ހުރިހާ ވާހަކައެއް ސިޔާސީ ނަޒަރަކުން ވިސްނައިގެން ދައްކަންވެއްޖެނަމަ، ރާއްޖޭގައި މީގެ ކުރިން ހިނގާފައިވާ ވައްކަމާ ގުޅުންހުރި މައްސަލަތައް ނުބެލޭނެ ކަމަށް ރައްޔިތުންގެ މަޖިލީހުގެ ފުނަދޫ ދާއިރާގެ މެންބަރު މުޙައްމަދު މަމްދޫހު ވިދާޅުވެއްޖެއެވެ.
މަމްދޫހު މި މޭރުމުން ވިދާޅުވީ، ރައްޔިތުންގެ މަޖިލީހުގެ މިއަދުގެ ޖަލްސާގައި، އައްޑޫ ސިޓީ ކައުންސިލް އިދާރާގެ ގިނަ އޮޑިޓް ރިޕޯޓުތަކެއް މާލިއްޔަތު ކޮމިޓީން ދިރާސާކޮށް ނިންމި ގޮތުގެ ރިޕޯޓަށް ބަހުސްކުރައްވަމުންނެވެ. މަމްދޫހު ވިދާޅުވީ، މަޖިލީހުގެ ތަޅުމަށް ރިޕޯޓުތައް ގެންނަނީ އެ ރިޕޯޓުތަކާ ގުޅިގެން ފުޅާ ދާއިރާއެއްގައި މަޝްވަރާކޮށް، ބަލަންޖެހޭ ކަންކަން ފުރިހަމައަށް ދިރާސާކުރުމަށްފަހުގައި ކަމަށެވެ.
އޮޑިޓަރ ޖެނެރަލްގެ އޮފީހުން ނެރޭ އޮޑިޓް ރިޕޯޓަކުން ނުވަތަ އެނޫންވެސް ގޮތަކުން ވައްކަމުގެ މައްސަލައެއް ފާހަގަވެގެން އެ މައްސަލައެއް ބަލާއިރު، އެއީ ކުރިއަށް އޮތް ރިޔާސީ އިންތިހާބަށް އަމާޒުކޮށްގެން ސިޔާސީ ކުރަންޖެހޭ ކަމެއް ނޫން ކަމަށްވެސް މަމްދޫހު ވަނީ ވިދާޅުވެފައެވެ.
”ވައްކަން ބެލުމަކީ، ނޫނީ ވައްކަމެއް ކޮށްފައިވެއްޖެއްޔާ ނޫނީ އޮޑިޓް ރިޕޯޓަކުން ކަމެއް ފާހަގަކުރެވިފައި އޮތީމާ އެކަން ބެލުމަކީ އެއީ އަންނަން އޮތް ރިޔާސީ އިންތިހާބާ ހިސާބަށް ސިޔާސީކޮށް އެ ވާހަކަ ދައްކަންޖެހޭ ކަމެއް ނޫން. އެކަހަލަ އެއްވެސް އަސާސެއްގެ މައްޗަކަށް ނޫން އަޅުގަނޑުމެން ކޮމެޓީތަކުގައި ނޫނީ މަޖިލީހުގައި މަސައްކަތްތައް ކުރިއަށް ގެންދަނީ. އެހެންވީމަ ކޮންމެ ކަމެއް ސިޔާސީކޮށް ވިސްނައިގެން ނޫނީ ސިޔާސީކޮށް އެ ވާހަކަ ދައްކަންވެއްޖިއްޔާ އަޅުގަނޑުމެނަށް މި ރާއްޖޭގައި ބެލޭނެ އެއްވެސް ވައްކަމެއް ނޯންނާނެ.“ – މަމްދޫހު ވިދާޅުވިއެވެ.
ރައްޔިތުންގެ މަޖިލީހުގެ ކޮމިޓީތަކުން ކަންކަން ބަލަނީ ސިޔާސީ ގޮތުން ބަލައިގެން ނޫންކަން ފާހަގަކުރައްވަމުން މަމްދޫހު ވިދާޅުވީ، އެއްވެސް ފަރާތަކުން ގޯހެއް ހަދާފައިވާނަމަ އެކަމުގެ ޒިންމާ ކޮންމެވެސް ބަޔަކަށް ރައްދުވާނެ ކަމަށެވެ. އަދި ވައްކަމާ ގުޅުންހުރި މިފަދަ މައްސަލަތައް ބަލަނީ އެއީ ކާކަށްތޯ ބަލައިގެން ނޫން ކަމަށްވެސް އޭނާ ވަނީ ވިދާޅުވެފައެވެ.
މާލިއްޔަތު ކޮމިޓީއަށް ހުށަހެޅޭ ކަންކަން ބަލަމުންދަނީ ވަކި އުސޫލުތަކެއްގެ ތެރެއިން ކަމަށްވާއިރު، ވައްކަމާ ގުޅުންހުރި މައްސަލަތައް ބަލަންފެށުމުން އެކަންކަމާ ދެކޮޅަށް މަޖިލިސް މެންބަރުން މަސައްކަތްކުރަމުން އަންނާތީ އެއީ ވަރަށް ދެރަކަމެއް ކަމަށް މަމްދޫހު ވިދާޅުވިއެވެ. އަދި ހަމައެހެންމެ، މާލިއްޔަތު ކޮމިޓީއަށް ހުށަހެޅޭ ކަންކަން ބަލަނީ ހަމަޖެހިފައިވާ ވަކި އުސޫލެއްގެ ތެރެއިން ކަމަށް ވެސް އޭނާ އިތުރަށް ވިދާޅުވިއެވެ،
