ދިވެހިރާއްޖޭގެ އިޤްތިޞާދީ ޙާލަތު ރަނގަޅުކުރުމަށާއި ބޭރު ފައިސާއާ ގުޅިފައިވާ މައްސަލަތައް ޙައްލުކުރުމަށް ސަރުކާރުން އަޅަމުންދާ ފިޔަވަޅުތަކަކީ ފަންނީ ދިރާސާތަކާއި ޙަޤީޤަތްތަކުގެ މައްޗަށް ބިނާކޮށް (ފެކްޓް ބޭސްޑްކޮށް) އަޅަމުންދާ ފިޔަވަޅުތަކެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ޕީއެސްއެމް ނިއުސްގެ ”ނޭޝަން ޗެޓް“ ޕްރޮގްރާމުގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، ސިޔާސީ ގޮތުން އެކި ފަރާތްތަކުން އެކި ވާހަކަތައް ދެއްކި ނަމަވެސް، ޤައުމުގެ އިޤްތިޞާދީ ޙާލަތު ރަނގަޅުކުރުމަށްޓަކައި އަޅަންޖެހޭ ފިޔަވަޅުތައް އަޅަންޖެހޭކަން ޢާންމު ރައްޔިތުން ޤަބޫލުކުރާ ކަމަށެވެ. އަދި ސަރުކާރުން އެއްވެސް ނިންމުމެއް ކުއްލިއަކަށް ނުނިންމާނެ ކަމުގެ ޔަޤީންކަން އެމަނިކުފާނު ދެއްވިއެވެ.
ރައީސް ވިދާޅުވީ، ޤާނޫނެއް ހެދިޔަސް ނުވަތަ ޤާނޫނަކަށް އިޞްލާޙެއް ގެނަޔަސް ސަރުކާރުން އެކަންކަން ކުރަނީ އެތައް މަހެއްގެ މަޝްވަރާއާއި، ޓެކްނިކަލް އިވެލުއޭޝަންތަކާއި ދިރާސާތަކުގެ އަލީގައި، ބޭރު ޤައުމުތަކުގައި މިފަދަ ކަންކަން ކޮށްފައި ހުންނަ ގޮތްތައް ވެސް ބަލައިގެން ކަމަށެވެ.
ރައީސް އިތުރަށް ފާހަގަކުރެއްވި ގޮތުގައި، ސަރުކާރުގައި މިފަދަ ޓެކްނިކަލް މަސައްކަތްތަކާ ޙަވާލުވެ ތިއްބެވީ ތަޢުލީމީ ގޮތުންނާއި، ފަންނީ ގޮތުން އަދި ތަޖުރިބާގެ ގޮތުން ވެސް ޤާބިލު ބޭފުޅުންނެވެ. އަދި ޤާނޫނުތަކާއި ޤަވާޢިދުތަކަށް ގެންނަ ކޮންމެ ބަދަލަކީ ވެސް ވަރަށް ހަރުދަނާ ނިޒާމެއްގެ ތެރެއިން ދިރާސާކުރެވިގެން ހުށަހެޅޭ ބަދަލުތަކެއް ކަމަށް އެމަނިކުފާނު ވިދާޅުވިއެވެ.
ޚާއްޞަކޮށް ރާއްޖެއަށް ދިމާވެފައިވާ ބޭރު ފައިސާގެ ދަތިކަމަށް ދާއިމީ ޙައްލެއް ހޯދުމަށް ސަރުކާރުން އަޅަމުންދާ ފިޔަވަޅުތަކާއި ގެންނަ އިޞްލާޙުތަކުގެ ސަބަބުން، އިޤްތިޞާދަށް ހެޔޮ ބަދަލުތަކެއް ފެނިގެންދާނެ ކަމުގެ ފުރިހަމަ ޔަޤީންކަން ރައީސުލްޖުމްހޫރިއްޔާ ވަނީ ދެއްވާފައެވެ.
