ބާޒާރުގައި ވިއްކާ ތަކެތީގެ އަގުތައް ބަލާލެވޭނެ ގޮތަށް ތައްޔާރުކޮށްފައިވާ ”އަގުމަގު“ ޕޯޓަލްގައި މިހާތަަނަށް 224 ފިހާރަ ރަޖިސްޓްރީކޮށްފައިވާ ކަމަށް އިކޮނޮމިކް މިނިސްޓްރީން ބުނެފިއެވެ.
އަގުމަގު ޕޯޓަލް ލޯންޗުކޮށްފައިވަނީ 28 ފެބްރުއަރީ 2025 ވަނަ ދުވަހުގައެވެ. މި ޕޯޓަލްގެ މައިގަނޑު ބޭނުމަކީ އަސާސީ ކާބޯތަކެތި ރައްޔިތުންނަށް ފޯރުކޮށްދިނުމާއެކު ބާޒާރުގައި ތަކެތީގެ އަގު ހުރިނެތް ގޮތް ބެލޭނެ ގޮތް ފަހިކޮށްދިނުމެވެ. މި ޕޯޓަލް މެދުވެރިކޮށް ބަލައިލެވޭނީ ހަމައެކަނި މާލޭގެ ފިހާރަތަކުގައި ހުރި ތަކެތީގެ އަގުތައް ކަމަށް އިކޮނޮމިކް މިނިސްޓްރީން މައުލޫމާތުދެއެވެ.
އިކޮނޮމިކް މިނިސްޓްރީން މިހާރު ވަނީ އަގުމަގު އެޕް ވެސް ތައާރަފްކޮށްފައެވެ. މިކަމުގެ ސަބަބުން އަތޮޅުތެރޭގެ ރަށްރަށުގެ ބާޒާރުގައި ތަކެތީގެ އަގުތައް ހުރިނެތް ގޮތް ބަލައިލެވޭނެ ކަމަށް އެ މިނިސްޓްރީން މައުލޫމާތުދެއެވެ. އިކޮނޮމިކް މިނިސްޓަރު މުޙައްމަދު ސަޢީދު ހާމަކުރެއްވި ގޮތުގައި މިހާތަނަށް މި އެޕް ޑައުންލޯޑް ކުރި މީހުންގެ އަދަދު 3،300 އަށްވުރެ މައްޗަށް ވަނީ އަރައިފައެވެ. އަދި ދުވާލެއްގެ މައްޗަށް 2،700 އަށްވުރެ ގިނަ މީހުން މި އެޕް ބޭނުންކުރާ ކަމަށް މިނިސްޓަރު ވިދާޅުވިއެވެ.
އިކޮނޮމިކް މިނިސްޓްރީން ބުނީ، އަގުމަގު ޕޯޓަލްގައިވާ އަސާސީ ކާބޯތަކެއްޗަކީ ބައިނަލްއަގުވާމީ އަދި ރާއްޖޭގެ ކަމާބެހޭ އިދާރާތަކުން އަސާސީ ކާބޯތަކެތި ކަމަށް ކަނޑައަޅާފައިވާ މިންގަނޑުތަކަށް ރިއާޔަތްކޮށް ތައްޔާރުކޮށްފައިވާ ލިސްޓެއް ކަމަށެވެ. އަގުމަގު އެޕް ވެސް މިހާރު ތައާރަފްކޮށްފައިވާއިރު، މި އެޕް މެދުވެރިކޮށް ކޮންމެ ދުވަހަކު ބޭނުންކުރާ ތަކެތީގެ އަގުތައް އެއް ތަނަކުން ފެންނާނެ ކަމަށް އެ މިނިސްޓްރީން ބުންޏެވެ.
ހަމައެހެންމެ އާންމުކޮށް ގަންނަ ތަކެތި ބާޒާރުގައި ލިބެން ހުރި އެންމެފަހުގެ އަގުތައް ބަލައިލެވުމުގެ އިތުރުން އެކި ފިހާރަތަކުގައި ތަކެތި ވިއްކާ އެންމެ ހެޔޮ އަގާއި، އެންމެ ބޮޑު އަގު ވެސް މި އެޕްލިކޭޝަން މެދުވެރިކޮށް ބަލައިލެވޭނެއެވެ. މީގެ އިތުރުން ފާއިތުވި 10 ދުވަހުގެ ތެރޭގައި އަގުތަކަށް އައި ބަދަލުތައް ވެސް ބަލައިލެވޭނެ ކަމަށް އެ މިނިސްޓްރީން ބުންޏެވެ.
