ގެދޮރު އިމާރާތްކުރުމަށް ބޭނުންވާ ފަރާތްތަކަށް މާލީ އެހީތެރިކަން ފޯރުކޮށްދިނުމަށް މި ސަރުކާރުން ތައާރަފްކޮށްފައިވާ ”ހިޔާވެހި ފައިނޭންސިންގ ސްކީމް“ ގެ ދަށުން މިހާތަށް 244 ފަރާތަކަށް ލޯނު ދޫކޮށްފައިވާ ކަމަށް ހައުސިންގ މިނިސްޓްރީން ބުނެފިއެވެ.
ދައުލަތުގެ މީޑިއާގެ ޕްރޮގްރާމަކަށް ދެއްވި އިންޓަރވިއުއެއްގައި ހައުސިންގ މިނިސްޓްރީގެ ސްޓޭޓް މިނިސްޓަރު އަޙުމަދު ނާޒިމް މުޙައްމަދު ވިދާޅުވީ، މި ސްކީމްގެ ފުރަތަމަ ބުރުގެ ދަށުން 891 ފަރާތަކަށް މާލީ އެހީތެރިކަން ފޯރުކޮށްދިނުމަށް ނިންމާފައިވާ ކަމަށެވެ. އޭގެ ތެރެއިން މިހާތަނަށް ލޯނު ދޫކުރެވުނު މީހުންގެ އަދަދު 244 އަރާފައިވާއިރު، ޝަރުތު ހަމަވާ 629 މީހަކަށް ލޯނު ހަމަޖެއްސުމާ ގުޅޭ އެންމެފަހުގެ މަސައްކަތްތައް ކުރެވެމުންދާ ކަމަށް އޭނާ ވިދާޅުވިއެވެ.
އަދި މިހާތަނަށް ފައިސާ ދޫނުކުރެވިވާ ފަރާތްތަކަށް ކުރިއަށް އޮތް މަހެއްހައި ދުވަހުގެ ތެރޭގައި ފައިސާ ދޫކުރުމުގެ މަސައްކަތްތައް ކުރިއަށްދާ ކަމަށްވެސް ނާޒިމް ވަނީ ވިދާޅުވެފައެވެ.
”ޕްރޮގްރާމަށް ހޮވި، ފައިސާ މިހާތަނަށް ދޫނުކޮށް މިވާ 629 މީހުންނަށް ވެސް ކުރިއަށް އޮތް މަހެއްހައި ދުވަހުގެ ތެރޭގައި ފައިސާ ދޫކުރުމަށް މިދަނީ މަސައްކަތް ކުރަމުން. އަމާޒަކީ، އަހަރު ނިމުމުގެ ކުރިން މުޅި ސްކީމަށް ހޮވުނު 891 މީހުންނަށް ފައިސާ ދޫކޮށް އެއްކޮށް ނިންމާލުން،“ – ނާޒިމް ވިދާޅުވިއެވެ.
ލޯނު ދޫކުރުމުގެ މަސައްކަތްތައް ލަސްވި މައިގަނޑު ސަބަބެއް ކަމަށް ނާޒިމް ވިދާޅުވެފައިވަނީ، ކަނޑައެޅިފައިވާ އުސޫލުތައް ފުރިހަމަކުރުމަށް ދިގު މުއްދަތެއް ހޭދަވުމުން ކަމަށެވެ. އެގޮތުން، ގޭގެ ޕްލޭން ކުރަހާއިރު ކޮމާޝަލް މަސައްކަތަށް ހާއްސަކުރެވެނީ ގޭގެ އިންސައްތަ ކަމަށް އުސޫލުގައި ބަޔާންކޮށްފައި އޮތް ނަމަވެސް، ބައެއް ފަރާތްތަކުން އެއަށްވުރެ ބޮޑުކޮށް ހުށަހެޅުމާއި، ގޭގެ ބީއޯކިއު އަގު ލޯނުގެ މިންވަރަށްވުރެ ބޮޑުވުން ފަދަ މައްސަލަތައް ފާހަގަކުރެވުނު ކަމަށް އޭނާ ވިދާޅުވިއެވެ. މިކަންކަން އިސްލާހުކުރުމަށްޓަކައި އެޕްލިކަންޓުންނާއި، ބޭންކުތަކުގެ އިތުރުން ހައުސިންގ މިނިސްޓްރީއާ ދެމެދު ގިނަ މަސައްކަތްތަކެއް ކުރެވުނު ކަމަށް ނާޒިމް ވަނީ ވިދާޅުވެފައެވެ.
މި ސްކީމްގެ ދަށުން އަހަރެއްގެ މައްޗަށް ޖުމްލަ ދެ ބިލިއަން ރުފިޔާ ދޫކުރުމަށް ވަނީ ހަމަޖެހިފައެވެ. މީގެ ތެރެއިން އެއް ބިލިއަން ރުފިޔާއަކީ ސަރުކާރުގެ ބަޖެޓުން ދޫކުރާ ފައިސާ ކަމަށްވާއިރު އަނެއް އެއް ބިލިއަން ރުފިޔާއަކީ ބޭންކުތައް މެދުވެރިކޮށް ދޫކުރާ ފައިސާކަން ފާހަގަކޮށްލަންޖެހެއެވެ. މިއީ އިސްލާމީ އުސޫލުން ފަސް އިންސައްތަ ފައިދާގައި، އަނބުރާ ދެއްކުމަށް 25 އަހަރުގެ މުއްދަތެއް ލިބޭ ގޮތަށް ކުރިއަށްގެންދާ ފައިނޭންސިންގ ސްކީމެކެވެ.
