މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން މަސްވެރިންގެ އަތުން ކަޅުބިލަމަސް ކިލޯއެއް ގަންނަ އަގު 21 ރުފިޔާއަށް ބޮޑުކޮށްފިއެވެ.
މިފްކޯއިން މަސްވެެރިންގެ އަތުން ކަޅުބިލަމަސް ގަންނަ އަގު 21 ރުފިޔާއަށް ބޮޑުކޮށްފައިވާއިރު، މިދިޔަ ޖޫން މަހުން ފެށިގެން އެ ކުންފުނިން ކަޅުބިލަމަސް ކިލޯއެއްގެ ގަންނަމުން އައީ 20 ރުފިޔާގެ މަގުންނެވެ. އަދި އޭގެ ކުރިން 18.50 ރުފިޔާގެ މަގުން ކަޅުބިލަމަސް ކިލޯއެއް ގަންނަމުންދިޔައެވެ. މިފްކޯއިން މިއަދު ބޮޑުކަންނެލި ކިލޯއެއް ގަންނަ އަގުތަކަށް ބަލާއިރު، 10 ކިލޯއާއި 15 ކިލޯއާ ދެމެދުގެ ބޮޑު ކަންނެލި 20 ރުފިޔާއަށް، އަދި 15 ކިލޯއަށްވުރެ މަތީގެ ބޮޑުކަންނެލި ކިލޯއެއް ގަންނަނީ 25 ރުފިޔާގެ މަގުންނެވެ.
މިފްކޯގެ ބަނދަރުތަކާއި ބޯޓުފަހަރަށް މިއަދު ކަޅުބިލަމަސް ކިލޯއެއް ގަންނަނީ 21ރ.އަށް. މިއީ ޑިމާންޑާއި ސަޕްލައިއަށް ރިއާޔަތްކޮށް، މަސްވެރިންނަށް އެކަށީގެންވާ އަގެއް ފޯރުކޮށްދިނުމަށާއި ދެމެހެއްޓެނިވި މަސްވެރިކަން ހަރުދަނާކުރަން ސަރުކާރުން ގެންގުޅޭ ސިޔާސަތުގެ ދަށުން ގެނެވުނު ބަދަލެއް. pic.twitter.com/eBYJIUzEqp
— MIFCO (@mifcomv) August 29, 2026
މިފްކޯއިން ހާމަކުރި ގޮތުގައި، މި ބަދަލު ގެނައުމަށް ނިންމީ މި ދުވަސްވަރު ރާއްޖޭގެ މަސްވެރިކަން އިންތިހާއަށް ދަށްވެފައިވާތީ، މަސްވެރި އާއިލާތަކަށް ކުރިމަތިވެދާނެ މާލީ ދަތިތަކުން އަރައިގަތުމަށް އެހީތެރިވެދިނުމުގެ ގޮތުންނެވެ. މި އަގާއެކު މިފްކޯއިން މަސް ގަންނަ އަގު މިހާރު ވަނީ އަމިއްލަ ކުންފުނިތަކުން މަސް ގަންނަ އަގުތަކަށްވުރެ ބޮޑުކޮށްފައެވެ. އެ ކުންފުނިިން މަސް ގަންނަ އަގުތަކަށް ބަދަލު ގެންނަމުން ދަނީ ބައިނަލްއަގުވާމީ ބާޒާރުގައި މަހުގެ އަގަށް އަންނަ ބަދަލުތަކާއި ކުންފުނީގެ އޮޕަރޭޝަނަލް ހާލަތަށް ރިއާޔަތްކޮށްގެންކަން ފާހަގަކޮށްލެވެއެވެ.
މަސްވެރިން ބާނާ މަސް 16 ރުފިޔާއަށްވުރެ ދަށް ނުކޮށް މަހުގެ އަގު ހިފެހެއްޓުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވައުދުފުޅެކެވެ. އެމަނިކުފާނުގެ ވައުދުފުޅާ އެއްގޮތަށް މިފްކޯއިން ވަނީ މިހާތަނަށް އަމަލުކުރަމުން ގޮސްފައެވެ. ރާއްޖޭގެ ހުރިހާ ސަރަހައްދެއްގައި ވެސް މަސްވެރިކަން ދަށްވެފައިވާ މި ދަނޑިވަޅުގައި، މަސް ގަންނަ އަގު 21 ރުފިޔާއަށް ބޮޑުކުރުމަކީ މަސްވެރިންނަށް ލިބިގެންދާނެ ބޮޑު ހިތްވަރަކަށް ވެގެންދާނެއެވެ.
މީގެ އިތުރުން ސަރުކާރުން އަންނަނީ މަސްވެރިންނަށް ލިބޭ އާމްދަނީ އިތުރުކޮށް، މަސްވެރިކަމުގެ ސިނާއަތް ކުރިއެރުވުމަށް ގިނަ މަސައްކަތްތަކެއް ކުރަމުންނެވެ. އެގޮތުން މަސް ގަންނަ އަގުތައް އެއްހަމައެއްގައި ހިފެހެއްޓުމުގެ އިތުރުން މަސްވެރިންނަށް ދޭންޖެހޭ ފައިސާ ބަރާބަރަށް ދޫކުރުމަށް ސަރުކާރުން އަބަދު ވެސް ވަރަށް ބޮޑު އިސްކަމެއްދެއެވެ.
