ރަށު ކައުންސިލްތަކާއި ސިޓީ ކައުންސިލްތަކުގެ އިހުތިސޯސްގެ ދަށުގައި ހުރި ބިންތައް ސަރުކާރާ ހަވާލުކުރުމަށް އެއްބަސްނުވެ، އެ ބިންތައް ދިގު މުއްދަތަކަށް އިންވެސްޓަރުންނަށް ދޫކޮށްލުމަށް ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ގޮވައިލައްވައިފިއެވެ. އެ މަނިކުފާނު މިކަމަށް ގޮވައިލެއްވީ ސަރުކާރުން ރަށްރަށުގައި ހިންގަން ރާވާފައިވާ ތަރައްޤީގެ މަޝްރޫޢުތަކަށް ސިޔާސީ ގޮތުން ހުރަސްއެޅޭ ފަދަ މޭރުމަކުންނެވެ.
ކުރީގެ ރައީސް ޔާމީން މިފަދައިން ވިދާޅުވީ، ގދ. ތިނަދޫ ދެވަނަ ފަހަރަށް އާބާދުވީތާ 60 އަހަރު ފުރުން ފާހަގަކުރުމުގެ ގޮތުން ރޭ ބޭއްވި ޚާއްޞަ ޖަލްސާގައި ވާހަކަފުޅު ދައްކަވަމުންނެވެ.
ކައުންސިލްތަކުގެ ބިންތަކާއި ފަޅުތައް، ސަރުކާރުގެ ބޭނުމަށް ނެގޭގޮތަށް ލާމަރުކަޒީ ޤާނޫނު އިސްލާހު ކުރުމަށް ރައްޔިތުންގެ މަޖިލީހަށް އަމިއްލަ މެންބަރަކު ވަނީ ބިލެއް ހުށަހަޅުއްވާފައެވެ. އެ ބިލާ ގުޅޭގޮތުން ވާހަކަދައްކަވަމުން ޔާމީން ސިފަކުރެއްވީ އެއީ ރައްޔިތުންގެ ބިން ”ފޭރުމުގެ“ ޢަމަލެއްގެ ގޮތުގައެވެ. އަދި އެކަމާ ދެކޮޅަށް ކައުންސިލްތަކުން ބަޔާންތައް ނެރެ އިހުތިޖާޖު ކުރުމަށް ހިތްވަރު ދެއްވައި، އެއީ ޤައުމީ ފެންވަރުގެ ޖިހާދެއްގެ ގޮތުގައި ވެސް އެ މަނިކުފާނު ސިފަކުރެއްވިއެވެ.
”މި ރަށްރަށުން ތިބޭފުޅުންގެ އިހުތިސޯސްގެ ތެރެއިން ތިބޭފުޅުންގެ ބިން އަތުލާފައި ސަރުކާރުން ބޭނުން ކަމަކަށް ބިން އަތުލަން މި އުޅެނީ ކޮން ކަމެއްގައިކަން ވެސް ނޭނގެ. ނަގަނީ ކޮން ބޭނުމެއްގައިކަން ނޭނގެ. ބިން ނަގަންޏާ އެއީ މައްސަލައެއް،“ ޔާމީން ވިދާޅުވިއެވެ.
ރައީސް ޑރ. މުޙައްމަދު މުޢިއްޒުގެ ސަރުކާރުން ރަށްރަށުގެ ތަރައްޤީއަށް ބިން ބޭނުންކުރުމަށް ހުރަސްއަޅުއްވަމުން، ޔާމީން ވަނީ ރަށްރަށުގައި ނުލިބި ހުރި ޚިދުމަތްތައް ޤާއިމުކުރުމަށްޓަކައި ބޭރުގެ ފަރާތްތައް ވެސް ހިމެނޭހެން އިންވެސްޓަރުންނަށް ބިން ހުޅުވައިލުމަށް ބާރުއަޅުއްވާފައެވެ.
”އެ މީހުން މި ރަށުގައި ކުއަލިޓީ އެޑިއުކޭޝަން ދޭ ކޮލެޖެއް އެޅުމަށް ފަހު ރާއްޖެ ދޫކޮށް ދާއިރު ލަގެޖަށް އެ ތަން ލައިގެނެއް ނުދެވޭނެ. އެ ތަން ހުންނާނެ ދިގު މުއްދަތަކަށް ފަހު މި ރަށުގެ ރައްޔިތުންނަށް މި ރަށުގެ ތަރިކައެއްގެ ގޮތުގައި. އެމީހުން ގެނެސްގެން، އެމީހުންގެ ފައިސާ ބޭނުންކޮށްގެން އަދި އެމީހުންގެ ރިސޯސް ބޭނުންކޮށްގެން މި ތަނުގައި އިންވެސްޓްމަންޓް ހަދާ ނަމަ ދީލަތި ވާށޭ. ބިން ދިނުމުގައި، ބިމުގެ މުއްދަތުގައި، ބިމުގެ ޓެނެންސީ ރައިޓް ދިނުމުގައި ދީލަތިވާށޭ. އެމީހުން މަސައްކަތް ފެށުމަށްފަހު އިތުރު ހުރަސް ކުރިމަތި ނުކުރުވާށޭ،“ ޔާމީން ވިދާޅުވިއެވެ.
މި ޖަލްސާގައި ޔާމީން ދެއްކެވި ވާހަކަފުޅުތަކުން ސާފުވަނީ، ސަރުކާރުން މުޅި ރާއްޖެއަށް އަމާޒުކޮށްގެން ހިންގަން ރާވާ ތަރައްޤީގެ މުހިންމު މަޝްރޫޢުތަކަށް ބިން ހަމަޖެއްސުމަށް ދަތިކޮށް، ކައުންސިލްތައް މެދުވެރިކޮށް ސިޔާސީ ގޮތުން ސަރުކާރަށް ޕްރެޝަރު ކުރުމަށް އެ މަނިކުފާނު މަސައްކަތް ކުރައްވާ ކަމެވެ.
