ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދައްކަވަމުން ގެންދަވަނީ ހަގީގީ ލީޑަރެއްގެ ނަމޫނާ ކަމަށް ވިދާޅުވެ ނައިބު ރައީސް ޙުސައިން މުޙައްމަދު ލަޠީފް، ރައީސް މުޢިއްޒަށް ވަރަށް ބޮޑަށް ތައުރީފްކުރައްވައިފިއެވެ.
އެމްއެމްޓީވީން ގެނެސްދޭ ”ކޮންގްރެސް ފޯރި“ ޕްރޮގުރާމުގައި ވާހަކަދައްކަވަމުން ނައިބު ރައީސް ވިދާޅުވީ، ދިވެހިރާއްޖޭގެ އިގުތިސާދުގައި ޑޮލަރު ދައުރުނުވާ މައްސަލައަށް ގެނެސްދެއްވުމުގެ ނިޔަތުގައި ރައީސް މުޢިއްޒު ނިންމެވި ނިންމެވުމަކީ، ހަރުދަނާ ނިންމެވުމެއް ކަމަށެވެ. ބޭންކަށް ޑޮލަރު މާރުކުރުމާ ގުޅޭގޮތުން ކުރީގެ ރައީސުން ވާހަކަދައްކަވާފައިވީ ނަމަވެސް، މިކަމަކީ ކުރީގެ އެ ބޭފުޅުންނަށް އަމަލީ ގޮތުން ކުރައްވަން ކެރިވަޑައިނުގެންނެވި ކަމެއްކަން އެމަނިކުފާނު ފާހަގަކުރެއްވިއެވެ.
”ޑޮލަރު ނުލިބި ގައުމުގެ އިގުތިސާދުގައި ޑޮލަރު ދައުރުނުވާ ނުވުމަށް ނިމުމެއް ގެނައުމަށްޓަކައި ހަރުދަނާ ދުރުވިސްނޭ ސިޔާސަތެއް އެމަނިކުފާނު އެ ނިންމެވީ. އެހެންވީމާ އެ ސިޔާސަތުގެ ސަބަބުން ރައްޔިތުންނަށް ލިބޭނެ މަންފާތައް ކިތަންމެހާ ވެސް ގިނަ. ނަމަވެސް، މީގެ ތެރޭގައި އުޅެދާނެ ހިތްހަމަނުޖެހޭ ބަޔަކު. އެއީ އެ ބަޔަކަށް ލިބޭ މަންފާތައް ކޮންމެ ވެސް ވަރަކަށް އުނިތަކެއް އައިސްދާނެތީ،“ – ނައިބު ރައީސް ވިދާޅުވިއެވެ.
މިއަދު އިގުތިސާދީ ގޮތުން ރާއްޖެއަށް ކުރިމަތިވެފައިވާ ހާލަތުގެ ފުރިހަމަ ޒިންމާ އެމްޑީޕީން ނަގަންޖެހޭކަން ފާހަގަކުރައްވަމުން ނައިބު ރައީސް ވިދާޅުވީ، ފައިސާ ޗާޕުކުރުމުން ނުކުންނާނެ ނަތީޖާއަށް ބެލުމެއް ނެތި، ގާނޫނު ސަސްޕެންޑް ކުރުމަށްފަހު އެތައް ބިލިއަން ރުފިޔާއެއް ޗާޕުކުރުމުގެ ސަބަބުން ގައުމުގެ އިގުތިސާދު ފުން އަނދަވަޅަކަށް ވެއްޓުނު ކަމަށެވެ. އަދި އެކަން އެގޮތަށް ނުކުރުމަށް އޭރުގެ އިދިކޮޅު ފަރާތްތަކާއި ވިޔަފާރިވެރިންގެ އިތުރުން، މިހާރުގެ އެމްޑީޕީގެ ޗެއަރޕާސަން އަދި ކުރީގެ ރައީސް މުޙައްމަދު ނަޝީދު ހިމެނިވަޑައިގަންނަވާހެން އެތައް ބަޔަކު ސަރުކާރުގައި އާދޭސްދެންނެވި ކަމަށް އެމަނިކުފާނު ވިދާޅުވިއެވެ.
ނަމަވެސް އެއިން އެއްވެސް ބައެއްގެ ބަސް ގަބޫލުނުކޮށް، ދައުލަތުގެ ހޮސްޕިޓަލްތަކާއި ސްކޫލްތަކުގެ އިތުރުން އެހެނިހެން އިމާރާތްތައް ރަހުނުކުރިކަން ނައިބު ރައީސް ފާހަގަކުރެއްވިއެވެ. އަދި ހަމައެހެންމެ، އެމްޑީޕީން ޑޮލަރު މާރުކުރުމުގެ ސިޔާސަތާ ދެކޮޅަށް މިއަދު ވާހަކަ ދައްކަމުން ދިޔަ ނަމަވެސް، އެމްޑީޕީގެ އެންމެފަހުގެ ސަރުކާރުން ވެސް އެކަން ތަންފީޒު ކުރުމާ ހަމައަށް ކަންކަން ކުރިއަށް ގެންދިޔަ ކަމަށް އެމަނިކުފާނު ވިދާޅުވިއެވެ.
ނައިބު ރައީސް އިތުރަށް ވިދާޅުވީ، ރައީސް މުޢިއްޒުގެ މި މަސައްކަތްޕުޅުތަކާއެކު، ރައްޔިތުންނަށް ބުރައަކަށް ނުވާނެ ގޮތަށް ގައުމުގެ ދަރަނިތައް ދައްކަވައި، ގައުމުގެ އިގުތިސާދު ރަނގަޅުކުރެއްވުމަށް ގިނަ މަސައްކަތްތަކެއް ކުރައްވަމުން ގެންދަވާ ކަމަށެވެ. މި ހުރިހާ ސަބަބުތަކަށްޓަކައި ތާރީހުން އެމަނިކުފާނަށް ހާއްސަ ޖާގައެއް ލިބިވަޑައިގަންނަވާނެ ކަމާމެދު އެއްވެސް ޝައްކެއް ނުކުރައްވާ ކަމަށް އެމަނިކުފާނު ވިދާޅުވިއެވެ.
