ސަރުކާރުގެ ”ބޯހިޔާވަހިކަން އެންމެންނަށް“ ސިޔާސަތުގެ ދަށުން ހުށަހަޅާފައިވާ އެޕްލިކޭޝަންތައް ވެރިފައިކުރުމުގެ މަސައްކަތް މިނިސްޓްރީ އޮފް ހައުސިންގ، ލޭންޑް އެންޑް އާބަން ޑިވެލޮޕްމަންޓުން ފަށައިފިއެވެ.
ހައުސިންގ މިނިސްޓްރީން ވިދާޅުވީ، ފޯމުތަކުގެ ވެރިފިކޭޝަން މަރުޙަލާ ކުރިއަށްދާއިރު މަޢުލޫމާތުގެ އެއްވެސް ފުށުއެރުމެއް ވާނަމަ، އެކަން ”ހިޔާވަހި ޕޯޓަލް“ މެދުވެރިކޮށް އެޕްލިކަންޓަށް އަންގަމުން ގެންދާނެ ކަމަށެވެ. އަދި އެފަދަ ހާލަތްތަކުގައި، އެކަމުގެ ތަފްސީލާއި ބޭނުންވާ ލިޔެކިޔުންތައް ހުށަހެޅުމަށް 7 ދުވަހުގެ މުއްދަތެއް ދެވޭނެ ކަމަށްވެސް މިނިސްޓްރީން މަޢުލޫމާތު ދެއެވެ.
އެޕްލިކޭޝަނާ ގުޅިގެން އަންނަ މިފަދަ ހުރިހާ ބަދަލުތަކާއި އަދާހަމަތައް ޕޯޓަލްގެ އިތުރުން އެސް.އެމް.އެސް މެދުވެރިކޮށް ވެސް ފޯމު ހުށަހެޅި ފަރާތްތަކަށް ސީދާ އަންގަމުންދާނެއެވެ. ނަމަވެސް، އެޕްލިކޭޝަނާ ގުޅޭ މައްސަލަތަކަށް ޖަވާބުދާރީވުމަށާއި އިތުރު ލިޔެކިޔުން ހުށަހެޅުމަށް ބޭނުންކުރެވޭނީ ހަމައެކަނި ބޯހިޔާވަހިކަން ޕޯޓަލް ކަމަށް މިނިސްޓްރީން ވަނީ ހާމަކޮށްފައެވެ.
ބޯހިޔާވަހިކަން އެންމެންނަށް ސިޔާސަތުގެ ދަށުން ހުށަހަޅާފައިވާ އެޕްލިކޭޝަންތަކުގެ ވެރިފިކޭޝަންގެ މަސައްކަތް ކުރިއަށްދާއިރު، ސަރުކާރުގެ އިދާރާތަކާއި ކައުންސިލްތަކުން ލިބެން ހުރި މަޢުލޫމާތުން އެފަރާތެއް ޝަރުޠު ހަމަނުވާފަދަ ކަމެއް ފާހަގަވެއްޖެ ނަމަ އެކަން ޕޯޓަލް މެދުވެރިކޮށް… pic.twitter.com/sOs6CI1VQK
— Abdulla Muththalib (@muththo) August 22, 2026
މި މަސައްކަތާ ގުޅޭގޮތުން ހައުސިންގ މިނިސްޓަރު ޑރ. މުއްޠަލިބް ވިދާޅުވީ، ”ބޯހިޔާވަހިކަން އެންމެންނަށް“ ސިޔާސަތުގެ ދަށުން ހުށަހަޅާފައިވާ ފޯމުތައް ޗެކްކުރުމުގައި ސަރުކާރުގެ އެކި އިދާރާތަކާއި ކައުންސިލްތަކުން ލިބެންހުރި ރަސްމީ މަޢުލޫމާތުތަކަށް ބަލަމުންދާ ކަމަށެވެ. އަދި އެ މަޢުލޫމާތުތަކުން އެއްވެސް ފަރާތެއްގެ ޝަރުޠު ހަމަނުވާފަދަ ކަމެއް ފާހަގަވެއްޖެނަމަ، އެކަން ޕޯޓަލް މެދުވެރިކޮށް ވަގުތުން އަންގާނެ ކަމަށް މިނިސްޓަރު ވިދާޅުވިއެވެ. މީގެއިތުރުން، ދައުލަތުގެ އިދާރާތަކުން ލިބިފައިވާ މަޢުލޫމާތަކީ ރަނގަޅު ނޫން މަޢުލޫމާތެއް ކަމަށްވާނަމަ، އެކަން ސާބިތުކޮށްދިނުމުގެ ފުރުޞަތު އެ ފަރާތްތަކަށް މިނިސްޓްރީން ފަހިކޮށްދޭނެ ކަމުގެ ޔަޤީންކަންވެސް މިނިސްޓަރު ވަނީ ދެއްވާފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އެންމެ އިސްކަމެއް ދެއްވައިގެން ކުރިއަށްގެންދަވާ ބޯހިޔާވަހިކަމުގެ ސިޔާސަތުގެ ދަށުން ފޯމުތައް ވެރިފައިކުރުމުގެ މަރުޙަލާ ކުރިއަށް މިދަނީ ވީހާވެސް ދެފުށް ފެންނަ، އިންސާފުވެރި ނިޒާމެއްގެ ތެރެއިން ޙައްޤުވެރިންނަށް ބޯހިޔާވަހިކަން ކަށަވަރުކޮށްދިނުމުގެ މަޤްޞަދުގައެވެ.
