އިންފޮމޭޝަން ކޮމިޝަނަރުގެ މަގާމަށް، ކުރިން ވެސް އެ މަގާމު ފުރުއްވާފައިވާ ޢަބްދުލްޢަޒީޒު ޖަމާލް އަބޫބަކުރު އައްޔަންކުރުމަށް ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން ފާސްކޮށްފިއެވެ.
އިންފޮމޭޝަން ކޮމިޝަނަރުގެ މަގާމަށް ޢަބްދުލްޢަޒީޒު އައްޔަންކުރެއްވުމަށް އެދިވަޑައިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރައްޔިތުންގެ މަޖިލީހަށް ނަން ފޮނުއްވާފައިވަނީ މި މަހުގެ 23 ވަނަ ދުވަހުއެވެ. އޭނާއަށް ރުހުންދިނުމަށް މިނިވަން މުއައްސަސާތަކާ ބެހޭ ކޮމިޓީން ނިންމީ، އިންޓަވިއުއިން 75 އިންސައްތައަށްވުރެ މަތިން މާކްސް ހާސިލްކުރައްވާފައިވާތީ، ކޮމިޓީގައި ތިއްބަވާ މެޖޯރިޓީ މެންބަރުންގެ ތާއީދާއެކުގައެވެ.
އިންފޮރމޭޝަން ކޮމިޝަނަރު ކަމުގެ މަގާމަށް ބޭފުޅަކު އައްޔަންކުރަން ހުޅުވާލާފައިވަނީ، އެ މަގާމުގައި މިހާރު ހުންނެވި އާހިދު ރަޝީދުގެ ދައުރު އަންނަ ސެޕްޓެމްބަރު މަހުގެ 6 ވަނަ ދުވަހަށް ހަމަވާތީއެވެ. އޭނާ އެ މަގާމަށް އައްޔަނުކޮށްފައިވަނީ 2021 ވަނަ އަހަރުގެ ސެޕްޓެމްބަރު މަހުގެ 6 ވަނަ ދުވަހުގައެވެ.
މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އުފައްދާފައިވާ އިންފޮރމޭޝަން ކޮމިޝަނަރުގެ މަގާމު އެންމެ ފުރަތަމަ ފުރުއްވި ބޭފުޅަކީ ޢަބްދުލްޢަޒީޒް ޖަމާލް އަބޫބަކުރެވެ. އެގޮތުން 22 ޖުލައި 2014 އިން ފެށިގެން 22 ޖުލައި 2019 ގެ ނިޔަލަށް އޭނާ ވަނީ އިންފޮމޭޝަން ކޮމިޝަނަރުގެ މަގާމު ފުރިހަމަ ކުރައްވައިފައެވެ. ހަމައެހެންމެ، ޢަބްދުލްޢަޒީޒަކީ 17 ވަނަ ރައްޔިތުންގެ މަޖިލީހުގައި، މައުލޫމާތު ހޯދައި ލިބިގަތުމުގެ ހައްގުގެ ގާނޫނު އެކުލަވަައިލުމުގެ މަސައްކަތުގައި ވެސް އިސް ދައުރެއް އިސްދައުރެއް އަދާކުރެއްވުމުގެ އިތުރުން ދިވެހި ބަހުގެ ދާއިރާއަށް ގިނަގުނަ ހިދުމަތްތަކެއް ކޮށްދެއްވާފައިވާ ބޭފުޅެއްކަން ފާހަގަކޮށްލަންޖެހެއެވެ. އޭނާ މިހާރު ހުންނެވީ ހެރިޓޭޖް މިނިސްޓްރީގެ ސްޓޭޓް މިނިސްޓަރުގެ މަގާމުގައެވެ.
އިންފޮމޭޝަން ކޮމިޝަނަރަކީ މައުލޫމާތު ހޯދައި ލިބިގަތުމުގެ ހައްގުގެ ގާނޫނާއި ގުޅުންހުރި އެހެނިހެން ގާނޫނުތަކުގެ ދަށުން މަތިކޮށްފައިވާ ވާޖިބުތައް އަދާކުރުމުގައި ސީދާ ރައްޔިތުންގެ މަޖިލީހަށް ޖަވާބުދާރީވާންޖެހޭ މިނިވަން މުސްތަގިއްލު މަގާމެކެވެ.
