ކުޑަކުދިންނަށް އިހުމާލުވުމާއި އަންހެނުންނަށް ޖިސްމާނީ އަނިޔާ ކުރުމުގެ މައްސަލަތައް މިދިޔަ މަހު އިތުރުވެފައިވާ ކަމަށް މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓްގެ ތަފާސްހިސާބުތަކުން ދައްކައިފިއެވެ.
ފެމިލީ މިނިސްޓްރީން އާންމުކުރި ތަފާސްހިސާބުތަކުން ދައްކާ ގޮތުގައި، މިދިޔަ މަހުގެ ތެރޭގައި ޖުމްލަ 228 މައްސަލައެއް އެ މިނިސްޓްރީން ވަނީ ބަލައިފައެވެ. އޭގެ ތެރެއިން ކުޑަކުދިންނަށް ކުރާ އަނިޔާގެ މައްސަލަތަކުގެ ތެރެއިން އެންމެ ގިނައިން ރިޕޯޓުކޮށްފައިވަނީ އިހުމާލުވުމުގެ މައްސަލަތަކެވެ. އެގޮތުން އިހުމާލުވުމުގެ 22 މައްސަލައެއް ރިޕޯޓުކޮށްފައިވާއިރު، އޭގެ ތެރޭގައި ހިމެނެނީ އަންހެން ކުދިންނާ ގުޅުންހުރި 16 މައްސަލައަކާއި ފިރިހެން ކުދިންނާ ގުޅުންހުރި 6 މައްސަލައެވެ. މިއީ ޖޫން މަހު ހުށަހެޅުނު 14 މައްސަލައާ އަޅައިބަލާއިރު އިތުރު އަދަދެކެވެ.
މިދިޔަ މަހު ދެވަނައަށް އެންމެ ގިނައިން ރިޕޯޓުކޮށްފައިވަނީ ކުޑަކުދިންނަށް ޖިންސީ އަނިޔާކުރުމުގެ މައްސަލަތަކެވެ. އެގޮތުން އަންހެން ކުދިންނާ ގުޅުންހުރި 14 މައްސަލައަކާއި ފިރިހެން ކުދިންނާ ގުޅުންހުރި 3 މައްސަލައެއް ހުށަހަޅާފައިވެއެވެ. މީގެ އިތުރުން، ކުޑަކުދިންނަށް ގެވެށި އަނިޔާ ކުރުމުގެ 14 މައްސަލައަކާއި ޖިސްމާނީ އަނިޔާގެ 7 މައްސަލައެއް ވެސް ވަނީ ރިޕޯޓުކޮށްފައެވެ. އަދި ކުޑަކުދިންގެ އަޚްލާޤާ ގުޅުންހުރި އެހެނިހެން 15 މައްސަލައެއް ހުށަހަޅާފައިވާއިރު، އޭގެ ތެރޭގައި ގެއިން ފިލައިގެން ދިޔުމުގެ 2 މައްސަލައަކާއި ސްކޫލަށް ދާން ދެކޮޅު ހެދުމުގެ 4 މައްސަލައެއް ހިމެނެއެވެ.
ވަކި ޖިންސަކަށްވީތީ ކުރާ އަނިޔާ ނުވަތަ ގެވެށި އަނިޔާގެ މައްސަލަތަކަށް ބަލާއިރު، މިދިޔަ މަހު 54 މައްސަލައެއް ފެމިލީ މިނިސްޓްރީން ވަނީ ބަލައިފައެވެ. މި ބައިން އެންމެ ގިނައިން ރިޕޯޓުކޮށްފައިވަނީ ޖިސްމާނީ އަނިޔާގެ މައްސަލަތަކެވެ. އެގޮތުން އަންހެނުންނަށް ޖިސްމާނީ އަނިޔާ ކުރުމުގެ 27 މައްސަލައަކާއި، ފިރިހެނުންނަށް އަނިޔާކުރުމުގެ 5 މައްސަލައެއް ހިމެނެއެވެ. ދެވަނައަށް އެންމެ ގިނައީ އަނގަބަހުން ނުވަތަ ނަފުސާނީ ގޮތުން ކުރާ އަނިޔާގެ މައްސަލަތައް ކަމަށްވާއިރު، އެފަދަ 12 މައްސަލައެއް އެ މިނިސްޓްރީން ވަނީ ބަލައިފައެވެ.
މިނިސްޓްރީގެ ތަފާސްހިސާބުތަކުގައިވާ ގޮތުން، ދައުލަތުގެ ބެލުމުގެ ދަށުގައި ތިބި ކުދިންގެ ތެރެއިން ދެ ކުއްޖަކު ފޯސްޓާ ކުރުމަށް (އާއިލާއަކާ) ވަނީ ހަވާލުކޮށްފައެވެ. އަދި ދެ ފިރިހެން ކުދިންނާއި އަންހެން ކުއްޖަކު، އަލުން އެކުދިންގެ އާއިލާތަކާ ހަވާލުކުރުމުގެ މަސައްކަތް ވެސް މިދިޔަ މަހު ވަނީ ކޮށްފައެވެ.
ދިވެހިރާއްޖެއަކީ ކުޑަކުދިންނަށް އަނިޔާ ކުރުމާއި ގެވެށި އަނިޔާގެ މައްސަލަތައް ނިސްބަތުން ގިނަ ޤައުމެކެވެ. ފުލުހުންގެ ތަފާސްހިސާބުތަކަށް ބަލާއިރު، މިދިޔަ އަހަރު ވެސް ގެވެށި އަނިޔާގެ 320 މައްސަލައެއް ރިޕޯޓުކޮށްފައިވެއެވެ. މިއީ އޭގެ ކުރީ އަހަރާ އަޅައިބަލާއިރު 25 އިންސައްތައިގެ އިތުރުވުމެކެވެ.
ކަމާބެހޭ އިދާރާތަކުން ދަނީ މިފަދަ މައްސަލަތައް ހުއްޓުވުމަށާއި އަނިޔާ ލިބޭ ފަރާތްތަކަށް ރައްކާތެރިކަން ފޯރުކޮށްދިނުމަށް ގިނަ މަސައްކަތްތަކެއް ކުރަމުންނެވެ.
