އައްޑޫ ސިޓީ ފޭދޫ ސްކޫލްގައި ކުރިއަށް ގެންދިޔަ ބޭސިކް ކެޑޭޓް ކޭމްޕެއްގައި ބައިވެރިވި 31 ދަރިވަރަކު ކާނާ ވިހަވެ, ބައެއް ކުދިންގެ ހާލު ދެރަވުމާ ގުޅިގެން އެ ސިޓީގެ ހޮސްޕިޓަލުތަކުގައި ފަރުވާދޭން ފަށައިފިއެވެ.
އެގޮތުން ބަނޑުގައި ރިއްސުމާއި، ބޭރަށް ހިންގުމާއި، ހޮޑުލެވުން ފަދަ އަލާމާތްތައް ފެނިގެން، ފޭދޫ ސިއްހީ މަރުކަޒުގައި 12 ދަރިވަރުން މަރަދޫ ސިއްހީ މަރުކަޒުގައި 12 ދަރިވަރުންގެ އިތުރުން އައްޑޫ އެކުއަޓޯރިއަލް ހޮސްޕިޓަލުގައި 7 ދަރިވަރަކަށް އަންނަނީ ފަރުވާ ދެމުންނެވެ. އެޑްމިޓްކޮށްގެން ފަރުވާދެމުން އައި ނަމަވެސް އެ ކުދިން ކާނާ ވިހަވީ ކޮންކަހަލަ ކާނާއަކަށް ކަމެއް އަދި ސާފެއް ނުވެއެވެ. އަދި ކޭމްޕަށް ކެއުން ފޯރުކޮށްދިން އެއްވެސް ފަރާތެއްގެ މައުލޫމާތެއް ވެސް މިހާތަނަށް ސާފެއް ނުވެއެވެ.
މި މައްސަލައާ ގުޅިގެން ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން މީސް މީޑިއާގައި ހިއްސާކުރި ޕޯސްޓެއްގައި ބުނެފައިވަނީ, އައްޑޫ ސިޓީ ބޭސިކް ކެޑޭޓް ކޭމްޕުގައި ބައިވެރިވި ދަރިވަރުން ކާނާ ވިހަވެ ބައެއް ކުދިން ހާލުދެރަވެ ހޮސްޕިޓަލުގައި އެޑްމިޓްކުރަންޖެހުމަކީ އެ ކޮމިޝަނުން ނުހަނު ކަންބޮޑުވާ ކަމެއް ކަމަށެވެ. އަދި އެ ކޮމިޝަނުން މައްސަލަ މޮނިޓަރކުރަމުންދާ ކަމަށް ވަނީ ބުނެފައެވެ.
އައްޑޫ ސިޓީ ބޭސިކް ކެޑޭޓް ކޭމްޕުގައި ބައިވެރިވި ދަރިވަރުން ކާނާ ވިހަވެ ބައެއް ކުދިން ހާލުދެރަވެ ހޮސްޕިޓަލުގައި އެނދުމަތިކުރަންޖެހުމަކީ މިކޮމިޝަނުން ނުހަނު ކަންބޮޑުވާ ކަމެކެވެ. ކޮމިޝަނުން މިގެންދަނީ މި މައްސަލަ މޮނިޓަރކުރަމުންނެވެ.
މިކަން ހިގާދިޔަ ގޮތް ޙައްސާސް މައްސަލައެއްގެ…
— HRC of the Maldives (@hrcmv) August 24, 2026
މި މައްސަލަ ހިނގާދިޔަ ގޮތް ހައްސާސް މައްސަލައެއްގެ ގޮތުގައި ތަހުގީގުކޮށް، މި ބާވަތުގެ ކަންކަން ތަކުރާރު ނުވާނޭ ގޮތެއްގެ މަތިން ކަންކަން ބައްޓަންކޮށް ބަލަހައްޓަމުން ގެންދިއުމަށް އެ ކޮމިޝަނުން ވަނީ ކަމާބެހޭ އިދާރާތަކަށް ގޮވާލައިފައެވެ.
މި ހަފުތާ އާދިއްތަ އަދި ހޯމަ ދުވަހަކީ ގިނަ ސްކޫތަކެއްގައި ސްކައުޓާއި، ގާލްގައިޑް އަދި ކެޑޭޓް ކުދިންނަށް ހާއްސަކޮށްގެން ކޭމްޕްތައް ކުރިއަށްގެންދާ ދުވަސްތަކެއްކަން ފާހަގަކޮށްލަންޖެހެއެވެ.
