ދިވެހިރާއްޖޭގެ އެންމެހައި ރައްޔިތުން ޤައުމާ އެއްކޮޅަށް ތިބުމަށާއި، ޤައުމުގެ އިސްލާމީ ވަޙްދަތާއި އެއްބައިވަންތަކަން ހިމާޔަތްކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގޮވާލައްވައިފިއެވެ.
ނޭޝަންޗެޓް ޕްރޮގްރާމްގައި ރައީސުލްޖުމްހޫރިއްޔާ ވިދާޅުވީ، ރާއްޖޭގެ މާޒީއަށް ބެލިނަމަވެސް އަދި މިހާރުވެސް އެކިއެކި މަޤްޞަދުތަކުގައި، ޤަޞްދުގައި ނުވަތަ ނޭނގި ނަމަވެސް ޤައުމާ ދެކޮޅަށް މަސައްކަތްތަކެއް ކުރެވެމުންދާ ކަމަށެވެ. އަދި ޤައުމާ ދެކޮޅުވުމަކީ ހަމައެކަނި ކަނޑިއާއި ބަޑި ހިފައިގެން ހަނގުރާމަކުރުން ނޫންކަން ފާހަގަކުރައްވަމުން ރައީސް ވިދާޅުވީ، ފިކުރީ ގޮތުންނާއި، ލިޔެވޭ ލިޔުމަކުންނާއި، ބުނެވޭ ބަހަކުން އަދި ކުރެވޭ އެކި ޢަމަލުތަކުންވެސް ޤައުމާ ދެކޮޅުވެވިދާނެ ކަމަށެވެ.
ދިވެހިރާއްޖޭގެ ޙަޤީޤީ ޝަޚްޞިއްޔަތު ބަޔާންކޮށްދެއްވަމުން ރައީސް ވިދާޅުވީ، ދިވެހި ޤައުމަކީ ސައްތައިން ސައްތަ އިސްލާމީ، އެއްބައިވަންތަ އަދި އެއްބަސްވަންތަ ބައެއް ދިރިއުޅޭ ޤައުމެއް ކަމަށެވެ. އަދި މި ޤައުމުގެ އަސްލުތަކާއި، މައިގަނޑު ބަހާތަކާއި ޙަޤީޤަތްތައް ފުނޑުފުނޑުވެ، ވީރާނާވާ ގޮތަށް ކުރެވޭ ކޮންމެ ކަމަކީ ސީދާ ޤައުމާ ދެކޮޅަށް ކުރެވޭ ކަމެއްގެ ގޮތުގައި އެމަނިކުފާނު ސިފަކުރެއްވިއެވެ.
”މިކަންކަން އެބަކުރެވޭ. ކުރީގަވެސް ވަނީ ކުރެވިފަ. އެކަންކަން ކުރެވުނީމަ ލިބުނު ގެއްލުންތައް އަޅުގަނޑުމެނަށް އެނގޭ. އެހެންވީމަ އެކަންކަން އެހެން ވިޔަނުދިނުމަށްޓަކައި އަޅުގަނޑުމެން ކޮންމެ މީހަކުވެސް ހޭއަރާ ތިބެންޖެހޭނެ،“ ރައީސް ވިދާޅުވިއެވެ.
ރައީސުލްޖުމްހޫރިއްޔާ ވަނީ މާޒީގައި މިފަދަ ކަންކަމުގެ ސަބަބުން ޤައުމަށް ލިބިފައިވާ ގެއްލުންތަކުން ޢިބްރަތް ޙާޞިލުކޮށް، ދިވެހި ޤައުމިއްޔަތާއި އިސްލާމީ އުޞޫލުތައް ދެމެހެއްޓުމަށްޓަކައި ހުރިހާ ރައްޔިތުންވެސް ފާރަވެރިވެ، ޤައުމީ މަޞްލަޙަތު އިސްކުރުމަށް އިލްތިމާސްކުރައްވާފައެވެ.
