އީރާނުގެ ސަރަޙައްދުން ފޮނުވާލި ދެ ބެލިސްޓިކް މިސައިލެއް ޔޫއޭއީގެ ސަރަޙައްދީ ކަނޑުގެ ތެރެއަށާއި ކައިރިއަށް ވެއްޓުނު ހާދިސާއަކާ ގުޅިގެން، ޔުނައިޓެޑް އަރަބް އެމިރޭޓްސް (ޔޫއޭއީ) އިން އީރާނާއެކު އޮތް އެންމެހައި ވިޔަފާރި، އިޤްތިޞާދީ އަދި މާލީ ގުޅުންތައް ވަގުތުން ސަސްޕެންޑްކޮށްފިއެވެ.
ޔޫއޭއީގެ ޚާރިޖީ ވުޒާރާއިން ހާމަކުރި ގޮތުގައި، މި ނިންމުމަކީ ސަރަޙައްދީ ހަމަޖެހުމާއި ކަނޑުދަތުރުފަތުރުގެ ސަލާމަތަށް އޮތް ނުރައްކާތަކާ ގުޅިގެން ”ވަކި ގޮތެއް އެންގެންދެން“ ނެރުނު ޢަމުރެކެވެ.
ޔޫއޭއީގެ ދިފާޢީ ވުޒާރާއިން ބުނި ގޮތުގައި، އީރާނުން ފޮނުވާލި ދެ ބެލިސްޓިކް މިސައިލް އަމާޒުކޮށްފައިވަނީ ކަނޑުދަތުރުފަތުރު ކުރާ ބޯޓުފަހަރަށެވެ. މީގެ ތެރެއިން އެއް މިސައިލް ޔޫއޭއީގެ ސަރަޙައްދީ ކަނޑުގެ ތެރެއަށް ވެއްޓުނުއިރު، އަނެއް މިސައިލް ވެއްޓުނީ ސަރަޙައްދީ ކަނޑުން ބޭރަށެވެ.
މި ނިންމުމުގެ ސަބަބުން ދުބައި މެދުވެރިކޮށް އީރާނަށް ކުރަމުންދިޔަ އެތައް ބިލިއަން ޑޮލަރެއްގެ ރީ-އެކްސްޕޯޓް ވިޔަފާރިއާއި މާލީ މުޢާމަލާތްތައް ވަނީ މުޅިން ހުއްޓުމަކަށް އައިސްފައެވެ. އީރާނުގެ ޚާރިޖީ ވުޒާރާއިން ވަނީ ޔޫއޭއީއަށް އަމާޒުކޮށް އެއްވެސް މިސައިލެއް ފޮނުވާފައެއް ނުވާނެ ކަމަށް ބުނެ މި ތުހުމަތުތައް ދޮގުކޮށްފައެވެ.
