ރޫސީވިލާތުން (ރަޝިއާ) ދިވެހިރާއްޖެއަށް އަންނަ ފަތުރުވެރިންގެ އަދަދު އިތުރުކުރުމަށާއި، ދެ ޤައުމުގެ ދެމެދުގައި ވައިގެ އުދުހުންތަކުގެ ވިއުގަ އިތުރަށް ފުޅާކޮށް ވަރުގަދަކުރުމަށްޓަކައި ކުރާ ޚާއްޞަ ދަތުރެއްގައި މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމް.އޭ.ސީ.އެލް) އިން ބައިވެރިވާން ނިންމައިފިއެވެ.
މި މަހުގެ 17 އިން 21 އަށް ރޫސީވިލާތުގެ ވެރިރަށް މޮސްކޯ އަދި އެ ޤައުމުގެ ވިޔަފާރީގެ މައި މަރުކަޒު ކަމަށްވާ ސެއިންޓް ޕީޓަރސްބާގަށް ކުރާ މި ދަތުރުގައި ރާއްޖޭގެ ފަތުރުވެރިކަމާއި ވައިގެ ދަތުރުފަތުރުގެ ދާއިރާ ތަމްސީލުކުރާ މުހިންމު ފަރާތްތަކެއް ބައިވެރިވެއެވެ. އޭގެ ތެރޭގައި މިނިސްޓްރީ އޮފް ޓޫރިޒަމް އެންޑް ސިވިލް އޭވިއޭޝަނާއި، ވިޒިޓް މޯލްޑިވްސް (އެމްއެމްޕީއާރުސީ)، އެމްއޭސީއެލް އަދި ޤައުމީ އެއާލައިން މޯލްޑިވިއަންގެ އިތުރުން ރިސޯޓް ލައިފް ޓްރެވަލް، އިން ޓުއާ މޯލްޑިވްސް އަދި ފަތުރުވެރިކަމުގެ ދާއިރާގައި ހަރަކާތްތެރިވާ އަމިއްލަ އެހެނިހެން ކުންފުނިތަކުގެ މަންދޫބުން ހިމެނެއެވެ.
ރޫސީވިލާތަކީ މިހާރުވެސް ދިވެހިރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ އެއް މާކެޓަށް ވާއިރު، މި ދަތުރުގެ މައިގަނޑު ބޭނުމަކީ އެ ޤައުމުގައި ރާއްޖެއަށް އޮތް ބޮޑު ތަރުހީބުގެ މައްޗަށް ބިނާކޮށް، އެ މާކެޓު އިތުރަށް ފުޅާކުރުމެވެ. މި ދަތުރުގެ ތެރޭގައި، މޮސްކޯ އަދި ސެއިންޓް ޕީޓަރސްބާގުގެ ސަރުކާރުގެ ކަމާބެހޭ އިދާރާތަކާއި، އެއާލައިންތަކާއި، ޓުއާ އޮޕަރޭޓަރުންގެ އިތުރުން ޓްރެވަލް ޓްރޭޑް ބައިވެރިންނާ ބައްދަލުކޮށް މުހިންމު މަޝްވަރާތަކެއް ކުރިއަށް ގެންދިއުމަށް ވަނީ ހަމަޖެހިފައެވެ.
މި މަޝްވަރާތައް މައިގަނޑު ގޮތެއްގައި އަމާޒުކުރެވޭނީ ރޫސީވިލާތުން ރާއްޖެއަށް އަންނަ ފަތުރުވެރިންގެ އަދަދު އިތުރުކުރެވޭނެ ގޮތްތަކާއި، އެ މާކެޓުގައި ރާއްޖޭގެ ބްރޭންޑް އިތުރަށް ވަރުގަދަކޮށް، ރާއްޖެ އިޝްތިހާރުކުރާ ފަރާތްތަކާއެކު ގާތުން މަސައްކަތްކުރެވޭނެ އިންތިޒާމުތައް ހަމަޖެއްސުމަށެވެ.
މީގެއިތުރުން، ވެލާނާ އިންޓަރނޭޝަނަލް އެއަރޕޯޓް (ވީއައިއޭ) އަށް މިހާރު ދަތުރުކުރާ އެއާލައިންތަކާއި އަލަށް ދަތުރުތައް ފަށަން ޝައުޤުވެރިވާ އެއާލައިންތަކާއެކު ވެސް ޚާއްޞަ ބައްދަލުވުންތަކެއް ބޭއްވުމަށް ހަމަޖެހިފައިވާ ކަމަށް އެ ކުންފުނިން ބުނެއެވެ.
އެމްއޭސީއެލުން ބުނީ މި ބައްދަލުވުންތަކުގައި މިހާރު ދެމުންދާ ޚިދުމަތްތަކުގެ ފްރީކުއެންސީއާއި ކެޕޭސިޓީ އިތުރުކުރުމަށާއި، އަހަރުގެ ހުރިހާ ދުވަސްވަރެއްގައިވެސް މެދުކެނޑުމެއްނެތި ދަތުރުތައް ބޭއްވޭނެ ގޮތްތަކާއި، ވީއައިއޭއަށް އަލަށް ސީދާ ދަތުރުތައް ފެށުމުގެ ފުރުސަތުތަކާ ގުޅޭގޮތުން ވާހަކަދެކެވޭނެކަަމަށެވެ. ހަމައެއާއެކު، ޓުއަރ އޮޕަރޭޓަރުންނާއި ޓްރެވަލް ކުންފުނިތަކާއެކު ބާއްވާ ބައްދަލުވުންތަކުގެ ސަބަބުން، ފަތުރުވެރިންގެ މެދުގައި ޑިމާންޑް ބޮޑުވަމުންދާ ދާއިރާތައް ދެނެގަނެވި، ޓްރެވަލް ޕެކޭޖުތައް މެދުވެރިކޮށް އެއަރލައިންތަކުގެ ޖާގަ ފުރިހަމައަށް ބޭނުންހިފުމަށް މަގުފަހިވެގެންދާނެ ކަމަށްވެސް އެމްއޭސީއެލުން ބުނެއެވެ.
މި ދަތުރަކީ މިއަހަރުގެ ޖުލައި މަހު ރާއްޖޭގެ ޑެލިގޭޝަނަކުން ޗައިނާއަށް ކުރި ކާމިޔާބު ދަތުރެކޭ އެއްފަދައިން، ރާއްޖޭގެ ފަތުރުވެރިކަމުގެ މުހިންމު މާކެޓުތަކުން އަންނަ ފަތުރުވެރިންގެ އަދަދު އިތުރުކުރުމަށާއި، އެ ޤައުމުތަކާ ދެމެދު އޮންނަ ވައިގެ ދަތުރުފަތުރުގެ ގުޅުން ވަރުގަދަކުރުމަށް ކުރެވެމުންދާ މަސައްކަތްތަކުގެ މުހިންމު ބައެއްކަމަށް އެމްއޭސީއެލުން ހާމަކުރިއެވެ.
އެމްއޭސީއެލް އިން ބުނި ގޮތުގައި އެ ކުންފުނީގެ މައިގަނޑު އަމާޒަކީ އެއާލައިންތަކާއި ފަތުރުވެރިކަމުގެ ދާއިރާގެ ބައިވެރިންނާ ގުޅިގެން މަސައްކަތްކޮށް، ވެލާނާ އިންޓަނޭޝަނަލް އެއާޕޯޓަށް ދެވޭ ޚިދުމަތްތައް ފުޅާކުރުމާއި، މި މާކެޓުތަކުން ރާއްޖެއަށް އަންނަ ފަތުރުވެރިންނަށް ދަތުރުފަތުރުގެ ކަންކަން ވީހާވެސް ފަސޭހަކޮށްދިނުމެވެ.
