އެފްއޭއެމް ފުޓްސަލް އެޓޯލް ޗެމްޕިއަންޝިޕުގައި ހދ. އަތޮޅުގެ ޗެމްޕިއަންކަން ހަނިމާދޫ ޓީމުން ކާމިޔާބުކޮށްފިއެވެ. ހަނިމާދޫން މި ތަށި އުފުލައިލީ ފައިނަލް މެޗުގައި 0-2 ގެ ނަތީޖާއަކުން ނައިވާދޫ ބަލިކުރުމަށްފަހުގައެވެ.
ނޮޅިވަރަންފަރު ފުޓްސަލް ދަނޑުގައި ކުޅުނު ފޯރިގަދަ ފައިނަލް މެޗުގައި ހަނިމާދޫން ކާމިޔާބުކުރި ދެ ލަނޑުވެސް ފެނިގެންދިޔައީ މެޗުގެ ފުރަތަމަ ހާފުގައެވެ. އެގޮތުން މެޗުގެ 10 ވަނަ މިނެޓުގައި ހަނިމާދޫއަށް ލީޑު ނަގައިދިނީ ނޫރުﷲ ޠާޙާއެވެ. އަދި ފުރަތަމަ ހާފު ނިމެން މިނެޓަކަށް ވެފައިވަނިކޮށް، 19 ވަނަ މިނެޓުގައި އެޓީމުގެ ދެވަނަ ލަނޑު ޖަހައިދިނީ މުޙައްމަދު ޚާލިދެވެ.
މެޗުގެ ދެވަނަ ހާފުގައި ނައިވާދޫން ކުޅުން ރަނގަޅުކޮށް ލަނޑެއް ޖެހުމަށް ގިނަ މަސައްކަތްތަކެއް ކުރިއެވެ. މިގޮތުން މެޗުގެ 38 ވަނަ މިނެޓުގައި އެޓީމަށް ޕެނަލްޓީއެއް ލިބުނު ނަމަވެސް، މުޙައްމަދު ޝާއިން ފޮނުވާލި އެ ޕެނަލްޓީ ކާމިޔާބުވާގޮތެއް ނުވިއެވެ. މި ފައިނަލް މެޗުގެ މޮޅު ކުޅުންތެރިޔާގެ މަގާމު ހޯދީ ހަނިމާދޫ ޓީމުގެ އަބްދުﷲ މުޙައްމަދެވެ.
ހދ. އަތޮޅުން ޖުމްލަ 6 ޓީމު ވާދަކުރި މި މުބާރާތް ކުރިއަށްދިޔައީ ދެ ގްރޫޕަކަށް ބަހާލައިގެންނެވެ. ޗެމްޕިއަން ހަނިމާދޫ ގްރޫޕް ’އޭ‘ ގައި ވާދަކުރީ ނޮޅިވަރަންފަރާއި ކުމުންދޫއާ ދެކޮޅަށެވެ. އަދި ރަނަރަޕް ނައިވާދޫ ގްރޫޕް ’ބީ‘ ގައި ހިމެނުނީ ނޭކުރެންދޫ އަދި ކުރިނބީއާ އެކުގައެވެ.
މުޅި މުބާރާތުގައިވެސް މޮޅު ކުޅުމެއް ދެއްކި ހަނިމާދޫ ޓީމުން މުބާރާތުގެ ތަށި ހޯދީ ގްރޫޕް ސްޓޭޖުގެ ދެ މެޗާއި، ސެމީ ފައިނަލް އަދި ފައިނަލް މެޗާއެކު ޖުމްލަ 4 މެޗު ކުޅެ، 8 ލަނޑު ޖަހައިގެންނެވެ. މުޅި މުބާރާތުގައިވެސް އެޓީމުގެ ކޮޅަށް ވަދެފައިވަނީ އެންމެ 3 ލަނޑެވެ.
