ގްރޭޓަރ މާލެ ކަނެކްޓީވިޓީ ބުރިޖު (ތިލަމާލެ ބުރިޖު) މަޝްރޫއުގެ ދަށުން މާލެއާއި ވިލިމާލެ އެއްގަމު މަގުން ގުޅާލުމުގެ މަސައްކަތް އެއްކޮށް ނިންމައި، މަޝްރޫއުގެ 76.1 އިންސައްތަ މަސައްކަތް އެއްކޮށް ނިންމާލައިފިއެވެ.

Ads by

ތިލަމާލެ ބުރިޖަކީ މާލޭ ސަރަހައްދުގައި މިވަގުތު ކުރިއަށްދާ އުމްރާނީ ތަރައްގީގެ އެންމެ ބިޔަ މަޝްރޫއެވެ. ތިލަމާލެ ބުރިޖުގެ މަސައްކަތް ކުރިއަށްގެންދާ އެފްކޮންސް ކުންފުނިން ބުނި ގޮތުގައި، ދެން އެންމެ އަވަހަށް ކުރިއަށްގެންދާނީ ބުރިޖުގެ ފިނިޝިންގ މަސައްކަތްތަކެވެ. އެގޮތުން ބުރިޖުގައި ރޭލިންގ ހަރުކުރުމާއި ލައިޓް ހަރުކުރުން ފަދަ މުހިއްމު މަސައްކަތްތައް ހިމެނޭނެ ކަމަށް އެ ކުންފުނިން ބުންޏެވެ.

ބުރިޖުން ދަތުރުކުރަން ފެށޭނީ ފިނިޝިންގގެ މަސައްކަތްތައް އެއްކޮށް ނިންމާލެވުމުންނެވެ. މި މަޝްރޫއުގެ ދަށުން މާލެ، ވިލިމާލެ، ގުޅިފަޅު އަދި ތިލަފުށި އެއްގަމު މަގުން ގުޅާލާއިރު، ބުރިޖާއި ކޯޒްވޭތައް ހިމެނޭހެން މުޅި ކަނެކްޓިވިޓީގެ ދިގުމިން 6.7 ކިލޯމީޓަރަށް އަރައެވެ. އަދި މި ރަށްތައް ގުޅުވައިދޭ ހައިވޭތަކުގެ މަސައްކަތްތައް ހަލުވި ދުވެލީގައި ކުރިއަށްދާ ކަމަށް އެފްކޮންސްއިން މައުލޫމާތުދެއެވެ.

މި މަޝްރޫއުގެ އެންމެފަހުގެ މައުލޫމާތުތައް ހިއްސާކުރަމުން ހައުސިންގ މިނިސްޓްރީން ބުނެފައިވަނީ، ތިލަމާލެ ބުރިޖު މަޝްރޫއުގެ ދަށުން މިވަގުތު ގުޅިފަޅުގައި ކުރިއަށްދަނީ ބުރިޖާ ގުޅޭ މަގުތައް ހެދުމުގެ މަސައްކަތް ކަމަށާއި، ތިލަފުށީގައި ކުރިއަށްދަނީ ބްރިޖާ ގުޅިގެން ޖަހަންޖެހޭ ރިވެޓްމަންޓް ޖެހުމުގެ މަސައްކަތްތައް ކަމަށެވެ.

ތިލަމާލެ ބުރިޖުގެ އަމަލީ މަސައްކަތް ފެށީ މިދިޔަ އެމްޑީޕީ ސަރުކާރުގައި 2021 ވަނަ އަހަރުގެ ތެރޭގައެވެ. ދިމާވި އެކި ސަބަބުތަކާ ހުރެ ބުރިޖުގެ މަސައްކަތްތައް ލަސްވެ ބުރިޖު ނިންމުމަށް އެކި ތާރީހުތައް ކަނޑައެޅި ނަމަވެސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އިންޑިއާއާއެކު ކުރި ހަރުދަނާ މަޝްވަރާތަކާއި ކުރެވުނު މުހިއްމު ގިނަ މަސައްކަތްތަކާ ގުޅިގެން ބުރިޖު ގުޅާލުމުގެ މަސައްކަތް ވަނީ މެކުހަށް ޖަހައިފައެވެ.

މުޅި މި މަޝްރޫއަށް ގާތްގަނޑަކަށް 500 މިލިއަން ޑޮލަރު (7 ބިލިޔަނަށްވުރެ ގިނަ ރުފިޔާ) ހޭދަވާނެއެވެ. މިއީ އިންޑިއާ ސަރުކާރުގެ 100 މިލިއަން ޑޮލަރުގެ ހިލޭ އެހީއާއި، 400 މިލިއަން ޑޮލަރުގެ ލައިން އޮފް ކްރެޑިޓް ފެސިލިޓީގެ އިތުރުން ދިވެހި ސަރުކާރުގެ ބައިވެރިވުމާއެކު ކުރިއަށްގެންދާ މަޝްރޫއެކެވެ.

ސަރުކާރުން މިހާރު އަމާޒު ހިފާފައިވަނީ އަންނަ 2027 ވަނަ އަހަރުގެ ނިޔަލަށް ތިލަމާލެ ބުރިޖުގެ މަސައްކަތްތައް އެއްކޮށް ނިންމާލުމަށެވެ.