ތިލަފުށި ދެވަނަ ފިޔަވަހިން ބީލަމުގެ އުސޫލުން ސިނާއީ ބޭނުމަށް ބިން ގަނެ، އެއްބަސްވުމުގައި ސޮއިކޮށްފައިވާ ފަރާތްތަކުގެ އަތުން ފައިސާ ނެގުމުގެ މަސައްކަތް ފަށާފައިވާ ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނެފިއެވެ.
އެޗްޑީސީން ބުނީ ބިން ގަތުމަށް ހުޅުވާލި ފުރުސަތުގައި ބިން ކާމިޔާބުކޮށް، އެއްބަސްވުމުގައި ސޮއިކޮށްފައިވާ ފަރާތްތަކަށް ގުޅައިގެން ”މައިލްސްޓޯން“ އެކެއްގެ ފައިސާ ނެގުމުގެ މަސައްކަތްތައް ކުރިއަށް ގެންދާނެ ކަމަށެވެ.
ތިލަފުށިން ބީލަމުގެ އުސޫލުން ސިނާއީ ބޭނުމަށް ބިން ގަތުމުގެ ފުރުސަތު އަލުން ހުޅުވާލަން އެޗްޑީސީން ނިންމާފައި ވަނީ މީގެ ދެ ހަފުތާ ކުރިންނެވެ.
ހަމައެކަނި ދިވެހިންނަށް ހުޅުވާލައިގެން ތިލަފުށި ދެވަނަ ފިޔަވަހިން ބީލަމުގެ އުސޫލުން ވިއްކަން އެޗްޑީސީން ނިންމީ ތިލަފުށީ ޒޯން އޭ ގެ އޭރިޔާ ބީ ގައި މިހާތަނަށް ނުވިކި ހުރި ބިންތަކެވެ. ބީލަމުގެ އުސޫލުން ބިން ވިއްކަން ހުޅުވާލި ފުރުސަތުގައި ވިޔަފާރީގެ އެކި ބޭނުންތަކަށް ދޫކުރާ ބިމުގެ ގޮތުގައި ތިލަފުށިން ޖުމްލަ 108 ބިން ވިއްކުމަށް ހުޅުވާލިއެވެ.
އެއީ 2،000 އަކަފޫޓާއި 4،900 އަކަފޫޓާ ދެމެދުގެ 64 ބިމާއި 5،000 އަކަފޫޓާއި 9،999 އަކަފޫޓާ ދެމެދުގެ 42 ބިމުގެ އިތުރުން 10،000 އަކަފޫޓާއި 14،999 އަކަފޫޓާ ދެމެދުގެ ދެ ބިމެވެ.
ތިލަފުށި ދެވަނަ ފިޔަވަހީގެ އޭރިއާގެ ބީ ގެ ބިން ހިއްކުމާއި އަތިރިމަތި ރައްކާތެރި ކުރުމުގެ ޕްރޮޖެކްޓުގެ 29 އިންސައްތަ ފުރިހަމަ ކުރެވިފައިވާ ކަމަށް އެޗްޑީސީން ބުނެއެވެ.
