ދިވެހި ވަތަނީ ޚިދުމަތް ފުރިހަމަކޮށްފައިވާ ޒުވާނުންނަށްވެސް ކުރިމަތިލެވޭ ގޮތަށް، މޯލްޑިވްސް ކަސްޓަމްސް ސަރވިސްއިން 26 ވަޒީފާއަކަށް މީހުން ހޯދަން އިއުލާންކޮށްފިއެވެ.
ކަސްޓަމްސްއިން ކޮށްފައިވާ އިއުލާނެއްގައި ބުނެފައިވަނީ، އެ އިދާރާގެ އެކި އޮފީސްތަކަށް ބޭނުންވާ 26 އެސިސްޓެންޓް އޮފިސަރ ޓްރެއިނީގެ މަޤާމަށް ކުރިމަތިލުމުގެ ފުރުސަތު މިހާރު ހުޅުވާލާފައިވާ ކަމަށެވެ. މި މަޤާމުތަކަށް އެދި ހުށަހެޅޭނީ އުމުރުން 18 އަހަރާއި 30 އަހަރާ ދެމެދުގެ ޒުވާނުންނަށެވެ. އަދި އުމުރު ބެލުމުގައި މިންގަނޑަކަށް ބަލާނީ މި މަހުގެ 24 ވަނަ ދުވަހުގެ ނިޔަލަށެވެ.
މި ވަޒީފާތަކުގެ މުސާރައާއި އިނާޔަތްތަކަށް ބަލާއިރު، އަސާސީ މުސާރައިގެ ގޮތުގައި 5،000 ރުފިޔާ އަދި އެލަވަންސްގެ ގޮތުގައި 4،660 ރުފިޔާ ހަމަޖެހިފައިވެއެވެ. މީގެ އިތުރުން އޮފީހަށް ހާޒިރުވާ ކޮންމެ ދުވަހަކަށް 75 ރުފިޔާގެ އިތުރުން ކޮއްތު ފައިސާއާއި، އިތުރު ގަޑީގެ ފައިސާއާއި، ބަންދު ދުވަސްތަކުގެ އިނާޔަތްތަކާއެކު މުވައްޒަފަކަށް މަހަކު ޖުމްލަ 11،000 ރުފިޔާއަށް ވުރެ ބޮޑު އާމްދަނީއެއް ލިބިގެންދާނެއެވެ.
މި މަޤާމަށް މީހުން ހޮވުމުގައި ކަނޑައަޅާފައިވާ މައިގަނޑު ޝަރުތުތަކުގެ ތެރޭގައި, ދިވެހިރާއްޖޭގެ ނޭޝަނަލް ސަރވިސް ޕްރޮގްރާމް ނުވަތަ ކަސްޓަމްސްގެ މަސައްކަތާ ގުޅުންހުރި އެފަދަ ޤައުމީ ޕްރޮގްރާމެއް ފުރިހަމަކޮށް ސެޓްފިކެޓް ހާސިލްކޮށްފައިވުން ހިމެނެއެވެ. އަދި މީގެ އިތުރުން، ކަސްޓަމްސްއާ ގުޅުންހުރި ދާއިރާއަކުން ޤައުމީ ސަނަދުތަކުގެ އޮނިގަނޑުގެ ލެވެލް 3 ނުވަތަ އެއަށްވުރެ މަތީ ސަނަދެއް އޮތުމާއެކު އެސްއެސްސީ ދިވެހިން ’ސީ‘ ފާސް ލިބިފައިވުން، ނުވަތަ ސާނަވީ އިމްތިހާނުން 2 މާއްދާއިން ދަށްވެގެން ’ޑީ‘ ފާހާއެކު ދިވެހިން ’ސީ‘ ފާސް ލިބިފައިވާ ފަރާތްތަކަށްވެސް މި ވަޒީފާއަށް ކުރިމަތިލެވޭނެއެވެ.
ސަރުކާރުން ކުރިއަށްގެންދާ ވަތަނީ ޚިދުމަތުގެ ޕްރޮގްރާމަކީ ޒުވާނުން ބާރުވެރިކުރުވައި، ޤައުމީ ޚިދުމަތަށް އަހުލުވެރިކުރުވުމަށް ހިންގާ މުހިންމު ޕްރޮގްރާމެކެވެ. މި ޕްރޮގްރާމް ފުރިހަމަކުރި ގިނަ އަދަދެއްގެ ޒުވާނުންނަށް މީގެ ކުރިންވެސް އެމްއެންޑީއެފް، ފުލުހުންގެ ޚިދުމަތް އަދި ސަރުކާރުގެ އެހެނިހެން މުއައްސަސާތަކުން ވަޒީފާގެ ފުރުސަތުތައް ވަނީ ފަހިކޮށްދީފައެވެ. ކަސްޓަމްސްއިން މި ހުޅުވާލި ފުރުސަތަކީވެސް މި ޕްރޮގްރާމް ނިންމި ޒުވާނުންނަށް ވަޒީފާގެ މައިދާނަށް ނުކުތުމަށް ލިބިގެންދިޔަ އިތުރު ދޮރެކެވެ.
