ނޯވޭގެ ރަސްގެފާނު އަދި މިވަގުތު ޔޫރަޕްގެ އެންމެ ދުވަސްވީ ރަސްކަލެއްގެ ގޮތުގައި ހުންނެވި ކިންގް ހަރަލްޑް ފަސްވަނަ، އުމުރުފުޅުން 89 އަހަރުގައި އަވަހާރަވެއްޖެއެވެ.
ނޯވޭގެ ޝާހީ ގަނޑުވަރުން ހުކުރު ދުވަހު ނެރުނު ބަޔާނެއްގައި ހާމަކޮށްފައިވާ ގޮތުގައި، ރަސްގެފާނު ހަރަލްޑް އަވަހާރަވީ އޮސްލޯ ޔުނިވަރސިޓީ ހޮސްޕިޓަލުގައި ފަރުވާދެމުން ދަނިކޮށް، އޯގަސްޓް 28 ވީ ހުކުރު ދުވަހުގެ ހެނދުނު 6:35 ގައެވެ.
ރަސްގެފާނު އަވަހާރަވުމާ ގުޅިގެން، ވާރުތަމުދަލުގެ އުސޫލުން އެގައުމުގެ ތަޚުތާ ދެން ހަވާލުވެވަޑައިގަންނަވާނީ ދަރިކަލުން، ކްރައުން ޕްރިންސް ހާކޮން އެވެ. އެމަނިކުފާނު ރަސްކަން ކުރައްވާނީ ”ކިންގް ހާކޮން އަށްވަނަ“ ގެ ނަންފުޅުގައެވެ.
Norway’s Royal Palace after King Harald's death https://t.co/m1EzF48qiQ
— Reuters (@Reuters) August 28, 2026
ލޭގެ މަދުން ނޫނީ ނުފެންނަ ބައްޔެއް ކަމަށްވާ ”ހީމޯލައިޓިކް އެނީމިއާ“ އަށް ފަރުވާ ހޯއްދެވުމަށް ރަސްގެފާނު ހަރަލްޑް ހޮސްޕިޓަލުގައި އެޑްމިޓްކުރެވުނީ މި ހިނގާ އޯގަސްޓް މަހުގެ 17 ވަނަ ދުވަހުއެވެ. މިއީ ލޭގެ ރަތް ސެލްތައް އާދަޔާ ޚިލާފަށް އަވަހަށް ހަލާކުވެ، ވަރުބަލިކަމާއި ނޭވާލާން އުނދަގޫވާ ބައްޔެކެވެ. ބުރާސްފަތި ދުވަހު ރަސްގެފާނުގެ ހާލުކޮޅު ”ވަރަށް ސީރިއަސް“ ކަމަށް އޮފިޝަލުން ހާމަކުރުމާ ގުޅިގެން، ޝާހީ އާއިލާގެ ބޭފުޅުން ވަނީ ހޮސްޕިޓަލަށް ޒިޔާރަތްކުރައްވާފައެވެ. އަދި ގިނަ އަދަދެއްގެ އާންމުން ވަނީ ގަނޑުވަރު ކައިރިއަށް އެއްވެ، މާބޮނޑިތައް ބަހައްޓައި އިހުތިރާމް އަދާކޮށްފައެވެ.
