ކަޅުބާޒާރުގައި ބޭރު ފައިސާ ގަނެވިއްކުމާއި އެކަން އިޝްތިހާރުކުރުމަކީ އެއް މިލިއަން ރުފިޔާއާ ހަމައަށް ޖޫރިމަނާކުރެވޭ ކުށެއްގެ ގޮތުގައި ކަނޑައެޅުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން މިއަދު ފާސްކޮށްފި އެވެ.
ރައްޔިތުންގެ މަޖިލީހުގެ މާލިއްޔަތު ކޮމިޓީން މި ގޮތަށް ފާސްކޮށްފައިވަނީ ބޭރު ފައިސާއާ ބެހޭ ގާނޫނަށް ސަރުކާރުގެ ފަރާތުން ހުށަހަޅާފައިވާ ބިލަށް އިސްލާހުތަކެއް ގެނައުމަށްފަހު އެވެ.
މި ބިލަކީ ބޭރު ފައިސާއިން އާމްދަނީ ލިބޭ ވިޔަފާރިތަކުން ޑޮލަރު މާރުކުރަން ޖެހޭ މިންގަނޑުތައް ހަރުދަނާކުރުމުގެ ގޮތުން ހުށަހަޅާފައިވާ ބިލެކެވެ.
މި އިސްލާހު ކޮމިޓީއަށް ހުށަހަޅުއްވާފައިވަނީ ފުނަދޫ ދާއިރާގެ މެންބަރު މުހައްމަދު މަމްދޫހެވެ. އެގޮތުން މަރުކަޒީ ބޭންކުން ކަނޑައަޅާފައިވާ ރޭޓަށްވުރެ މަތީ އަގެއްގައި ނުވަތަ ބޭންޑުން ބޭރުން ބޭރު ފައިސާ ވިއްކުމާއި ވިއްކަން މަސައްކަތް ކުރުމަކީ މަނާކަމެއް ކަމަށް ކަނޑައަޅާފައިވެ އެވެ.
މިފަދަ ކުށެއް ކޮށްފި ފަރާތެއްގެ ކުށުގެ ކުޑަބޮޑުމިނަށް ބަލައި، 25،000 ރުފިޔާއާއި އެއް މިލިއަން ރުފިޔާއާ ދެމެދުގެ އަދަދަކުން ޖޫރިމަނާކުރެވޭނެ ކަމަށް ބިލުގައި ބަޔާންކޮށްފައިވެ އެވެ. މީގެ އިތުރުން، ކަޅުބާޒާރުގައި ޑޮލަރު ވިއްކަން އިޝްތިހާރުކުރުމާއި އެކަމަށް ހިތްވަރުދޭ ލިޔުންތައް ޝާއިއުކުރުމަކީ ވެސް ގާނޫނީ ކުށެއް ކަމަށް ކަނޑައަޅާފައިވެ އެވެ.
އެފަދަ އިޝްތިހާރެއް ފަތުރާ ފަރާތްތައް 25،000 ރުފިޔާއާއި 500،000 ރުފިޔާއާ ދެމެދުގެ އަދަދަކުން ޖޫރިމަނާކުރެވޭނެ އެވެ. އަދި މިފަދަ ކުށެއްގައި ގާނޫނީ ޝަހުސެއް ނުވަތަ ރަޖިސްޓްރީކޮށްފައިވާ ވިޔަފާރިއެއް ޝާމިލުވާނަމަ، އެފަރާތްތައް އެއްލައްކަ ރުފިޔާއާއި ފަސް މިލިއަން ރުފިޔާއާ ދެމެދުގެ އަދަދަކުން ޖޫރިމަނާކުރުމުގެ ބާރު ލިބިގެންވެ އެވެ.
