އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އާއި އިޒްރޭލުގެ އޮފިޝަލެއް ކަމަށްވާ އަފެކް މޮސްކޮވިޗް ހައްޔަރުކުރުމަށްޓަކައި ބައިނަލްއަޤްވާމީ ފުޅާ ދާއިރާއެއްގައި ’ރެޑް ނޯޓިސް‘ ނެރެދިނުމަށް ތުރުކީން އިންޓަޕޯލްގައި އެދިއްޖެއެވެ.
ތުރުކީގެ ޖަސްޓިސް މިނިސްޓަރު އަކިން ގުރްލެކް ހާމަކުރި ގޮތުގައި، މި އަމުރަށް އެދުނީ އިސްތަންބޫލްގެ 11 ވަނަ ހައި ކްރިމިނަލް ކޯޓުގައި ހިނގަމުންދާ ޤަޟިއްޔާއަކާ ގުޅިގެންނެވެ. މިއީ ޣައްޒާއަށް އިންސާނީ އެހީ ހިފައިގެން ދިޔަ ’ގްލޯބަލް ސުމޫދު ފްލޮޓިއްލާ‘ އަށް ބައިނަލްއަޤްވާމީ ކަނޑުގެ ސަރަހައްދުގައި އިޒްރޭލުގެ އަސްކަރިއްޔާއިން ދިން ޙަމަލާ އާއި، އެ އުޅަނދުތަކުގައި ތިބި އާންމުން ހައްޔަރުކުރި ހާދިސާއާ ގުޅިގެން ހުށަހެޅުނު މައްސަލައެކެވެ.
ނަތަންޔާހޫއާއި އޭނާގެ ސަރުކާރުގެ 35 އޮފިޝަލެއްގެ މައްޗަށް ތުރުކީން ވަނީ ’ނަސްލުހޭދު ހިންގުމާއި’، ’އިންސާނިއްޔަތާ ދެކޮޅަށް ޖަރީމާތައް ހިންގުމާއި’، ’އަނިޔާވެރިވުން’، އަދި ’އާންމުންގެ މިނިވަންކަން ނިގުޅައިގަތުން‘ ފަދަ ބޮޑެތި ކުށްތަކުގެ ތުހުމަތުކޮށްފައެވެ.
ތުރުކީގެ ޖަސްޓިސް މިނިސްޓަރު ބުނީ، ޣައްޒާގައި ހިންގާ ޖަރީމާތައް އޮއްބާލުމަށް ނުވަތަ ކުށްވެރިން ޤާނޫނުގެ ކުރިމަތިން ރެކެން ފުރުޞަތު ނުދޭނެ ކަމަށެވެ. އަދި ބައިނަލްއަޤްވާމީ ޤާނޫނުގެ ދަށުން އަޅަންޖެހޭ އެންމެހައި ފިޔަވަޅުތައް ތުރުކީން އަޅާނެކަމަށް އޭނާ ބުންޏެވެ. އިންޓަޕޯލްގެ ”ރެޑް ނޯޓިސް“ އަކީ މެންބަރު 196 ޤައުމުގެ ކަމާބޭހޭ ފުލުހުންނަށް ކުށްވެރިޔާ ހޯދައި، ބަންދުކޮށް، އަތުލައިގަތުމަށް ދެވޭ ބައިނަލްއަޤްވާމީ އަމުރެކެވެ.
