ޤަޠަރުގެ ބޮޑުވަޒީރު އަދި ޚާރިޖީ ވަޒީރު، ޝެއިޚް މުޙައްމަދު ބިން ޢަބްދުުއްރަޙްމާން ބިން ޖާސިމް އަލް-ޘާނީ، އީރާނުގެ އެންމެ އިސްވެރިންނާއެކު ބާއްވާ ކުއްލި ޚާރިޖީ މަޝްވަރާތަކަކަށް މިއަދު ތެހެރާނަށް ޒިޔާރަތްކުރާނެއެވެ.
މި މުހިންމު ދަތުރު ކުރިއަށް މިދަނީ، އެމެރިކާއިން އީރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކާއި ކަނޑުމަތީގެ އޮޕަރޭޝަންތައް ކުރިއަށްގެންދާ ދަނޑިވަޅެއްގައެވެ. މިކަމާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ބުނެފައިވަނީ، މަޝްވަރާތައް ނިންމާލުމަށް ވޮޝިންޓަނުން ”އަވަސްއަރުވާލުމެއް ނެތް“ ކަމަށެވެ.
ޤަޠަރުގެ ޚާރިޖީ ވުޒާރާގެ ތަރުޖަމާނު މާޖިދު އަލް-އަންޞާރީ ބުނީ، މި ބައްދަލުވުމުގައި މައިގަނޑު ގޮތެއްގައި މަޝްވަރާކުރެވޭނީ ހޮރްމޫޒް ކަނޑުއޮޅިން ދަތުރުފަތުރުކުރުމުގެ މިނިވަންކަން އަލުން އިއާދަކޮށް، ހަނގުރާމައިގެ ކުރީގެ ޙާލަތަށް ސަރަޙައްދު ގެނައުމާ ގުޅޭގޮތުން ކަމަށެވެ. ޤަޠަރަކީ އެމެރިކާ އާއި އީރާނާ ދެމެދު ސީދާ ވާހަކަދެއްކުމުގެ މަގުފަހިކޮށްދޭ މުހިންމު ޤައުމަކަށްވާއިރު، މި ޒިޔާރަތަކީ ފެބްރުއަރީ 28 ގައި ހަނގުރާމަ ފެށުނު ފަހުން ޤަޠަރުގެ ބޮޑުވަޒީރު އީރާނަށް ކުރާ ފުރަތަމަ ޒިޔާރަތެވެ.
ޤަޠަރުގެ ބޮޑުވަޒީރުގެ މި ޒިޔާރަތަކީ ޕާކިސްތާނާއި އޮމާންގެ އިސް އޮފިޝަލުންވެސް ތެހެރާނަށް ޒިޔާރަތްކޮށް، ސުލްޙައަށް މަގުފަހިކުރުމަށް ކުރަމުންދާ މަސައްކަތްތަކުގެ ތެރެއިން ކުރިއަށްދާ ބައްދަލުވުންތަކެކެވެ.
