ތިލަމާލެ ބުރިޖު މަޝްރޫޢުގެ ދަށުން މާލެއާއި ވިލިމާލެ ގުޅުވައިދޭ އެންމެ ފަހު ސެގްމަންޓު ގުޅާލުމުގެ ތާރީޚީ މަސައްކަތް މާދަމާ ހެނދުނު ކުރުމަށް ތައްޔާރުވެއްޖެއެވެ.
މި މަޝްރޫޢުގެ ކޮންޓްރެކްޓަރު، އިންޑިއާގެ އެފްކޮންސް ކުންފުނިން މަޢުލޫމާތު ދޭ ގޮތުގައި މާދަމާ ހެނދުނު ބާއްވާ ޚާއްޞަ ހަރަކާތަކާއެކު މި ސެގްމަންޓު ގުޅާލުމުން، މާލެއާއި ވިލިމާލެއާ ދެމެދު އަޅާ ބުރިޖުގެ މައި އޮނިގަނޑުގެ މަސައްކަތް އެއްކޮށް ނިމިގެންދާނެއެވެ.
މައި އޮނިގަނޑު ގުޅާލެވުނު ނަމަވެސް، އާންމު ދަތުރުފަތުރަށް ބުރިޖު ހުޅުވާލެވޭނީ ފިނިޝިންގ މަސައްކަތްތައް އެއްކޮށް ނިމުމުންނެވެ. އެގޮތުން، ދެން އެންމެ އަވަހަށް ފެށިގެންދާނީ ދަތުރުފަތުރުގެ ރައްކާތެރިކަމަށްޓަކައި ޖަހަންޖެހޭ ރޭލިންގްސްތަކާއި ލައިޓިންގ ހަރުކުރުން ފަދަ މުހިންމު ފިނިޝިންގ މަސައްކަތްތައް ކަމަށް އެފްކޮންސް އިން ބުނެއެވެ.
މާލެ ސަރަޙައްދުގައި މިވަގުތު ކުރިއަށްދާ އެންމެ ބިޔަ ޢުމްރާނީ ތަރައްޤީގެ މަޝްރޫޢު ކަމަށްވާ ތިލަމާލެ ކަނެކްޓިވިޓީ ޕްރޮޖެކްޓަކީ މާލެ، ވިލިމާލެ، ގުޅިފަޅު އަދި ތިލަފުށި ގުޅުވާލުމަށް ކުރިއަށްގެންދާ ބިޔަ މަޝްރޫޢެކެވެ. ބުރިޖާއި ކޯޒްވޭތައް ހިމެނޭ ގޮތަށް މުޅި މި މަޝްރޫޢުގެ ދިގުމިނަކީ 6.7 ކިލޯމީޓަރެވެ. އަދި މި ރަށްތައް ގުޅުވައިދޭ ހައިވޭތަކުގެ މަސައްކަތްތައް ވެސް މިހާރު ދަނީ އެއްފަސްކޮށް ބާރަށް ކުރިއަށެވެ.
ބިނާރާ ބެހޭ ވުޒާރާއިން ވިދާޅުވި ގޮތުގައި، ގުޅިފަޅުގައި ބްރިޖާ ގުޅޭ މަގުތައް ހެދުމުގެ މަސައްކަތް ބާރު ސްޕީޑުގައި ކުރިއަށްދާއިރު، ތިލަފުށީގައި މިވަގުތު ކުރިއަށްދަނީ ބްރިޖާ ގުޅިގެން ޖަހަންޖެހޭ ރިވެޓްމަންޓް ޖެހުމުގެ މަސައްކަތްތަކެވެ.
މުޅި މި މަޝްރޫޢަށް ގާތްގަނޑަކަށް 500 މިލިޔަން ޑޮލަރު (7 ބިލިޔަނަށްވުރެ ގިނަ ރުފިޔާ) ހޭދަވާނެއެވެ. މިއީ އިންޑިއާ ސަރުކާރުގެ 100 މިލިޔަން ޑޮލަރުގެ ހިލޭ އެހީއާއި، 400 މިލިޔަން ޑޮލަރުގެ ލައިން އޮފް ކްރެޑިޓް ފެސިލިޓީގެ އިތުރުން ދިވެހި ސަރުކާރުގެ ބައިވެރިވުމާއެކު ކުރިއަށްގެންދާ މަޝްރޫޢެކެވެ. މާދަމާ މާލެއާއި ވިލިމާލެ ގުޅާލެވިގެން ދިޔުމަކީ މި މަޝްރޫޢު ނިންމުމަށް އެޅިގެންދާނެ ވަރަށް މުހިންމު ފިޔަވަޅެކެވެ.
