އެމެރިކާއާއެކު ހިނގަމުންދާ ހަނގުރާމަ ސިޔާސީ ހައްލަކުން ނިންމާލުމަށް އީރާނުގެ ރައީސް މަސްޢޫދު ޕެޒެޝްކިއަން ގޮވާލައިފިއެވެ. އޭނާ ބުނީ އީރާން ”ބާރާއި އަބުރުވެރިކަމުގެ މަޤާމެއްގައި“ އޮއްވައި ހަނގުރާމަ ނިންމާލުމަކީ އެންމެ ބުއްދިވެރި ގޮތް ކަމަށެވެ. ތެހެރާންގައި ބޭއްވުނު ބައްދަލުވުމެއްގައި ވާހަކަދައްކަވަމުން ރައީސް ޕެޒެޝްކިއަން ބުނީ، އީރާނުން ސުލްޙައަށް އެދުމަކީ އަމާންދިނުން ނޫން ކަމަށާއި، އެމެރިކާއިން އިތުރު ޙަމަލާއެއް ދީފިނަމަ އީރާނުގެ އަސްކަރިއްޔާއިން ”ވަރުގަދަ އަދި ބިރުވެރި“ ރައްދެއް ދިނުމަށް ފުރިހަމައަށް ތައްޔާރަށް އޮތް ކަމަށެވެ.
ޖޫން މަހު އެމެރިކާއާއެކު ވެވުނު އެމްއޯޔޫ އަށް އިޝާރާތްކޮށް ރައީސް ބުނީ، އެ އެއްބަސްވުމުގައި އީރާން އަމާންދިން ކަމުގެ އެއްވެސް މާއްދާއެއް ނޯންނާނެ ކަމަށެވެ. ހަނގުރާމަ ނިންމާލުމަށް ރައީސް ބާރުއަޅަނީ، އެމެރިކާގެ ބްލޮކޭޑާއި ދަތިކުރުމުގެ ފިޔަވަޅުތަކުގެ ސަބަބުން އީރާނުގެ އިޤްތިޞާދަށާއި ފައިސާގެ އަގަށް ބޮޑެތި ލޮޅުންތަކެއް އަރަމުންދާ ދަނޑިވަޅެއްގައެވެ. އީރާނުގެ ސިފައިންނާއި ކޮމާންޑަރުން ޤައުމު ދިފާއުކުރުމަށް ތިބީ ފުރިހަމައަށް ތައްޔާރަށް ކަމަށްވެސް އޭނާ ބުންޏެވެ.
