ކާބުލް، އަފްޣާނިސްތާން – އެމެރިކާ އިސްވެ އޮވެ އަފްޣާނިސްތާނަށް އެރުމާ ގުޅިގެން ތާލިބާނުންގެ ފުރަތަމަ ވެރިކަން ވެއްޓުނުތާ ގާތްގަނޑަކަށް 20 އަހަރު ފަހުން، އެ ޖަމާއަތުން އަލުން ކާބުލްގެ ކޮންޓްރޯލް ހޯދިތާ ފަސް އަހަރު ފުރިއްޖެއެވެ. 2021 ވަނަ އަހަރު އެމެރިކާ ސިފައިން އަވަސްއަރުވާލައިގެން ފޭބިއިރު ހިނގި ހަމަނުޖެހުންތަކާއި ބޮމުގެ ހަމަލާތަކުގައި 200 އެއްހާ އަފްޣާނުންގެ ފުރާނަ ގެއްލިގެން ދިޔަ ނަމަވެސް، މިއަދު ކާބުލް ފެންނަނީ މުޅިން ތަފާތު، ސާފުތާހިރު އަދި އަމާން ސަހަރެއްގެ ގޮތުގައި ކަމަށް މަޝްރަހު ދިރާސާ ކުރާ ފަރާތްތަކުން ދެކެއެވެ.
ފާއިތުވި ފަސް އަހަރުގެ ތެރޭގައި ތާލިބާނުން ހޯދި އެންމެ ބޮޑު އެއް ކާމިޔާބީއަކީ މުޅި އަފްޣާނިސްތާނުގެ ފުރިހަމަ ކޮންޓްރޯލް ނަގައި، ގައުމަށް ނިސްބަތުން ބޮޑު އަމަންއަމާންކަމެއް ގެނެސްދިނުމެވެ. 1996 އިން 2001 އަށް ކުރި ފުރަތަމަ ވެރިކަމާ ހިލާފަށް، މިފަހަރު މުޅި ގައުމު އެއްބާރެއްގެ ދަށަށް ގެނެސް، އައިއެސް-ކޭޕީ (އިސްލާމިކް ސްޓޭޓް – ޚޮރާސާން ޕްރޮވިންސް) ގެ ބާރު ވަނީ ބޮޑުތަނުން ހަނިކޮށްފައެވެ. މީގެ ސަބަބުން ކުރިން ދަތުރުފަތުރު ކުރުމަށް ނުރައްކާތެރި ސަރަހައްދުތަކަށް މިހާރު އާންމުންނަށް ބިރަކާ ނުލައި ދަތުރުކުރެވޭ ކަމަށްވެއެވެ.
މީގެ އިތުރުން، ބޭރުގެ މާލީ އެހީތައް ކެނޑިގެން ދިޔަ ނަމަވެސް، އިގްތިސާދު މުޅިން އިނދަޖެހުނަނުދީ ހިފަހައްޓާލުމުގައި ތާލިބާނުން ވަނީ ކާމިޔާބު ހޯދާފައެވެ. ޓެކުހާއި ކަސްޓަމްސް ނިޒާމު ހަރުދަނާކުރުމާއި، ގުދުރަތީ ވަސީލަތްތައް ނެގުމާއި، ސަރަހައްދީ އަވަށްޓެރި ގައުމުތަކާއެކު ވިޔަފާރީގެ ގުޅުން ބަދަހިކުރުން މީގެ ތެރޭގައި ހިމެނެއެވެ. އަދި ޤޯޝް ތޭޕާ ކެނަލް މަޝްރޫއާއި، ’ޓަޕީ‘ (TAPI) ގޭސް ހޮޅިލައިނާއި، މަގުހެދުމުގެ ބޮޑެތި އުމްރާނީ މަޝްރޫއުތައް މިހާރުވެސް ދަނީ ހިންގަމުންނެވެ. އެހެންނަމަވެސް، ދައުލަތުގެ މާލީ ކަންކަމުގައި ހާމަކަން ބޮޑު ގޮތެއް ނެތުމަކީ އަދިވެސް އޮތް ބޮޑު ގޮންޖެހުމެކެވެ.
ހަމައެއާއެކު، ތާލިބާނުންގެ އެންމެ ބޮޑު ނާކާމިޔާބީއެއްގެ ގޮތުގައި ފާހަގަކުރެވެނީ އިޖުތިމާއީ ސިޔާސަތުތަކެވެ. ވަކިން ހާއްސަކޮށް، އަންހެނުންނާއި އަންހެން ކުދިންނަށް އަޅާފައިވާ ހަރުކަށި ފިޔަވަޅުތަކުގެ ސަބަބުން އާންމު ރައްޔިތުންނާއި ސަރުކާރާ ދެމެދު އޮތް ގުޅުން ހީނަރުވަމުންދާ ކަމަށް މަޝްރަހު ދިރާސާކުރާ ފަރާތްތަކުން ދެކެއެވެ. ގްރޭޑް ހަޔަކުން މައްޗަށް އަންހެން ކުދިންނަށް ޒަމާނީ ތައުލީމު ހާސިލުކުރުން މަނާކޮށްފައި އޮތުމުގެ ސަބަބުން، ގައުމަށް ބޭނުންވާ އަންހެން ޑޮކްޓަރުންނާއި ޓީޗަރުންނާއި އެހެނިހެން ފަންނީ މަސައްކަތްތެރިން ލިބުން ވަނީ އިންތިހާއަށް ދަތިވެފައި ކަމަށް ރިޕޯޓުތައް ބުނެއެވެ.
އަދި ތައުލީމީ ފެންވަރު ދަށްވެ، ޒަމާނީ ތައުލީމީ ނިޒާމު ނެތުމުން އެކަމުގެ ކަންބޮޑުވުންވެސް ދަނީ އިތުރުވަމުންނެވެ.
ހަމަޖެހުމާއި ސަލާމަތީ ރައްކާތެރިކަން ގައުމަށް ގެނެސްދެވުނު ނަމަވެސް، އިޖުތިމާއީ މިފަދަ ހަރުކަށި ސިޔާސަތުތަކުގެ ސަބަބުން ތާލިބާނުންގެ ސަރުކާރު އޮތީ ބައިނަލްއަގުވާމީ މައިދާނުގައާއި އަމިއްލަ ގައުމުގެ ރައްޔިތުންގެ ކުރިމަތީގައިވެސް ބޮޑެތި ސުވާލުތަކަކާއި ގޮންޖެހުންތަކެއްގެ ތެރޭގައެވެ.
