ރ. މާކުރަތު ބަނދަރުގެ ޖާގަ ތަނަވަސްކޮށް، ދަތުރުފަތުރަށް ލުއިފަސޭހަކަން ގެނެސްދިނުމުގެ ގޮތުން ކުރިއަށްގެންދާ ބަނދަރު ބޮޑުކުރުމުގެ މަޝްރޫޢުގެ 63 އިންސައްތަ މަސައްކަތް މިހާރު ނިމިފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހާމަކޮށްފިއެވެ.
މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ (ބިނާރާއި، ގެދޮރުވެރިކަމާއި، އުމްރާނީ ތަރައްގީއާއި ބެހޭ ވުޒާރާ) އިން 26.67 މިލިއަން ރުފިޔާއަށް އެމްޓީސީސީއާ މި މަސައްކަތް ހަވާލުކޮށްފައިވަނީ 2022 ވަނަ އަހަރުގެ ޖަނަވަރީ މަހުގެ ތެރޭގައެވެ. އަދި މި މަޝްރޫޢުގެ ޢަމަލީ މަސައްކަތް ފަށާފައިވަނީ އެ އަހަރުގެ މެއި މަހުގައެވެ.
އެ ވުޒާރާއިން މަޢުލޫމާތު ދެއްވާ ގޮތުގައި، މަޝްރޫޢުގެ ބޮޑުބައެއް މިހާރު ފުރިހަމަކުރެވިފައިވާއިރު، މިހާރު އެންމެ ހަލުވިކަމާއެކު ކުރިއަށްދަނީ ބޭރުތޮށި ލުމުގެ މަސައްކަތެވެ.
މި މަޝްރޫޢަކީ މާކުރަތުގެ ބަނދަރުގެ ޖާގަ ތަނަވަސްކުރުމުގެ އިތުރުން ރަށުގެ ގިރާ ސަރަޙައްދުތައް ހިމާޔަތްކުރުމަށް ފަރުމާކޮށްފައިވާ މުހިންމު މަޝްރޫޢެކެވެ. އެގޮތުން، ބަނދަރާއި ފަޅު ފުންކުރުމަށްޓަކައި 39,658.55 ކިއުބިކް މީޓަރުގެ ސަރަޙައްދެއް ކޮނުމާއި، ގިރާ ސަރަޙައްދު ހިމާޔަތްކުރުމަށް 451 މީޓަރުގެ ސަރަޙައްދެއްގައި ބޮޑުހިލަ ޖެހުން ހިމެނެއެވެ.
މީގެއިތުރުން، އުޅަނދުފަހަރު ކައިރިކުރުމަށް 150 މީޓަރުގެ ޕްރީކާސްޓް އެލް-ބްލޮކް އެއްގަމުތޮއްޓަކާއި، 125 މީޓަރުގެ ޖެޓީއެއް ހެދުމަށް ވަނީ ހަމަޖެހިފައެވެ. އަދި 1,962.18 އަކަމީޓަރުގެ ސަރަޙައްދެއްގައި ގައު އަތުރައި ޕޭވްމަންޓް ހެދުމާއި، ރިވެޓްމަންޓް އަދި ގްރޮއިން ޖެހުމުގެ މަސައްކަތްވެސް މި މަޝްރޫޢުގެ ދަށުން ކުރިއަށްދާނެއެވެ. ހަމައެއާއެކު، ރޭގަނޑުގެ ވަގުތުތަކުގައި ކަނޑު އުޅަނދުފަހަރަށް ރައްކާތެރިކަމާއެކު ފަޅަށް ވަދެނިކުމެ ހެދުމަށް މަގުދައްކައިދޭ ނެވިގޭޝަން ލައިޓުތައް ބެހެއްޓުމާއި، ނެވިގޭޝަން ނިޒާމު ޤާއިމުކުރުމަށްވެސް ވަނީ ހަމަޖެހިފައެވެ.
މި މަޝްރޫޢު އެއްކޮށް ނިމި ބޭނުންކުރަން ފެށުމުން، މާކުރަތު ރައްޔިތުންނަށާއި އެ ރަށަށް ދަތުރުކުރާ ފަރާތްތަކަށް ބަނދަރުގެ ދަތިކަމަށް ދާއިމީ ޙައްލެއް ލިބި، ރަށުގެ އިޤްތިޞާދީ އަދި އިޖުތިމާޢީ ދަތުރުފަތުރަށް ބޮޑު ލުޔެއް ލިބިގެންދާނެއެވެ.
