ރައްޔިތުންގެ މަޖިލީހަށް ހުށަހަޅާ ޕެޓިޝަންތަކާ ގުޅޭގޮތުން މަޖިލީހުގެ ގަވާއިދުގައި ކަނޑައަޅާފައިވާ ޝަރުތުތަކުގެ ތެރެއިން، އެއް މައްސަލައެއްގައި ތަކުރާރުކޮށް ޕެޓިޝަން ހުށަހެޅުން މަނާކުރާ މާއްދާ އުނިކުރަން މަޖިލީހުގެ އާންމު ކޮމިޓީން ފާސްކޮށްފިއެވެ.
މި އިސްލާހު ހުށަހެޅުއްވީ ފުނަދޫ ދާއިރާގެ ޕީއެންސީ މެންބަރު މުހައްމަދު މަމްދޫހެވެ.
މަޖިލިސް ގަވާއިދުގެ 257 ވަނަ މާއްދާގެ ޅ ގައި ބަޔާންކޮށްފައިވާގޮތުން، މަޖިލީހަށް ކުރިން ހުށަހެޅިގެން ކުރިއަށްގެންދާ ޕެޓިޝަނެއްގައި އެޅުމަށް ގޮވާލާފައިވާ ފިޔަވަޅެއް އަލުން އެޅުމަށް އެހެން ޕެޓިޝަނެއްގައި ހިމެނިގެން ނުވާނެއެވެ.
މި މައްސަލަ މަޖިލިސް ތަޅުމުގައި އިއުލާނު ކުރުމަށްފަހު ދިރާސާކުރުމަށް ދާއިމީ ކޮމިޓީއަށް ފޮނުވުމާ ގުޅިގެން ކޮމިޓީން ވަނީ އެ މާއްދާ އުނިކުރަން ފާސްކޮށްފައެވެ.
ކޮމިޓީ ބައްދަލުވުމުގައި އެ މާއްދާ އުނިކުރުމަށްފަހު އެ އަކުރަށްފަހު ހިމެނޭ އެހެން އަކުރުތައް ތަރުތީބު ކުރުމަށް ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު ހުށަހަޅުއްވައި، އެ ހުށަހެޅުމަށް އިސްދޫ ދާއިރާގެ މެންބަރު އިސްމާއީލް ޝަފީއު ވަނީ ތާއީދު ކުރައްވާފައެވެ.
ކޮމިޓީގައި ނެގުނު ވޯޓުގައި ބައިވެރިވެވަޑައިގެންނެވި ނުވަ މެންބަރުންގެ ތެރެއިން ހަތް މެންބަރުންގެ ވޯޓާއެކު މި އިސްލާހު ވަނީ ފާސްވެފައެވެ. މި ހުށަހެޅުން ފާސްކުރަން ނުފެންނަ ކަމަށް ވޯޓު ދެއްވީ އެންމެ މެންބަރެކެވެ.
މި އިސްލާހު ގެނެސްފައި މިވަނީ ކައުންސިލްތަކުގެ އިހުތިސާސްގައި ހިމެނޭ ބިންބިން ވަކިކުރުމުގެ ބާރު ވަޒީރުންގެ މަޖިލީހަށް ދިނުމަށް ލާމަރުކަޒީ ގާނޫނަށް ހުށަހަޅާފައިވާ ބިލާ ގުޅިގެން އެކި ފަރާތްތަކުން ޕެޓިޝަން ހުށަހަޅަމުންދާ ދަނޑިވަޅެއްގައެވެ.
މީގެ ކުރިން އޮތްގޮތުންނަމަ އެއް މައްސަލައަކަށް ވާތީ ދެވަނަ ޕެޓިޝަނެއް މަޖިލީހަށް ނުވެއްދުނީހެވެ. ނަމަވެސް މި ގެނެވުނު ބަދަލާއެކު، އެ ބިލް ފާސްކުރަން ގޮވާލާ ހުށަހަޅާ ޕެޓިޝަންވެސް ސޮއި ހަމަވުމުން މަޖިލީހަށް ހުށަހެޅުމުގެ ފުރުސަތު ލިބިގެންދާނެއެވެ.
