އެމެރިކާއިން އީރާނުގެ ވަސީލަތްތަކަށް ދޭ ޙަމަލާތައް އިތުރުކޮށްފިނަމަ، ޔޫރަޕްގެ ދެކުނާއި އިރުމަތީގައިވާ އެމެރިކާއާއި އިއްތިހާދުގެ އަސްކަރީ އަމާޒުތަކަށް ޙަމަލާދިނުމުގެ ސިޔާސަތެއް އީރާނުގެ އަސްކަރިއްޔާއިން އެކުލަވާލަމުންދާކަން ހާމަވެއްޖެއެވެ. ’ފިނޭންޝަލް ޓައިމްސް‘ އިން ނެރުނު ޖާސޫސީ ރިޕޯޓްތަކުގައިވާ ގޮތުން، އީރާނުން ދަނީ ހަނގުރާމައިގެ ދާއިރާ މެދުއިރުމަތިން ބޭރަށް ފުޅާކޮށް، ޔޫރަޕްގައިވާ އެމެރިކާގެ ވަސީލަތްތަކަށް ސީދާ މިސައިލާއި ޑްރޯން ޙަމަލާތައް ދިނުމުގެ ފުރުޞަތުތައް ދިރާސާކުރަމުންނެވެ.
އީރާނުން ފާހަގަކޮށްފައިވާ ސަރަޙައްދުތަކުގެ ތެރޭގައި އެމެރިކާގެ އަސްކަރީ މަތިންދާބޯޓުތަކަށް ތެޔޮ އަޅައިދިނުމުގެ ހުއްދަ ދީފައިވާ ބަލްގޭރިއާގެ ”ބެޒްމާ އެއާ ބޭސް“ އާއި، ސައިޕްރަސްގައިވާ އިނގިރޭސިވިލާތުގެ އަސްކަރީ ބޭސްތައް (އާރްއޭއެފް އަކްރޯތީރީ) ހިމެނެއެވެ. އަސްކަރީ ބޭސްތަކުގެ އިތުރުން، ހޮރްމޫޒް ކަނޑުއޮޅި އަޑިން އަޅާފައިވާ ބައިނަލްއަޤްވާމީ ފައިބަރ-އޮޕްޓިކް ކޮމިއުނިކޭޝަން ކޭބަލްތައް ހަލާކުކޮށްލުމުގެ ރޭވުންތައްވެސް އީރާނުން ދަނީ ހަދަމުންނެވެ.
މި ރިޕޯޓްތަކާ ގުޅިގެން ނޭޓޯއިން ބުނެފައިވަނީ އެ އިއްތިހާދުގެ ކޮންމެ ޤައުމެއްގެ ސަރަޙައްދު ދިފާޢުކުރުމަށް ތައްޔާރަށް ތިބި ކަމަށާއި، ކޮންމެ ނުރައްކަލަކާ ދެކޮޅަށްވެސް ފިޔަވަޅު އަޅާނެ ކަމަށެވެ.
