މާލޭ މަސް މާރުކޭޓު ސަރަހައްދުގައި ބައެއްގެ މެދުގައި މާރާމާރީއެއް ހިންގައި ތިން މީހަކު ޒަހަމްވެއްޖެއެވެ.
ފުލުހުން މިރޭ މީޑިއާތަކަށް ފޮނުވި މެސެޖެއްގައި ބުނީ މާލޭ، މާރުކޭޓު ސަރަހައްދުގައި މާރާމާރީއެއް ހިންގައިގެން އުޅޭކަމުގެ މައުލޫމާތު ލިބިގެން ހަރަކާތްތެރިވަމުން އަންނަ ކަމަށެވެ.
”އެކި“ އަށް އެނގިފައިވާ ގޮތުގައި، އެ މާރާމާރީގައި ތިން މީހަކު ޒަހަމްވިއެވެ. އޭގެ ތެރެއިން ދެ މީހަކު ފުލުހުން ވަނީ ހައްޔަރުކޮށްފައެވެ.
”އެކި“ އަށް ލިބިފައިވާ ފޮޓޯތަކާއި ވީޑިއޯތަކުން ފެންނަ ގޮތުގައި އެތަނުން އެކެއްގެ ގައިގައި ގިނަ އަދަދަށް ލޭ ހުއްޓެވެ. އަދި އެ ސަރަހައްދުގެ ބިން މަތީގައިވެސް ގިނަ އަދަދެއްގެ ލޭ ހުއްޓެވެ.
ފުލުހުން އަންނަނީ މި މައްސަލަ އިތުރަށް ތަހުގީގުކުރަމުންނެވެ.
