ޓެކްސްގެ ގޮތުގައި 1.40 ބިލިއަން ރުފިޔާ ލިބިފައިވެއެވެ. އަދި އެއާޕޯޓް ސާވިސް ޗާޖާއި ޑިޕާޗަރ ޓެކްސްގެ ގޮތުގައި 1.24 ބިލިއަން ރުފިޔާ، އެއާޕޯޓް ޑިވެލޮޕްމަންޓް ފީގެ ގޮތުގައި 1.27 ބިލިއަން ރުފިޔާ އަދި މުދަލުން ލިބުނު އާމްދަނީގެ ގޮތުގައި 1.68 ބިލިއަން ރުފިޔާ ވަނީ ލިބިފައެވެ.މީގެ އިތުރުން ހިލޭ އެހީގެ ގޮތުގައި ލިބުނު މިންވަރު ވަނީ 105.7 އިންސައްތަ އިތުރުވެ، 455.7 މިލިއަން ރުފިޔާއަށް އަރާފައެވެ.
ދައުލަތުގެ ހޭދަތައް
ދައުލަތުގެ ޖުމްލަ ޚަރަދު (ރިކަރަންޓް އަދި ކެޕިޓަލް) ހުރީ 28.74 ބިލިއަން ރުފިޔާގައެވެ. މިއީ ވޭތުވެދިޔަ އަހަރުގެ މި މުއްދަތާ އަޅާބަލާއިރު 19.3 އިންސައްތައިގެ އިތުރުވުމެކެވެ. މީގެ ތެރެއިން ރިކަރަންޓް ޚަރަދަކީ 25.00 ބިލިއަން ރުފިޔާއެވެ. އަދި ކެޕިޓަލް ޚަރަދަކީ 3.75 ބިލިއަން ރުފިޔާއެވެ.
ރިކަރަންޓް ޚަރަދުތަކުގެ ތެރެއިން ފާހަގަކޮށްލެވޭ ބައިތައް:
- ކައުންސިލް ގްރާންޓް: 1.66 ބިލިއަން ރުފިޔާ (15.8 އިންސައްތަ އިތުރު)
- މުސާރައާއި އިނާޔަތްތައް: 9.39 ބިލިއަން ރުފިޔާ (11.1 އިންސައްތަ އިތުރު)
- އިދާރީ އަދި ހިންގުމުގެ ޚަރަދު: 15.54 ބިލިއަން ރުފިޔާ (27.0 އިންސައްތަ އިތުރު)
- އެހީއާއި ސަބްސިޑީ: 8.47 ބިލިއަން ރުފިޔާ (ސަބްސިޑީއަށް 3.54 ބިލިއަން އަދި އާސަންދައަށް 1.43 ބިލިއަން ރުފިޔާ)
ކެޕިޓަލް ޚަރަދުގެ ތެރެއިން އިންފްރާސްޓްރަކްޗަރ މަޝްރޫއުތަކަށް 3.26 ބިލިއަން ރުފިޔާ ހޭދަކޮށްފައިވެއެވެ. އޭގެ ތެރޭގައި ބިމާއި އިމާރާތްތަކަށް 1.20 ބިލިއަން ރުފިޔާ، އަދި ފާލަންތަކާއި ބަނދަރު ހެދުމަށް 284.5 މިލިއަން ރުފިޔާ ހޭދަކުރިއެވެ. ނަމަވެސް، މަގުތަކާއި ބްރިޖް އަދި އެއާޕޯޓްތަކަށް ކުރި ހޭދަ ވަނީ 32.1 އިންސައްތަ ދަށްވެ، 961.3 މިލިއަން ރުފިޔާއަށް މަދުވެފައެވެ.
ފައިނޭންސް މިނިސްޓްރީގެ ތަފާސްހިސާބުތަކުން ދައްކާ ގޮތުގައި، އިގްތިސާދީ މައިގަނޑު ދާއިރާތަކުން ލިބޭ ޓެކްސް އާމްދަނީ އިތުރުވަމުން އަންނައިރު، ކައުންސިލްތަކަށް ދޭ އެހީއާއި އާންމު ޚިދުމަތްތަކަށާއި އުމްރާނީ ތަރައްގީއަށް ކުރާ ހޭދަވެސް ދަނީ ފުޅާވަމުންނެވެ.
