ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) ގެ މެންބަރު ކަމަށް ޝަމްއޫން ހަމީދު އައްޔަންކުރަން ރައްޔިތުންގެ މަޖިލީހުން މިއަދު ރުހުންދީފިއެވެ.
އެޗްއާރްސީއެމްގެ މެންބަރު ކަމަށް ޝަމްއޫން ހަމީދު އައްޔަންކުރުމަށް ރުހުންދީފައި މިވަނީ، މަޖިލީހުގެ ހިއުމަން ރައިޓްސް ކޮމިޓީގެ ރިޕޯޓަށް ބަހުސްކުރުމަށްފަހު، އޭނާއަށް ރުހުންދިނުމާ މެދު ގޮތެއް ނިންމުމަށް ނެގުނު ވޯޓުގައި ބައިވެރިވި 57 މެންބަރުންގެ އިއްތިފާގުންނެވެ.
އެޗްއާރްސީއެމްއަށް މެންބަރަކު އައްޔަންކުރަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަޖިލީހަށް ނަންތަކެއް ފޮނުއްވާފައިވަނީ، މިހާރު އެ މަގާމުގައި ހުންނެވި ސަމާއު އަޙުމަދު ނަޖީބުގެ މަގާމުގެ މުއްދަތު ހަމަވާތީއެވެ. ސަމާއުގެ މެންބަރުކަމުގެ މުއްދަތު ހަމަވާތީ އެ މަގާމަަށް ކުރިމަތިލާން ހުޅުވައިލުމުން ކުރިމަތިލެެއްވި ބޭފުޅުންގެ ތެރެއިން ޝަމްއޫނާއި ސަމާއުގެ ނަން މަޖިިލީހަށް ރައީސް ފޮނުއްވިއެވެ.
ހިއުމަން ރައިޓްސް ކޮމިޓީން އެ ދެ ބޭފުޅުންނާ އިންޓަވިއުކޮށް، އެކުލަވާލި ރިޕޯޓް މަޖިލީހުގެ މިއަދުގެ ޖަލްސާގައި ހުށަހަޅާފައިވާއިރު އެންމެ މަތިން މާކްސް ހޯދާފައިވަނީ ޝަމްއޫނެވެ. އޭނާއަށް 92 މާކްސް ލިބިފައިވާއިރު ސަމާއުއަށް ލިބިފައިވަނީ 86 މާކުހެވެ.
ފާހަގަކޮށްލަންޖެހޭ ގޮތުގައި ޝަމްއޫނަކީ ހެރިޓޭޖް މިނިސްޓްރީގެ ޕާމަނެންޓް ސެކްރެޓަރީ ކަމާއި އެޗްއާރްސީއެމްގެ ސެކްރެޓަރީ ޖެނެރަލްކަން ވެސް ކުރައްވާފައިވާ ބޭފުޅެކެވެ.
