އީރާނާ ދެކޮޅަށް އެމެރިކާގެ ރައީސް ޑޮނަލްޑް ޓްރަމްޕް އިއުލާންކޮށްފައިވާ ”އިޤްތިޞާދީ ޑީ-ޑޭ“ ކެމްޕޭނުގައި ބައިވެރިވެ، އީރާނުގެ ސަރުކާރު ”ވައްޓާލުމަށް“ އެމެރިކާގެ ޓްރެޜަރީ ސެކްރެޓަރީ ސްކޮޓް ބެސެންޓް ވަނީ ބައިނަލްއަޤްވާމީ އިއްތިހާދަށާއި ޗައިނާއަށް ގޮވާލާފައެވެ. އެމެރިކާގެ ޓްރެޜަރީ ސެކްރެޓަރީ ބުނިގޮތުގައި، މިއީ ތާރީޚުގައިވެސް ޤައުމަކާ ދެކޮޅަށް ހިންގާ އެންމެ ވަރުގަދަ އިޤްތިޞާދީ އެކެހެރިކުރުމުގެ އޮޕަރޭޝަނެވެ. އަދި އީރާނާއެކު ވިޔަފާރިކުރާ ނުވަތަ މާލީ އެހީތެރިކަން ފޯރުކޮށްދޭ އެއްވެސް ޤައުމަކަށް އެމެރިކާއިން ވަރުގަދަ ފިޔަވަޅުތަކެއް އަޅާނެކަމުގެ އިންޒާރު ވަނީ ދީފައެވެ.
އީރާނުގެ ޚާރިޖީ ވަޒީރު އައްބާސް އަރާޤްޗީ ވަނީ އެމެރިކާގެ އިންޒާރުތައް ކުށްވެރިކޮށް، މިއީ ”އިޤްތިޞާދީ ޓެރަރިޒަމް“ ކަމަށް ބުނެފައެވެ. އީރާނުގެ މަޖިލީހުގެ ރައީސް މުޙައްމަދު ބާޤިރު ޤާލީބާފް ބުނީ، އެމެރިކާގެ ބްލޮކޭޑާއި ދަތިކުރުމުގެ ފިޔަވަޅުތައް އުވާނުލަނީސް ހޮރްމޫޒް ކަނޑުއޮޅި އާންމު ދަތުރުފަތުރަށް ނުހުޅުވާނެ ކަމަށެވެ.
