ޕްލާސްޓިކް ކޮތަޅުން ނަގާ ފީއަށް ލުއި ލިބޭގޮތަށް ކުނި މެނޭޖުކުރުމުގެ ޤާނޫނަށް ގެނެވުނު އިސްލާޙުގެ ބިލު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަސްދީޤުކުރައްވައިފިއެވެ.
ރައްޔިތުންގެ މަޖިލީހުން މި ބިލު ފާސްކޮށްފައިވަނީ 17 އޮގަސްޓު 2026 ގައެވެ.
މި ބިލާއެކު ކުނި މެނޭޖުކުރާ ނިޒާމުތަކާއި މަރުކަޒުތައް ޤާއިމުކުރުމާއި، އެ މަރުކަޒުތަކުގައި ހުންނަންޖެހޭ މިންގަނޑުތަކާއި، ރައްކައުތެރިކަމާއެކު ކުނި ނައްތައިލުމާ ގުޅޭ އުސޫލުތަކަށް މުހިންމު ބަދަލުތަކެއް އަންނާނެއެވެ.
ކުނި މެނޭޖްކުރުމަށް ގެންގުޅޭ ވަޞީލަތްތަކާ ގުޅުންހުރި މިންގަނޑުތައް ކަނޑައެޅުމުގައި ޤާނޫނު ތަންފީޒު ކުރާ ވުޒާރާއާއި، ޔުޓިލިޓީ ރެގިއުލޭޓަރީ އޮތޯރިޓީ އަދި އެންވަޔަރަންމަންޓަލް ރެގިއުލެޓަރީ އޮތޯރިޓީގެ މަސްއޫލިއްޔަތުތަކަށް މި އިސްލާޙުގެ ދަށުން ބަދަލުތައް ގެނެވިފައިވެއެވެ.
މި ޤާނޫނަށް ޢަމަލުކުރަން ފަށާ ތާރީޚުން ފެށިގެން 30 ދުވަހުގެ ތެރޭގައި، ޤާނޫނުގެ ދަށުން އެކުލަވާލަންޖެހޭ ގަވާއިދުތައް ހަދައި ދިވެހި ސަރުކާރުގެ ގެޒެޓުގައި ޝާއިޢުކުރަންވާނެ ކަމަށް ބިލުގައި ބަޔާންކޮށްފައިވެއެވެ.
ވިޔަފާރި ތަންތަނުން ކަސްޓަމަރުންނަށް ފޯރުކޮށްދޭ ޕްލާސްޓިކް ކޮތަޅުން ނަގާ ދެ ރުފިޔާގެ ފީ، ފަންސާސް ކޮތަޅަށް ވުރެ ގިނަ އަދަދެއްގެ ޕްލާސްޓިކު ކޮތަޅު ހިމެނޭ ކޮތަޅު ބޮނޑިއަކަށް އޭގެ ސަބަބުން އިސްތިސްނާ ވެގެންދާނެއެވެ. މި ބަދަލާއެކު ކުރިން ދިމާވަމުންދިޔަ ޑަބަލް ޓެކްސް ނުވަތަ އެއްފަހަރަށްވުރެ ގިނައިން ފީ ނެގޭ މައްސަލައަށް ހައްލު ލިބިގެންދާނެއެވެ.
ކުނި މެނޭޖްކުރުމުގެ ޤާނޫނު ތަންފީޒުކުރާ އިދާރާތަކުގެ ދައުރު ސާފުކޮށްދީ، މި މަސައްކަތް ދެމެހެއްޓެނެވި ގޮތެއްގައި ކުރިއަށް ގެންދިއުމަށް މި ބިލު މަގުފަހިކޮށްދޭނެއެވެ. އަދި ރާއްޖެއަށް ކުނި އެތެރެކުރުން މަނާކުރުމާއި، ޤާނޫނު ތަންފީޒުކުރުމުގައި ދިމާވާ ގޮންޖެހުންތަކަށް ހައްލު ހޯދުން ވެސް މި ބިލުގެ މައިގަނޑު މަޤްޞަދުތަކުގެ ތެރޭގައި ހިމެނެއެވެ.
އިޤްތިޞާދީ އަދި ސިނާއީ މަސައްކަތްތައް ކުރާ ތަންތަނުގައި ކުނި މެނޭޖްކުރުމުގެ ސިޔާސަތު އެކުލަވާލުމާއި، ޤައުމީ މާސްޓަރ ޕްލޭނާ އެއްގޮތަށް ކުނި މެނޭޖްކުރުމުގެ ކަންކަން ރޭވުމަށް ބިލުގައި ބާރުއަޅާފައިވެއެވެ.
ދިވެހިރާއްޖޭގައި ކުނި މެނޭޖުކުރުމުގެ ޤާނޫނަށް އަމަލުކުރަން ފަށާފައިވަނީ ދާދި ފަހުގެ މާޒީއެއްގައެވެ. މި ޤާނޫނުގެ މައިގަނޑު ބޭނުމަކީ ތިމާވެށްޓާއި އާންމު ޞިއްޙަތު ރައްކާތެރިކުރުމަށްޓަކައި ދެމެހެއްޓެނެވި ގޮތެއްގައި ކުނި މެނޭޖުކުރުމުގެ ނިޒާމެއް ޤާއިމުކުރުމެވެ.
