ރާއްޖޭގައި މަސައްކަތްކުރާ ބޭރުގެ ކޮންޓްރެކްޓަރުންގެ އަތުން ނަގާ ވިތު ހޯލްޑިންގ ޓެކްސް ދެގުނައަށް ބޮޑުކުރުމަށް ގާނޫނަށް ބަދަލު ގެންނަން ސަރުކާރުގެ ފަރާތުން ރައްޔިތުންގެ މަޖިލީހަށް ބިލެއް ހުށަހަޅައިފިއެވެ.
ސަރުކާރުގެ ފަރާތުން މި ބިލު ރައްޔިތުންގެ މަޖިލީހަށް ހުށަހެޅުއްވީ މަތިވެރި ދާއިރާގެ މެންބަރު ޙަސަން ޒަރީރެވެ.
މި ބިލުގެ މައިގަނޑު މަގުސަދަކީ ރާއްޖޭގައި ކޮންސްޓްރަކްޝަން މަޝްރޫއުތަކުގެ ކޮންޓްރެކްޓްތަކަށް ވާދަކުރުމުގައި ދިވެހި ކޮންޓްރެކްޓަރުން، ބޭރުގެ ކޮންޓްރެކްޓަރުންނާ ހަަމަހަމަ ވާދަވެރި މާހައުލެއް އުފެއްދުމެވެ. މި ބިލުގައި، ވިތުހޯލްޑިންގ ޓެކްސް 5 އިންސައްތައިން 10 އިންސައްތައާއި ހަމައަށް ބޮޑުކުރުމަށް ވަނީ ހުށަހަޅައިފައެވެ. އަދި މި ބަދަލާއެކު ދައުލަތުގެ އާމްދަނީއަށް އަހަރެއްގެ މައްޗަށް އިތުރު 251 މިލިއަން ރުފިޔާ ލިބޭނެ ކަމަށްވެސް ލަފާކޮށްފައިވެއެވެ.
ވިތުހޯލްޑިންގ ޓެކުހަކީ ބޭރުގެ ކޮންޓްރެކްޓަރުންނަށް ދިވެހި ވިޔަފާރިތަކުން ފައިސާ ދައްކާ ނަަމަ، އެ ދައްކަންޖެހޭ އަގުގެ ތެރެއިން އުނިކޮށްގެން ނަގާ ޓެކުހެކެވެ. މި ފައިސާ މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އަށް ދައްކާނީ ދިވެހި ކުންފުނިތަކުންނެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އެ ބިލަށް މެންބަރުން ވަނީ ބަހުސް ވެސް ކުރައްވައިފައެވެ. އެގޮތުން ވެރިކަން ކުރާ މައި ޕާޓީ ޕީއެންސީގެ މެންބަރުން މި ބިލަށް ބަހުސްކުރައްވަމުން ވިދާޅުވީ ގާނޫނަށް މި ބަދަލު ގެނެވުމުން މަޝްރޫއުތަކަށް ވާދަކުރުމުގައި ދިވެހި ކޮންޓްރެކްޓަރުންނަށް އިތުރު ފުރުސަތު ލިބިގެންދިއުމުގެ އިތުރުން ބޭރުގެ ކޮންޓްރެކްޓަރުންނާ ވާދަކުރުމުގައި ހަމަހަމަ ފުރުސަތުތަކެއް ލިބޭނެ ކަމަށެވެ. ޕީއެންސީގެ މެންބަރުންގެ އިތުރުން އިދިކޮޅު އެމްޑީޕީގެ މެންބަރުން ވެސް ވަނީ މި ބިލަށް ތާއީދުކުރައްވައިފައެވެ. ނަމަވެސް މި ބަދަލުގެ ސަބަބުން ދިވެހި ވިޔަފާރިވެރިންނަށް ކުރާނެ އެއްވެސް ފައިދާއެއް ނެތް ކަމަށް އެ މެންބަރުން ވިދާޅުވިއެވެ.
ވިތުހޯލްޑިން ޓެކްސް ދެގުނައަށް ބޮޑުކުރުމަށް ސަރުކާރުގެ ފަރާތުން ހުށަހެޅި ބިލު ބަލައިގަނެ، މުޅި މަޖިލީހުގެ ކޮމެޓީއަށް ފޮނުވަން ވެސް މިހާރު ވަނީ ފާސްކޮށްފައެވެ. މި ބިލު ބަލައިގަތުމަށް ނެގުނު ވޯޓުގައި ބައިވެރިވެވަަޑައިގެންނެވި މެންބަރުންގެ ތެރެއިން އެންމެ މެންބަރެއް ފިޔަވާ ދެންތިބި ހުރިހާ މެންބަރުން ވޯޓުދެއްވީ ބިލް ބަލައިގަތުމަށް ފެންނަ ކަމަށެވެ. ބިލް ބަލައިގަތުމާ ދެކޮޅަށް ވޯޓުދެއްވީ ގަލޮޅު އުތުރު ދާއިރާގެ މެންބަރު މީކާއިލް އަޙުމަދު ނަސީމް އެކަންޏެވެ،
