މޯލްޑިވްސް ޕެންޝަން އެޑްމިނިސްޓްރޭޝަން އޮފީހުގެ ޗީފް އެގްޒެކެޓިވް އޮފިސަރުގެ މަގާމަށް ޔަޒްމީދު މުޙައްމަދު މިއަދު އައްޔަންކުރައްވައިފިއެވެ.
ޔަޒްމީދަކީ ދައުލަތުގެ މިނިވަން މުއައްސަސާތަކާއި، ޕަބްލިކް އޮޑިޓިން އަދި ވިޔަފާރި މެނޭޖްމަންޓުގެ ދާއިރާގެ އިސް މަގާމުތަކުގައި 20 އަހަރަށްވުރެ ދިގު މުއްދަތެއްގެ އަގުހުރި ޚިދުމަތްތަކެއް ކުރައްވައި ތަޖުރިބާ ހޯއްދަވާފައިވާ ބޭފުޅެކެވެ.
އޭނާ އެންމެ ފަހުން އަދާކުރައްވާފައިވަނީ ޖުޑީޝަލް ސަރވިސް ކޮމިޝަނުގެ ނައިބު ރައީސް އަދި ކޮމިޝަނަރުގެ މަގާމެވެ. އެ މުއްދަތުގެ ތެރޭގައި ފަނޑިޔާރުންގެ ސުލޫކީ މައްސަލަތައް ބަލާ ކޮމިޓީގެ މުގައްރިރުކަމާއި، ޖުޑީޝަލް އެކަޑަމީގެ އެޑްވައިޒަރީ ބޯޑުގެ މެންބަރުކަމުގެ އިތުރުން ފަނޑިޔާރުންގެ މަސައްކަތް އިވެލުއޭޓްކުރާ ކޮމިޓީގެ މެންބަރުކަންވެސް އޭނާ ކުރައްވާފައިވެއެވެ.
މީގެ ކުރިން ދައުލަތުގެ މުހިންމު އެހެން މަގާމުތަކެއްވެސް ޔަޒްމީދު ފުރުއްވާފައިވެއެވެ. އެގޮތުން 2014 އަހަރުން ފެށިގެން 2019 ވަނަ އަހަރާ ހަމައަށް އެންޓި-ކޮރަޕްޝަން ކޮމިޝަނުގެ ކޮމިޝަނަރެއްގެ ހައިސިއްޔަތުން ކޮރަޕްޝަންގެ މައްސަލަތައް ތަހުގީގުކުރުމާއި، މުއައްސަސާތަކުގެ ގަވަރނަންސް ރިވިއުކުރުމުގެ އިތުރުން ކޮރަޕްޝަނާ ދެކޮޅަށް ހިންގުނު މުހިންމު ހަރަކާތްތައް އޭނާ ވަނީ ލީޑުކުރައްވާފައެވެ.
އޭނާ ޚިދުމަތް ފެއްޓެވީ އޮޑިޓަރ ޖެނެރަލްގެ އޮފީހުން ކަމަށްވާއިރު، އެ އޮފީހުގައި ދިހަ އަހަރު ދުވަހު މަސައްކަތް ކުރައްވާފައިވެއެވެ.
ތައުލީމީ ދާއިރާއިން ޔަޒްމީދަކީ އެސޯސިއޭޝަން އޮފް ޗާޓަރޑް ސެޓިފައިޑް އެކައުންޓެންޓްސްގެ މެންބަރަކަށްވުމުގެ އިތުރުން އޯޕަން ޔުނިވަރސިޓީ މެލޭޝިއާއިން މާސްޓަރ އޮފް ބިޒްނަސް އެޑްމިނިސްޓްރޭޝަން ހާސިލުކުރައްވާފައިވާ ބޭފުޅެކެވެ. އަދި އިނގިރޭސިވިލާތުގެ އޮކްސްފޯޑް ބްރޫކްސް ޔުނިވަރސިޓީން އެޕްލައިޑް އެކައުންޓިން ދާއިރާއިން ފަސްޓް ކްލާސް އޮނަރސްއާއެކު ބެޗްލަރ އޮފް ސައިންސް ހާސިލުކުރައްވާފައިވާ، އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސްގެވެސް މެންބަރެކެވެ.
މަގާމާ ހަވާލުވެވަޑައިގެން މީޑިއާތަކާ ޙިއްސާކުރެއްވި މެސެޖެއްގައި، ޕެންޝަން ސްކީމްގެ ބައިވެރިންނަށާއި އަސާސީ ޕެންޝަންގެ ހައްގުވެރިންނަށް ޚިދުމަތްކުރުމަކީ ވަރަށް އިސްކަންދޭ އަމާނާތެއްކަމަށް ޔަޒްމީދު ފާހަގަކުރެއްވިއެވެ. އަދި ސީއީއޯގެ ހައިސިއްޔަތުން އެންމެ ބޮޑު އިސްކަމެއް ދެއްވާނީ މާޒީގައި އަދާކުރައްވާފައިވާ ދައުލަތުގެ އެކި މަގާމުތަކެކޭ އެއްފަދައިން، ނަޒާހަތްތެރިކަމާއި، ދެފުށް ފެންނަ ގޮތެއްގައި އަދި ހަރުދަނާ އުސޫލުތަކަކާއެކު މަސައްކަތްކުރެއްވުމަށް ކަމަށް ވިދާޅުވިއެވެ.
ޕެންޝަން އޮފީހަކީ މޯލްޑިވްސް ރިޓަޔަރމަންޓް ޕެންޝަން ސްކީމާއި ދުވަސްވީ މީހުންގެ އަސާސީ ޕެންޝަން ހިންގައި ބެލެހެއްޓުމަށް އުފައްދަވާފައިވާ އޮފީހެކެވެ. މި އޮފީސް ވުޖޫދުވީއްސުރެ، އެ އޮފީސް ދެމިއޮތީ ދިވެހިރާއްޖޭގެ އެންމެ ބޮޑު އެއް އިންސްޓިޓިއުޝަނަލް އިންވެސްޓަރުގެ މަގާމުގައެވެ.
މިހާރު އެ އޮފީހުން މެނޭޖްކުރަމުންދާ ފަންޑުގެ ސާފު އަގު ނުވަތަ ނެޓް އެސެޓް ވެލިއު 27.94 ބިލިޔަން ދިވެހި ރުފިޔާއަށް އަރައެވެ.
